I Kolindo 1 - O Mikanda Ikola

Umenekenu

¹ Eme Phaulu, a ngʼ ixana kukala Poxolo ia Jezú Kristu mu vondadi ia Nzambi. Nʼeme, ni phange ietu Sosetene,

² tua soneka o mukanda iú phala Ngeleja ia Nzambi iala mu Kolindo, kiene-phe, oso kiá a a kôlesa mua Kristu Jezú, a exana phala kukala mundu ua Nzambi. Mukanda iú uosoneke ue phala oso kiá akua kuhingila mu dijina dia Ngana ietu Jezú Kristu mu ididi ioso, Ngana iâ ene, Ngana ietu-etu.

³ Ku kale kiadi ku mualʼ oko, ni paze i tunda kua Nzambi, Tata ietu, ni kua Ngana Jezú Kristu.

O mabesá m ʼejiia kua Kristu

⁴ Eme ngene mù sakidila jinga Nzambi, mukonda dienu, mukonda dia kiadi kia Nzambi kia mi bhana mua Kristu Jezú.

⁵ Kuma mu kudituma kuenu ni Kristu, mu ima ioso mua tambula umonhi mua muène,—kixi mu ioso i mu zuela,

⁶ o umbangi ua Kristu kiene ki ua kuatela kiambote mudienu,

⁷ katé kana-ku dibesá di mua fulu o kutambula, kiosuʼiki mua mu kinga o kutukuluka kua Ngana ietu Jezú Kristu.

⁸ Muene uanda ku mi imika katé bhu bhuilu, phala ki mu kale ni kisemu mu kizuua kia Ngana ietu Jezú Kristu.

⁹ Nzambi uene fiiele, muéne ua mʼ ixana phala ni mu tena kuiza mu kisangela kia Monʼ ê Jezú Kristu, Ngana ietu.

O kudimuanga kua Ngeleja mu ibuka

¹⁰ Nga mi diondo-phe, jiphange, mu dijina dia Ngana ietu Jezú Kristu, kuila mu dʼivua jinga kiambote mu kuzuela, ki mu kale mu kudiuana-uana ku ibuka-ibuka mudienu. Inda mu kala kumoxi kiambote mudienu, mu kala ni kilunji kimoxi, mu fika kiene kimoxi.

¹¹ Kuma a ngi kundu-kiu, kioso ki muala kubhita, phange jami, kuala akua bhata dia Koloue, kuma sai-ku makuzoka mudienu.

¹² Nga ki ambela mukonda kala muthu mudienu ua mu zuela ni kiê. Sai-ku ni iú, uixi: Eme ngi mukua Phaulu; o iú uixi: Eme ngi mukua Apolo; o iú uixi: Eme ngi mukua Phetele; o iú uixi: Eme ngi mukua Kristu.

¹³ Kifua Kristu ua di muangununa ku jimbandu-jimbandu? Inga Phaulu a mu jibhile ku dikulusu bhu kididi kienu? Manhi enu a mi batizala mu dijina dia Phaulu?

¹⁴ Nga ki sakidila Nzambi, kuma eme ki ngi batizala athu mudienu; kale nga batizala-ku ngó Krispo ni Ngaio, kuabhu!

¹⁵ Mu kienʼiki phala kana muthu a ki zuele kuila enu nga mi batizala mu dijina diami.

¹⁶ (Ai-uê! Tatʼê! nga batizala ue Xitefana ni akua bhata diê. Maji ki ngejiia dingi muthu nga mu batizala).

¹⁷ Kuma Kristu ka ngi tumikisa mu kubatizala. Maji muène ua ngi tumu kukola o Njimbu iê Iambote, kana ku i kola ni kuzuela kua unjimu ua athu, mbebhu o dikulusu dia Kristu phala ki di biluke dia ngoho.

Kristu—muène o nguzu ni unjimu ua Nzambi

¹⁸ Kuma o maka ma kufua kua Kristu ku dikulusu, phala athu ala mu ku texika, kiedi kala uoua; maji phala etu-phe tuala mù bhuluka, ene o nguzu ia Nzambi.

¹⁹ Kuma a ki soneka mu Mikanda Ikôla, exi: Jinjimu, ngi buidisa o unjimu uâ; adimuka, o kudimuka kuâ ngi ku kitula kingoho.

²⁰ Mu kienʼ iki, o njimu iú kuebhi? Mba uatongoloka uebhi? O ṗhoxi ja kuzuela mu ngongo mumu, a suku bhebhi? Nzambi uene mù kuidikiza kuila o unjimu ua mu ngongo mumu ua di bhange uoua!

²¹ Kuma o Nzambi, mu unjimu uê, ua bhangesa kuila athu a lémbua ku mu ijiia Muène, mu kuijiia kua ene, maji kia mu uabhela kubhulula oso a xikana. O kienhiki, Nzambi ua ki bhangela mu uoua ua maka mê u tuala kutula.

²² Kuma o Jijudé ene kuila a bhinga isumua, Jingeleku a bhindamena kusota unjimu.

²³ Maji etu-phe tuala mù kola Kristu, muthu ua fuila ku dikulusu, kia bhingi o Njimbu iê phala Jijudé kima kia a xitisa mu thulu phala ió ki Jijudé exi uoua.

²⁴ Maji phala ene-phe oso a exana, kuala Nzambi, ni ku Jijudé, ni kua ió ki Jijudé, Kristu muène o nguzu ia Nzambi. Muène o unjimu ua Nzambi.

²⁵ Mukonda o iedi kala uoua ua Nzambi, ia somboka o kuijiia kuoso kua athu; o ioso iedi kala kubhuila kua Nzambi, ia tundu o nguzu ioso ia athu.

²⁶ Enu jiphange jami, kindalʼ iki xinganekenu hanji o ukalelu u mua kexile na-u kioso kia mʼ ixana Nzambi. Mu uijidilu ua mundu iú, athu kà vudile mudienu a kexile jinjimu, mba mazonda, mba anʼ a jingana mu izomba.

²⁷ Maji o Nzambi-phe ua soluʼê kiokio kia mu kuixana o mundu mu ngongʼ umu kuila uoua, phala kukuatesa na-kiu jisonhi ku athu oso ala jinjimu. Phala ue kukuatesa o jisonhi ku mazonda, Nzambi ua soloʼê kiokio athu mu ngongo kia mono kuila kubhuila.

²⁸ Nzambi ua soluʼê ima ia mu tobhesa o mundu mu ngongo mumu ni kuila exi, ia sebuluka, ki i te kima, phala a jikinise na-iu ioio ia mu kuila o mundu kuma iene ia beta o ujitu.

²⁹ Mu kienʼiki phala ki bhu kale muthu u ta thathe bhu pholo ia Nzambi.

³⁰ Maji enu-phe Nzambi muene ua mi ongeka kumoxi ni Kristu Jezú, a mu bhange kuala Nzambi kukala muene unjimu uetu. O mua Kristu muene mua tu ẋikinina Nzambi bhu pholo iê, ni ku tu bhanga tu mundu ua ngene ua Nzambi, iú ua tu bhulula.

³¹ Kala kiki, uila kia ki soneka mu Mikanda Ikôla, exi: Uoso uandala ku di thatha, a di thathele mu ima ioso i bhanga Ngana.