I Kolindo 16 - O Mikanda Ikola

O mukungu ua kutumikisa ku Judeia

¹ Kiki-phe o mukungu ua kitadi u muala kubhanga phala akua Ngana ku Judeia, kioso ki nga tumu o Jingeleja ja Ngalásia, kiene ue ku mu bhanga enu.

² Mu kizuua kia dianga ku semana, kala muthu mudienu a katule kakitadi, a ka lunde kididi, kioso kia soko mu kulenda kuê. Mbe hadia ki ku bhinge dingi kubhanga mukungu hinu ki ngi mi sanga.

³ Kumbi di nga kà tula kuenhoko, oso mua a solo, ene u nga kà tuma ni mikanda phala a bheke o ujitu uenu ku Jeluzaleme.

⁴ Se ki tokala eme uami kuia, ngʼ ila-nâ kumoxi.

O jinjila ja fika Phaulu o ku ji enda

⁵ Eme nga kà mi sanga ku mualʼ oko, se nga zubha kiá kubhita ku Masedonha, kuma ku Masedonha kuene ku nganda ku ila.

⁶ Manhi-phe mba nga kà bhanga izuua bhu bhata dienu, mba thembu ioso ia mbambi i ngi bhitila bhenhobho, phala mu ngi xinjikile mu njila ioso i nga kà katuka.

⁷ Kuma ki ngi mesena ku mi mona ngó kiá kindala mu kusomboka. Maji, nga mesena ngʼ induluka hanji muene bhu mualʼ enu, se Ngana u ngʼ ehela.

⁸ Maji ngendi ngi xikama-phe hanji kunu ku Efezo katé bhu Pendekoxi.

⁹ Kuma kunu nga sange-ku kua ngi jikukila muelu ua dikota, ua nguzu ua kubhanga kikalakalu kiambote, suke o jinguma ue ja vulu-ku.

¹⁰ Kienʼ iki Timote se uiza kuenhoko, bhangenu kioso ki mua tena, phala a kale mu ʼaxaxe kenu sé hele, kuma muene mukua kukalakala sedivisu ia Ngana, mukuá ni eme-muene.

¹¹ Ki bhu kale-phe muthu u mu tenda. Inda mu mu xinjikila ni uembu, mu njila ioso i anda kuenda, phala a ngi sange kunu. Kuma eme nga mu mu kinga kuijiia kumoxi ni jiphange jamukuâ.

¹² O ki mu ibhula phange ietu Apolo, nga mu diondele kiavulu kuila kumoxi ni jiphange nʼ a mi sange koko, maji o muene-phe ki kia vondadi iê kuia kindala. Maji hinu uia, bhuoso bhu a muena kithangana.

O maka ma sukidila-ku

¹³ Di langienu, mu di fikidile mu kuxikana. Bhangenu ukuenze, mu suine.

¹⁴ Ioso i mu bhanga, mu i bhanga ni henda.

¹⁵ Enu Setefano mua mu ijiia kiambote, kumoxi ni akua bhata diê,—ene o jikidistá ja dianga o kudiela ku Ngelésia, iá a te muẋima ku kikalakalu kia kudikila o athu a ngene a Nzambi. Enu phange jami, nga mi diondo-phe,

¹⁶ endenu ni ku a kaiela mu im ioso ia longa, kumoxi ni akuá oso a mu a kuatekesa mu kikalakalu kioso kia mu bhanga.

¹⁷ Nga sanguluka kia ngi sange Setefano ni Fortunato, ni Akaiuko, kuma ene mukonda dienu-enu mua kambe-bhu, kioso kia ngi kambele ku mbandu ienu, a ngi zubhila-kiu.

¹⁸ Kuma ene a ngi suinisa kiavulu o muẋima. Eme ngejiia kuma ni enu ue a mi bhetula o miẋima. Athu oso a kala kiki, a fuama ku a ximana.

¹⁹ Jingeleja jala ku Azia ja mi menekena. Akuila ni Pidisila, ni Ngeleja iene kudibhongolola mʼ onzo iâ, a mi menekena kiavulu mua Ngana.

²⁰ O jiphange joso kunu ja mi menekena. Di menekenienu mudienu ni mukinu ua ujitu.

²¹ Umenekenu uami eme ngi Phaulu, u nga soneka ni lukuaku luami eme-muène.

²² Se bhu kala muthu ua kambe o kuzola Ngana, a kale muthu a mu bhubhidila! Malanata—Ngana ietu ʼza kiá!

²³ O kiadi kia Ngana Jezú Kristu, ki kale ni enu ku mualʼ oko.

²⁴ O henda iami ue i kale ni enu oso mua Kristu Jezú.