I Kolindo 10 - O Mikanda Ikola

O kutondala kua akua Izalaiele etu kua tu bhana kijimbuete

¹ Kuma nga mesena, enu jiphange, kuila mu xinganeka hanji kioso mʼ ukulu kia bhitile na-kiu o jitata jetu a kexi mù kaiela Mozé. Ene oso a bhitile moxʼ a dituta dia mvula, ene oso a bhitile mu kalunga kakusuka.

² Ene oso a a batizalele mu dituta, ni mu kalunga ni batizo ia kukaiela Mozé.

³ Ene oso a dile kudia kuene kumoxi kua Nzambi.

⁴ Ene oso a nuine kunua kuene kumoxi kua nzumbi. Kuma a nuine jinga ku ndanjiʼ oio ia nzumbi ia kexi mù kuenda na-iu. O ndanji-phe muene Kristu.

⁵ Sumbala kiene, maji athu a uabhelele kiambote Nzambi ka vudile-ku; kiene kia a bhekelele o kubuidila mu kikangalakata, anga o mikutu iâ i di muangena momo.

⁶ Ima ioso iii ia bhiti mu kukala ijimbuete ietu, phala ki tu kuate jihanji ja ima iaiibha, uila ene kia ji kuatele,

⁷ Mba kukala mu abhezi a iteka, kala ki a bhangele ene amoxi-mu. Uila kia ki soneka mu Mikanda Ikôla, exi: O mundu ua xikamene mu kudia ni kunua, kithangana a balumuka mu kukina.

⁸ Ki tu fuama ue kubhanga undumbu kala kia bhangele jinga ene amoxi-mu. Ene a bhangele kiki, anga a buila kizuua kimoxi, makuinhi aiadi a midi ni midi jitatu.

⁹ Kana ue kubhumina kulola o kulenduka kua Ngana, kala kia mu bhumina ene amoxi-mu, anga a fua ku jinhoka.

¹⁰ Kana ue kulongolola, kala kia longoluele ene amoxi-mu, anga a a jima mbutu kuala o Anju ia Mubuikixi.

¹¹ Ima ioso ienʼ iii ia bhitile ku jitata jetu mʼ ukulu, ni i kale kijimbuete ku akua, maji ima ienʼ iii-phe a i soneka phala ku tu dimuna etu. Mukonda tuala mu kithangana kia kuila o dizubhilu dia jithembu dia zukama kiá.

¹² Uila kiki, uoso ua di fika kuila uemana, a di lange phala ka di bhale.

¹³ O jitendasa jene mù kuiza kokuenu, jene jimoxi ni jala kulua na-ju akuenu oso. Maji o Nzambi-phe kizuelu kiê u ki kumbidila, kehela ku mi diangula kia tundu o nguzu ienu. Maji kioso kʼ iza o mudiangu, Nzambi u mi bhana nguzu phala mu tene kubhalakata, ni ditundilu dia kutena kubhita.

¹⁴ O ki tualʼ iki, akuetu, enu nga ni zola, o ubhezelu ua iteka lengenu-u.

¹⁵ Nga mi ambela kala mu jihete ja kutongolola o ima. Tongololenu-phe ki ngi zuela.

¹⁶ Etu tua sakidila Nzambi ua tu bhana o kopho ia mabesá. Manhi kioso ki tu kala mu kunua ku kopho iii, ki tua mu tambula ue mbandu ku manhinga ma Kristu? O kioso ki tu bukujula o mbolo anga tu kala mu kudia, manhi ki tua mu tambula uetu mbandu ku mukutu ua Kristu?

¹⁷ Némbe etu tua vulu, etu oso tu dia ku mbolo imoxi, iene imoxiʼ èlele. Kiene ue ki tua kexila tu mukutu umoxi ngó.

¹⁸ Xinganekenu hanji o muiji ua Jijudé: Oso akua kudia o ima iobhane mu jisata, manhi ka tokala ue mu kisangela mu Kultu ia kubheza Nzambi bhu kalatodio?

¹⁹ Mu kuzuela kiki, ngambe-phe kiebhi? Kuma o sata ia kiteka kima kia kidi, mba o kiteka kiene kima kia kidi?

²⁰ Ki kiene ki ngambe! Maji ngambe kuma imʼ oio iene mú sata o matumbu, a i satela madimonho, ka i satela Nzambi. Eme-phe ki ngi mi mesena mu kala mu kisangela ni madimonho.

²¹ Enu ki mu tena kunua mu kopho ia Ngana, ni mu kopho ia madimonho. Ki mu tena ue kudia ku meza ma Ngana ni ku meza ma madimonho.

²² Inga tua mesena kuila Ngana tu mu bhekela difuba? Enu mua xinganeka kuila etu kifua tua mu tundu mu kusuina?

²³ Sai athu a mu kuila, exi: Tu tena kubhanga kioso ki tuʼ andala. Kiauabhʼê! Maji ima ioso ki ia fuama. Tu tena kubhanga ioso i tua mesena, maji iene ioso ki ia iuka.

²⁴ Muthu ka sote kubhanduluka ngó muene, maji a sote ue o kubhanduluka kua akuâ.

²⁵ Ioso ia sumbisa bhu soki, diê-nu ngó, kana kuibhula kima mukonda dia kitongoluelu.

²⁶ Kuma a ki ambe mu Mikanda Ikôla, exi: Ixi ia ngene ia Ngana, ni nzungule jê.

²⁷ Se bhu kala muthu kua iá a kambe kuxikana, u ku ixana ku fesa, eie uala ni vondadi ia kuia, ioso-phe ia ku tudila, diâ ngó, kana kuibhula kima mukonda dia kitongoluelu.

²⁸ Maji se bhu kala muthu u kuambela, uixi: Kudiʼuku a tuamene ku ku bhana mu sata ia iteka, eie ku die-ku dingi, mukonda dia muene ua kuidikiza, ni mukonda ue dia kitongoluelu.—

²⁹ Ngambe kitongoluelu, kana o kié, maji kia mukuenu. Mbata sai ni bhabha bhu kala ni muthu uibhula, uixi: O ufolo uami phala-hi a u êlese ku kitongoluelu kia muthu uengi?

³⁰ Eme se nga sakidila Nzambi mukonda dia kudia ku ngi dia, phala-hi o kima ki nga di ni kusakidila Nzambi ki bhekela ku ngi longolola?

³¹ Uila kiki, kixi mu kudia, kixi mu kunua, mba mu kubhanga kima kiosokioso, iene ioso i kale ia kuximanesa Nzambi.

³² Kana kuta kifudisu mu njila ki tokala ki di bhalesa Jijudé, mba akua jixi jengi, mba o Ngeleja iene ia Nzambi.

³³ Bhangenu uila ki ngene mù bhanga eme-muène. Athu oso ngi sota ku a uabhesa miẋima mu ima ioso i ngi bhanga, kuma ki ngi bhindamena eme-muène ngó kubhanduluka, maji nginda ue ene oso a bhanduluke, phala nʼ a bhuluke.