I Kolindo 12 - O Mikanda Ikola

O mauhete ma nzumbi, ma di tungula mu idifanganu

¹ O ki tu kuata ku maka ma mauhete ma tu bhana kuala o Nzumbi Ikôla: Enu jiphange, ki ngi mesena mu kamba kuijiia o kidi.

² Enu muejiia kuma kioso ki mua kexile mu matumbu, mua sendukile ni itekʼ oio ia di fuila, mu kaiela kioso-kioso kia mi longesa.

³ Uila kiki, nga mi lomboluela kiambote kuma, kana muthu, kia zuela ni Nzumbi ia Nzambi, u kiamba kuma: Jezú muthu a mu bhubhidila! Kana muthu ue u ki amba kuma: Jezú muene Ngana, se u kamba kukala ni Nzumbi Ikôla.

⁴ Mauhete-phe ma Nzumbi ma di tungula mu idifanganu (ulungu uâ), maji o Nzumbi-phe iene imoxi ia mu a bhana.

⁵ O maubhikilu ue ma di tungula mu idifanganu, maji o Ngana iene imoxi i tua mu bhikila.

⁶ O unjimu ua maufunu ua di tungula mu idifanganu, maji-phe Nzambi imoxi u bhana unjimu moxi dia ene oso, phala muthu ni muthu nʼ a bhange o kikalakalu kiê.

⁷ Kala muthu Nzambi ua mu bhana utukulukilu ua Nzumbi Ikôla mu kukuatekesa akuâ.

⁸ Kuma sai iú a mu bhana kuala Nzumbi Ikôla, hundu ia kutongolola; sai iú a mu bhana hundu ia kuijiia, maji ienda ni Nzumbi iene imoxi.

⁹ Sai iú a mu bhana kuxikana kuala o Nzumbi ienʼ iii; sai iú a mu bhana u mesene ua kusaka, ku Nzumbi imoxi iene.

¹⁰ Sai ni iú Nzumbi Ikôla i mu bhana kutena kua kubhanga isumua; sai ni iú a mu bhana uanji ua kutala o Maka ma Nzambi. Sai ni iú a mu bhana o kutena kua kuijiia kutungula o uhete u tunda kua Nzumbi Ikôla, ni iú ki u tundu kua Muene. Sai iú a mu bhana kutena kua kuvula jimbimbi jengi ja kuzuela; sai iú a mu bhana o kutena kua kulombolola o jimbimbi jengi jenʼ iji.

¹¹ Maji iene ioso iii-phe, o Nzumbi imoxi iene ngó u i kalakala. Muene u uanena o uhete ku athu-athu kioso kia mu kala mu vondadi iê.

Mukutu umoxi, o idiandu i vula

¹² Kiene kimoxi kala o mukutu ua vula idiandu, o idiandu iene ioso, sumbala iavulu, ia di bhange mukutu umoxi, ni Kristu ue kiene.

¹³ Kuma ku Nzumbi imoxi etu oso a tu batizala mu mukutu umoxi, kixi tu Jijudé, kixi ki tu Jijudé, kixi tu abhika, kixi tu jifôlo. Etu oso a tu nuisa ku Nzumbi imoxi.

¹⁴ Kuma o mukutu ka u bhanga ngó ni kidiandu kimoxi, maji idiandu i vula.

¹⁵ O kinama se kʼ ila, eme mukonda nga lémbua kukala ngi lukuaku, ku mukutu ni ngala-ku, né mbe kiene, ku mukutu ki ki kambe kutokala-ku.

¹⁶ O ditui ue se dʼ ila, eme mukonda nga lémbua kukala ngi diesu, ku mukutu ki ngalaku, né mbe kiene, ku mukutu ki di kambe kutokala-ku.

¹⁷ O mukutu uoso se u kala diesu, tueji kuivua ni-hi? O mukutu uene uoso se u kala ditui, tueji kuivua kiebhi o dizumba?

¹⁸ Ki tualʼ iki-phe, Nzambi o idiandu ioso ua i sokesa mu mukutu, kioso kia mu uabhela muène.

¹⁹ Iene ioso se ia kexile kidiandu kimoxi ngó, o mukutu uejù kala bhebhi?

²⁰ O kiki-phe idiandu i vula, maji o mukutu-phe umoxi ngó.

²¹ Kala kiki o diesu ki di tena kuamba o lukuaku, kuila: Eie ki ngi ku bhindamena. Mba o mutue, ki u tena kuamba o inama, kuila: Enu ki ngi mi bhindamena.

²² Etu ue kiene! Ni idiandu ioio ku mukutu iedi kala ia kambe nguzu tua i bhindamena, mukonda ki i tena ku tu kamba.

²³ Ni idiandu ioso i tua fika kukamba kuuabha, iene i tua mu uabhesa dingi kiengi mu kuzuata. Kioso-phe idiandu ia kambe kuuabha, tua mu sota ku i fukukisa dingi kiengi,

²⁴ o idiandu-phe ioso ia uabha kia, ki i bhindamena dingi kima. Mu kiki Nzambi ua bhange o mukutu mu kidifua kia bhingi kuila, o idiandu iejù kala ndenge mu kuuabha, ua i bhana uuabhelu uengi, ua beta ujitu.

²⁵ Phala mu kiki, mu mukutu ki mu kale kizembu mba kudimuanga, maji idindu iene ioso i di kuatele muanu mudiâ.

²⁶ O ki kala kidiandu kimoxi ki kata, idiandu ioso i katela-nê kumoxi. Se kidiandu kimoxi a ki zangeleka, idiandu ioso i tana-nê kumoxi. Ngeleja,

²⁷ Kienʼ iki enu uenu muala mu mukutu ua Kristu; kala muthu mudienu uala kidiandu ku mukutu uene umoxi.

²⁸ Kiene kia bhekesa kuila, mu Ngeleja, ima ioso Nzambi ua i te mu ididi iêʼ Moxi, ua diangesa o Jipoxolo; iadi, kua kaiela o jipolofeta; o tatu, uate jimesene ja kulonga mu Ngeleja. Iú uate-ku dingi ni abhangi a isuma; uixi ni ia a tambula o umesene ua kusaka jihaxi; amukuá a tambula uhete ua kukala akuatekexi, mba ua kukala atumini, mba ue kuzuela jimbimbi jengi.

²⁹ Ene oso ki Jipoxolo, ene oso ki jipolofeta, ene oso ki jimesene ja kulonga mu Ngeleja. Ene oso kala ni uhete ua kukala abhangi a isuma, ene oso ki jimesene ja kusaka mahaxi.

³⁰ Ene oso ka zuela jimbimbi jengi, mba ene oso a lombolola kioso kia mu zuela o jimbimbi jenʼ iji.

³¹ Uila kiki, bhinda-menenu-phe o mauhete moso ma beta ukota. Maji eme ngi mʼ idikiza dingi o uendelu uala kotʼ elele mu ujitu.