I Jisobha 9 - O Mikanda Ikola

Ngana u tukulukila Solomá lua kaiiadi

¹ Anga ki bhita-phe kuila, kia zubha Solomá kutunga inzo ia Ngana, ni inzo ia sobha, ni hânji ioso ia Solomá, ia mu kexile ku muẋima ku i bhanga,

² Jihova ua tukulukila dingi Solomá, kala kia mu tukulukilile bhu Ngibiione.

³ Anga Ngana u mu ambela, uixi: Musambu ué nga uivu, ni kioso ki ua dionda bhu pholo iami; nga kolêsa o inzo i ua tungu, kutula dijina diami katé ni ku hádia; kala kiki o mesu mami ni muẋima uami, kuene ku ua-ndu kala jinga izuua ioso.

⁴ Eie muene-phe se uenda jinga bhu pholo iami ni kivimba kia muẋima ni uthu ua tenena, kala kiendele tatʼenu Davidi, anga u bhanga jinga ima ioso i nga ku tumu, anga u bhaka itumu iami ni jiphangu jami,

⁵ eme ue nga ka kuatesa muene o kiandu kia ungana ué ku thandu dia Izalaiele ioso ni ku hádia ni hádia, kala ki nga tangele ku mbandu ia tatʼenu Davidi, ngixi: Ki kuà ku kamba diiala u xikama bhu kiandu kia Izalaiele.

⁶ Maji enu-phe ni anʼenu, se bhu kala kima ki mi sandula ko kuami, anga mu kamba kubhaka o ijila iami, ni i tumu iami, i nga diangele ku mi bhana, hé muia mu kubheza jinzambi jengi, ni kubhetama bhu pholo ia jinzambi jenhojo,

⁷ bhenhobho Izalaiele nga kà mu buidisa mu ixi i nga a bhana; anga o inzo iii i nga kôlesela dijina diami, nga kà i takula dikanga, o bhu pholo iami i tunda-bhu; anga Izalaiele ua kà xala mukuâ ni Sabhu, ua kà di bhanga môndo muʼaxaxi ka madiembu oso.

⁸ Anga o inzo iii, ia mu zangeleka kiosuʼiki, uoso ió ua kà bhitila-bhu, ua kà kakuka anga ua kà xika muixi, ni kudiuana, uixi: Ngana ua bangelaʼhi kiki ku ixi iii ni inzo iii?

⁹ Anga a kʼèla: Mukonda ene a xile Ngana dia Nzambi iâ, ió ua katuile o jitata jâ mu ixi ia Ijito, anga a di naminina ni jinzambi jengi, hé a bhetama bhu pholo ia jinzambi jenhojo, anga a ji bheza; kiene kia bhangesa Ngana ku bheka uíndua uoso iú ku thandu diâ.

O ikalakalu ia sukidila-ku ia Solomá

¹⁰ Anga ki bhita kuila, ku dizubilu dia makuinhʼaiadi a mivu kiene kia zubha Solomá kutunga jinzo jiiadi: o inzo ia Ngana ni inzo ia sobha muene.

¹¹ O jinzo jojo ja bhekelele Hilamu, sobha ia Tilo, kubhekela Solomá o miẋi ia misédulo ni ia faia, ni ulu, kala ki ia mu kexile ku hanji iê; bhenbhobho anga sobha Solomá u bhana kua Hilamu makuinhiʼaiadi a sanzala mu ixi ia Ngalileia.

¹² Anga Hilamu u tunda mu Tilo hé uiza mu tala jisanzala ja mu bhele Solomá, o kia ji di suí, ku mesu mê-phe ki ji mu uabhela.

¹³ Kia mu bhekesa ku mu zuelesa, uixi: Phangʼiami, tata, sanzala jaʼhi jiji ji ua ngi bhana? Anga a jʼixana, exi: Ixi ia Kabule, katé mu lelu.

¹⁴ O Hilamu muene, ua tumikisine kua sobha hama ni makuinʼaiadi a talendu ja ulu.

Solomá u bhinjika athu ku mu futa lubhaku

¹⁵ Ndònda iê bhua tundile Solomá kubhinjia athu ku mu futa lubhaku ienhiʼii: O kutunga inzo ia tembulu ia Ngana, inzo ié muene, ni Milo, ni kimbaka kia Jeluzaleme, ni kutunga ue Hasole, ni Mejido, ni Ngezele.

¹⁶ Mukonda Falaó, sobha ia Ijito, ua bandele anga u tolola sanzala ia Ngezele, anga u i oha mu túbhia, ni akua Kanana a tungile mu sanzala ua a jibha, iene anga u i bhana undote kua monʼê ua muhatu, uendele mu sakana ni Solomá.

¹⁷ Kienhiki Solomá hé u tunga Ngezele, ni Bete-holone, dia luiji,

¹⁸ ni Bahalate, ni Tademolo, mu kikangalakata kia ixi ioio,

¹⁹ ni jisanzala joso ja mata a kexile-nâ Solomá, ni sanzala ja makalu, ni ʼsanzala ja mala endela ku jikabalu, ni ioso ia kexi mu vondadi ia Solomã ku i tunga mu Jeluzaleme, ni mu Libano, ni ixi ioso ia utuminu uê.

²⁰ Mu kutanga o kifuxi kioso kia matumbu a subhukile ku akua Mamodi, ni akua Hiti, ni akua Peleze, ni akua Hivi, ni akua Jebu, ió ka tokalele mu muiji ua anʼa Izalaiele,

²¹ o anʼâ, a subhukile ia a a bhinganene mu ixi, ió muene a tokalele ku a buidisa ni ku a jima mbutu osololo kuala anʼa Izalaiale, Solomá ua a kitula abhika a ku mu futa lubhaku ni ku mu bhangela o ikalakalu ioso katé mu kizuua kia lelu.

²² Maji ku anʼa Izalaiele-phe. Solomá ka bhangele-ku né mubhika umoxi ngó; maji a kexile-phe malʼakua ita, ene akua mbèle iê, iene ilamba iê, ni ilôlo iê, ni atuminiʼê a makalu, ni mala mê endela jinga ku jikabalu.

²³ Ia ene makotʼa jitata a kexi mu bhangesa o kikalakalu kioso kia Solomá, anga a tena hama jitanu ni makuinhitanu, akua kutumina kifuxi kia mundu a kexi mu kalakala ku jinzo, ni ku ikalakalu ioso ia mukuá.

²⁴ Monʼa Falaó ua muhatu, hé u tunda mu sanzala ia Davidi u banda mʼonzo iê ia mu tungila Solomá; muene Solomá hé u tunga kiua Milo.

²⁵ Anga Solomá lutatu ku muvu u kala mu kubhakula jisata ja kuoha, ni jisata ja uembu ku kalatódio ka tungidile Ngana, ni kuoha uasu ua dizumba bhu pholo ia Jihova. Muene anga u zubha kienhiki o kikalakalu kioso kia inzo ia Jihova.

²⁶ Solomá anga u bhanga ue jinavio bhu Enzone-Ngabele bhua lulama ni Elote ku ndundu ia kalunga ka kusuka mu ixi ia Edomo.

²⁷ Anga navio jojo Hilamu u tuma ku ji endesa ku atabhudi, akua mbèle iê, ejidile kiambote o kuenda mu musanza ua kalunga, kumoxi ni akua mbèle ia Soloma.

²⁸ Anga ene eza ku Ofidi hé ambata-ku hama jiuana ni makuinhʼaiadi a talendu ja ulu, anga a ji bhekela sobha Solomá.