I Kolindo 11 - O Mikanda Ikola

¹ Kalenu-phe mu afikixi ami eme, kala eme ki ngala ngi mufikixi a Kristu.

O uzuatelu ua ahatu mu Ngeleja

² Kiki nga mi ximana kuma mua ngi lembalala mu ima ioso, mua jijila ue o ilekelelu iami i nga mi xila.

³ Maji nga mesena-phe mu kʼ ijiia kuma o diiala dioso, ua mu kala ku pholo Kristu; o muhatu, ua mu kala ku pholo o diiala; o Kristu, ua mu kala ku pholo Nzambi.

⁴ Diiala dioso di kala mù samba, mba mù tula o Njimbu Iambote ia Nzambi mu mabhongolokelu a kubheza, nʼ a futu o mutue, ió ua kambe ujitu kua Kristu.

⁵ Muhatu uoso-phe u kala mù samba mba mù tula o Njimbu Iambote ia Nzambi bhu ionge ia kubheza, nʼ a kambe kufuta o mutue uê, muhatu ió ka bhana ujitu kua muadi uê. Muenʼió ua sokoʼ ê ngó ni muhatu a mu bhutu o mutue, mukonda muène ka di tungulanê ni kima.

⁶ Kuma muhatu se ua kambe ku di futa o mutue, a mu bhute-phe o jindemba, phala kibhue-ku. Maji se ki kala kima kia jisonhi, o muhatu ku mu kolola o mutue, mba ku mu tokola ni ku mu bhutisa ue o kindemba, kuabhu-phe, a di fute veu ku mutue.

⁷ O diiala, ni kidi kiene, ka tokala u futa mutue, mukonda muene kidifua kia Nzambi, muene fuma ia Nzambi. Maji o muhatu-phe muene o kuzangalala kua diiala.

⁸ Kuma o diiala, kia mu bhange, ka tundu ku muhatu, maji o muhatu muene ua tundu ku diiala.

⁹ Mukonda o diiala ki muene a mu bhangela o muhatu, maji muhatu a mu bhangela o diiala.

¹⁰ Uila kiki, mukonda dia ji-anju, muhatu ua tokala kuvunga jinga o mutue uê ni mveu, phala kulondekesa kuila muene ala ku mu tumina kuala o diiala.

¹¹ Kiene ue kimoxi mu muenhu uetu ua ukidistá mua Ngana, o muhatu ka di kalela sé diiala, o diiala ue ka di kalela sé muhatu.

¹² Mbata, uila kia tundu o muhatu ku diiala, diiala ue ki a di vuala, di tunda ku muhatu. O ima ioso-phe i tunda kua Nzambi.

¹³ Enuʼ uenu muene mudienu tongololenu-kiu hanji: Kifua muhatu ki mu fuama kukala mu kultu nʼ a kuata kusambela Nzambi, sé ku di futa kima ku mutue?

¹⁴ Manhi o kikexilu kia athu ki ki mi longo-kiu, kuma diiala kia kala ni kindemba kialebha, ka fukuka?

¹⁵ Maji o muhatu-phe se u kala ni kindemba kialebha, ki mu uabhesa dingi; kindemba kiê kiene kia mu bhelakiu, phala ki kale divunga diê.

¹⁶ Se bhu kala muthu-phe ua mesena u ki kuatela jiphata, eme ngi mu tangela ngó kuma etu ki tuala dingi ni kifua kiengi mu Jingeleja ja Nzambi, bhu mabhongolokelu a kubheza Ngana.

Kioso kia bhitisa o seialu ia Ngana

¹⁷ Kiki, ku maka amukuá u ngandù kuata ku mi lomboluela, ki ngi mono ku mi ximana. Mukonda o kubhongoloka kuenu mu Ngeleja ki kua kubhanga mbote, maji kua kubhanga kiaiibha.

¹⁸ Kima kia dianga, a ngi tangela kuila sai ibuka ia athu mudienu a muia ni kudikuata kioso ki mu bhongoloka mu Ngeleja. Ku mbandʼuku eme nga ki xikina kuila kidi.

¹⁹ Kana-bhu-phe phata, kuila kua bhingi mudienu mu kala kudiuana ku ibuka, phala ió oso ala mu kidi a di monekene.

²⁰ O kioso enu ki mua mu bhongoloka, o Seialu ia Ngana ki iene i muala kudia.

²¹ Mua mu kuila, kioso ki muia mu kudia, kala muthu u tuamena mukuá mù dia o seialu iê-muene. Kí kia mu bhangesa, o kuila o iá hanji ala ni nzala, o iá a bhixila bhu ditala dia kukodiua.

²² Kifua enu mua kambe jinzu jenu ja kudila ni kunuina? Mu kubhanga kiki, o Ngeleja ia Nzambi mua i tobhesa, o akuenu ala jingadiama mua a kuatesa jisonhi! Kienʼ iki ngi mʼ ila kiebhi? Ngi mi ximana? Kana! Mu kiki ki ngi mi ximana, kana!

²³ Kuma eme nga tambula kua Ngana, kioso ki nga mi longo enu, kuila; Ngana Jezú, usuku uenʼ ió ua mu bhakuile ku jinguma, ua katuile o mbolo,

²⁴ O kia zubha kusakidila Nzambi, anga u i bukula, uixi: Iú uene o mukutu uami uobhane mukonda dienu. Mu bhanga jinga kienʼiki mu ku ngʼ imununa Eme.

²⁵ Kiene kimoxi ue kia bhangele ku kopho, kia zubha o kuseiala, u i kuata, uixi: O kopho iii, kiene o kikutu kiobhe bhu kaxi ka Nzambi ni athu, kiojike kidimbu ni manhinga mami. Kioso ki mu nua jinga ku kopho iii, mu ki bhanga mu ku ngʼ imununa Eme.

²⁶ Mukonda kala kithangana ki mu dia o mbolo iii, ki mu nua o kopho iii, mua mu bhana o jingolokela ja kufua kua Ngana, katé hinu ki a kèza muène.

²⁷ Uila kiki, uoso u dia ku mbolo ia Ngana, mba u nua ku kopho iê ni ufusa, muene muè di ua mukutu ua Ngana ni manhinga mê.

²⁸ Kala kiki, muthu-phe a diange ku di tekula o muẋima uê moxi, nʼ a diê kiua o mbolo, nʼ a nue ku kopho.

²⁹ Kuma uoso u dia, u nua, u dia hadi, u nua hadi, se u kamba kutongolola kuila o imʼ iii, uene o mukutu ua Ngana.

³⁰ Mukonda dia kiki, kiene avulu mudienu ki mua bhuidila; kiene ue ki mua katela, sai-ku ni iá a fu muene.

³¹ Se tuedile etuʼ ene tu di tongolola hanji, hinu ki tueji kutambula kaxtiku kua Nzambi.

³² O ki tu tambula-phe kaxtiku, Ngana ua tu beta, phala hinu ka kà tu êlese kumoxi ni mundu.

³³ Uila kiki, enu phange jami, kioso ki mu bhongoloka mu kudia o Seialu ia Ngana, mu di kinga mudienu.

³⁴ Maji muthu se nzala ia mu kuata, a die ku bhata diê, phala o kubhongoloka kuenu-phe ki ku kale kua ku di bhekela kaxtiku ka Nzambi. Maka oso-phe a xala-ku, hinu nga a bheka mu uiukilu uê, kioso ki nga kà mi sanga.