I Jisobha 8 - O Mikanda Ikola

Solomá u bokuesa o Álaka mu Tembulu

¹ Bhenhobho Solomá u tuma kubhongolola adiakimi a Izalaiele, ni Mítue ioso ia miji, o ilamba ia jitata, muʼaxaxi ka anʼa Izalaiele, a bhongolokela bhu pholo iê mu Jeluzaleme, nda a bandese mu tembulu o álaka ia kikutu kia Ngana, ia kexile mu sanzala ia Davidi, iexana Ziione.

² Anga mala oso a Izalaiele a bhongolokela kua sobha Solomá bhu kizuua kia fesa, ku mbeji ia Etanime, iene o mbeji ia kasambuadi.

³ Adiakimi oso a Izalaiele anga eza; o jinganga anga a zangula o álaka ia Ngana.

⁴ Anga a bheka álaka ia Ngana ku thandu, ni balaka ia kionge, kumoxi ni itutu ioso iòlumbe ia kexile mu balaka; kienhiki jinganga ni jilevita a banda na-iu ku thandu.

⁵ Anga sobha Solomá, ni kionge kioso kia Izalaiele, ki mu bhongolokela, emana oso ku pholo ia álaka, ni kusata jimbudi ni jingombe, ka tena ku ji tanga mukonda dia kuvula nè kuijiia ki ja soko.

⁶ Kienhiki kia bheka jinganga o álaka ia kikutu kia Ngana bhu kididi kiê, mu dibhezelu dia inzo ia ngana, mu kididi kikôla kinéne, bhoxi dia mabhabha ma jikelubini.

⁷ Mukonda o jikelubini mabhabha mâ maiadi a ma oleka ku thandu dia kididi kia álaka, anga jikelumbini ji vungina álaka ku thandu kumoxi ni mikambu iê.

⁸ O Mikambu mukonda dia kulebha kuê anga i somboloka kiavulu, o jisungu jê a ji mona jinga mu kididi kikôla ni mu dibhezelu; maji o ku kanga-phe ka kexi ku ji mona. Mikambu ienhiʼii ia xalela muenhomo katé mu kizuua kia lelu

⁹ Kana dingi kima kia kexile mu álaka, kale o mabaia aiadi ngó a matadi, a tele-mu Mozé bhu mbandu ia mulundu ua Holebe, kioso Ngana kia tele kikutu ni anʼa Izalaiele, mu kutunda kuâ mu ixi ia Ijito.

¹⁰ Anga ki bhita kuma, kia tubhuka o jinganga mu kididi kikôla, dituta dia Ngana dʼizalesa inzo ioso ia Jihova.

¹¹ Anga jinganga dituta dià fudisa kuimana mu kubhakula sata jâ, mbata o kizunda kia Nzambi kiezalesa inzo ioso ia Ngana.

O kulumbila o Tembulu

¹² Bhenhobho Solomá u zuela, uixi: Bhabha Ngana uambe kuma nangu dié di kala mu kitombe kiedi buí. Sumbala muene ua bhange o dikumbi ku diulu.

¹³ Ni kidi kiene, eme nga ku tungila inzo mʼu kala jinga, Kuma dibhata dia nangu dié dia kalelà-ku.

¹⁴ Bhenhobho u lungulula o pholo iê ku mundu uemana, anga u benzela kionge kioso kia Izalaiele; kuma o kionge kioso kia Izalaiele kiemanene.

¹⁵ Muene uixi: A tane-ku Jihova, Nzambi ia Izalaiele, ua zuelele ni dikanu diê kua tatʼetu Davidi, kʼi kia tenesena bhu lukuaku luê, uixi;

¹⁶ Tunde kizuua ki nga katula o kifuxi kiami kia Izalaiele mu Ijito, ki nga solo sanzala iengi mu miji ioso ia Izalaiele, ni ngi tunge-mu inzo mu ngi tumbika o dijina diami; maji nga solo-phe Davidi, nda a tumine o kifuxi kiami kia Izalaiele.

¹⁷ O tatʼetu Davidi ue, kia mu kexi ku muẋima ue kutungila inzo o dijina dia Jihova, o Nzambi ia Izalaiele.

¹⁸ Maji o Ngana-phe uambela tatʼetu Davidi uixi: Eie kuma kia ku kala ku muẋima ué kutungila o dijina diami inzo, kima kiambote ki ua bhange o ku ki kana ngó ku muẋima ué.

¹⁹ Inzo iii-phe kʼeie ua-ndu i tunga; maji ua kà tungila inzo o dijina diami, monʼé ua diiala, ua-nda kutunda ku miongo ié.

²⁰ Ngana kienhiki ua tenesa o kizuelu kiê kia tangele; mukonda eme nga balumuka bhu kididi kia tatʼetu Davidi, eme nga xikama ku kiandu kia Izalaiele, kala kia ki tange Ngana; o dijina dia Ngana, Nzambi ia Izalaiele eme nga di tungila inzo.

²¹ Monżʼomo eme nga bhange-mu kididi kia álaka, muala o kikutu kia bhangele Ngana ni jitata jʼetu, kioso kia a katula mu ixi ia Ijito.

Solomá u sambela Nzambi

²² Anga Solomá uimana ku pholo ia kalatódio ka Jihova, ku pholo ia kionge kioso kia Izalaiele, anga u leka o maku mê ku diulu,

²³ Uixi: Eie u Ngana, Nzambi ia Izalaiele, kana-ku Nzambi kala eie, né bhulu ku maúlu mba mu ngongo bhoxi, eie u bhakela abhikʼé o kikutu ni mbote, oso enda ni muẋima ua kidi bhu pholo ié.

²⁴ Ua tenesa kioso ki ua tangelele tatʼetu Davidi ngunza ié; mukonda ua ki zuelele ni dikanu dié eie, ua ki tenesa ni lukuaku lué, kala ki kia moneka mu kizuua kiki kia lelu.

²⁵ O kiki-phe, eie u Ngana Nzambi ia Izalaiele, ngunza ié, tatʼetu Davidi, mu bhange kioso ki ua mu tangelele, uixi: Eie hádia ku kambe kabhinganu ku pholo iami, u xikama ku kiandu kia Izalaiele; kima kia kate ngó, o anʼé ku kuata mu njila ié-eie, nda ende jinge bhu pholo iami, kalʼeie ki uendela jinga pholo iami.

²⁶ Kiki ue, eie u Nzambi ia Izalaiele, kizuelu kié ki tenene, ki ua tangelele tatʼetu, ngunza ié Davidi.

²⁷ Maji, ku kidi-phe, Nzambi mbé u tunga mu ngongo? Eie ua lembela maúlu, ni diulu dia maúlu, ku tena kusoka-ku, kuambe dingi o inzo iii i nga ku tungila eme!

²⁸ Sakukila-phe Ngana, o musambu ua mu samba mubhikʼé, ni kudionda kuê, eie u Jihova, Nzambi iami, nda uívue o kudikola ni musambu uala kubhanga lelu mubhikʼé bhu pholo ié.

²⁹ Phala o mesu mé Ngana, a tone jinge muene ku inzo iii usuku ni muanha, ajikukile ku kididi kiki, ki ua tangele, uixi: Dijina diami muene mu dia kà kala jinga; phala kuívua jinga o musambu u ku sambela mubhikʼé mu kididi kiki.

³⁰ Ivua-phe o kudionda kua mubhikʼé, ni kua kifuxi kié kia Izalaiele, kioso ene kia ku sambela mu kididi kiki, eie ívua ue bhu kididi kié ku diulu ku ua tunga; uívua-phe, anga u loloka.

³¹ Muthu kioso kia ta kituxi kua mukuá, anga a mu tesa mulôko ua ku mulokesa ku thandu dia kituxi kié kia te, mulôko anga uiza ku pholo ia kalatódio ké mʼonzo mumu.

³² Eie-phe ku maúluʼoko ívua, u bhange kia fuama, u fundise abhikʼé ni kubelesa uoso ua tondala, mbé ku mu vutuila o ibhangelu iê ku mútue uê, ni ku lungisa uoso ua iuka, mbé ku mu bhanga kioso kia tokala mu kuiuka kuê.

³³ Kioso kia kuama o kifuxi kié kia Izalaiele ene anga a lenga ku pholo ia nguma jâ, mukonda a ku tela kituxi, anga ene a diela o kituxi kiâ ko kué, anga a ximana o dijina dié, ni kusamba ni ku kudionda eie mʼonzo mumu,

³⁴ eie-phe ku maúluʼoko ívua, u loloke o kituxi kia kifuxi kié kia Izalaiele, phala Izalaiele u mu bheke dingi ku ixi i ua bhana o jitata jâ.

³⁵ Kioso o diulu ki di jika, anga mvula i kamba kunoka, mukonda ene a ku tela kituxi, ene anga eza kusamba mu kididi kiki, ni kuximana o dijina dié, anga a diela ku ituxi iâ, kia mona kuila eie ua a tatesa,

³⁶ eie-phe ku mauluʼoko ivua, phala u loloke o kituxi kia abhikʼé ni kia kifuxi kia Izalaiele, ni ku a longesa o njila iambote, mua fuama o kuendela, nda u bhane mvula mu ixi ié i ua bhana o kifuxi kié mu undundu.

³⁷ Kioso mu ngongo ki mu iza nzala, kioso ki mu iza dibhebhu, kioso ki mu kala kiaúla kia idima, kioso ki mu iza ngulele mba kihoho ni kabótua, kioso o nguma iâ kia a batuila bhu mabhitu ma ixi iâ, mba kukala dibhebhu dioso-dioso mba uhaxi uoso-uoso.

³⁸ Musambu uoso, ni kudionda kuoso, kubhana muthu uoso-uoso mu kifuxi kié kioso kia Izalaiele, muthu ni muthu kia zubha ku di tongolola o kuiibha kua muẋima uê, anga u sunununa o maku mê ku inzo iii,

³⁹ eie-phe ivua ku mauluʼoko, ku ua xikama mu kibuta kié, anga u loloka, hé u bhanga kioso kia fuama anga muthu ni muthu u mu bhana kioso kia tokala o jinjila jê joso, oko eie ua ejiia o mixima mukonda eie, eie ngó uejiia o mixima ioso ia anʼathu.

⁴⁰ Ene nda a ku kuatele uoma, izuua ioso i a kala ni muenhu, mu ixi i ua bhana o jitata jâ.

⁴¹ Anga uívua ue o ngenji, ka tokala mu kifuxi kié kia Izalaiele, maji ua tundu-phe ku jixi ja makangʼèlele, mukonda dia henda ia dijina dié ia mu bheka.

⁴² (Mukonda hádia a kʼevua kutumbula o dijina dié dionéne, ni lukuaku kué lua nguzu, ni lukuaku lué lua sununuka), anga eza mu sambela kualela inzo iii,

⁴³ eie-phe ívua ku maúluʼoko, ku ua tunga, anga u bhanga ioso ia ku bhingi o ngenji, sembele madiembu oso mu ngongo ejiie o dijina dié, nda a ku kuatele uoma kala o kifuxi kié kia Izalaiele, anga ejiia kuila o dijina dié ene ku di tumbuila ku inzo iii i nga tungu.

⁴⁴ Kioso kiia o kifuxi kié mu ita, mu kúlua ni nguma iâ, mu njila i ua a tumikisina, ene anga a sambela Ngana, ni ku lungila pholo ku sanzala iii i ua tungula, ni ku inzo iii i nga tungila o dijina dié,

⁴⁵ eie-phe ku mauluʼoko ivua o musambu uâ ni kudionda kuâ, phala u a bhange kioso kia iuka.

⁴⁶ Kioso ene kia ku tela kituxi (mbata kana-ku muthu u kamba kuta kituxi) eie anga u a luualela, hé u a bhana bhu maku ma nguma, nda a ambate ku ubhika ku ixi ia nguma kuala ió a a kutu, kixi ixi ia dikanga mba bhua zukama;

⁴⁷ ene anga ku ixi kua ambata ku ubhika a sunga kilunji, anga a diela, hé mu ixi ia ubhika uâ a ku dionda, exi: Tua te kituxi, tu akua kikuma, tua bhange ufusa;

⁴⁸ anga kuenhoko a diela ko kué ni muẋima uâ uoso ni muenhu uâ uoso, o mu ixi ia jinguma jâ ja ambata ku ubhika, anga a ku sambela eie ni kulungila o pholo ku ixi i ua bhele o jitata jâ, ni ku sanzala iii i ua tungula, ni ku inzo iii i nga tungila o dijina dié,

⁴⁹ eie-phe ku mauluʼoko ku kididi kié ku ua tunga, ivua o musambhu uâ, ni kudionda kuâ, nda ua bhange kioso kia iuka;

⁵⁰ anga u loloka o kifuxi kié, kia ku tela o kituxi, ni kubhuma kuâ kuoso kua ku bhumina na-ku, anga eie u a bhanga henda bhu pholo ia ió ala ku a bhikisa, ene ue sembele a a kuatele henda.

⁵¹ Mukonda Izalaiele ene o kifuxi kié ni undundu ué u ua katula mu ixi ia Ijito, muʼaxaxi ka dijiku dia utadi ua felu.

⁵² Nda o mesu mé ma jikukile o kudionda kua mubhikʼé ni kudionda kua kifuxi kié kia Izalaiele, sembele u a evue mu ima ioso i a ku di kolela.

⁵³ Mbata eie ua tungula mu madiembu moso mu ngongo, nda a kale undundu ué, kala ki ua tangele mu ukunji ua ngunza ié Mozé, kumbi di ua katula o jitata jetu mu Ijito, Ngana Jihova, tata!

Solomá u benzela kifuxi

⁵⁴ Anga ki bhita-phe kuma, Solomá kia zubha kubhanga o musambu uoso iú ni kudionda kuoso kuku, hanji ku jiphuna kuala ni maku ma leka ku diulu, u fundumuka ku pholo ia kalatódio ka Ngana,

⁵⁵ anga uimana, hé u benzela o kionge kioso kia Izalaiele ni dízui dia suína, uixi:

⁵⁶ Jihova a taneku, ua nhohesa o kifuxi kié kia Izalaiele kala kioso kia tangele, ku izuelu ioso iambote ia zuelele mu ukunji ua ngunza iê, Mozé, ki bhua sonoka né ngó kimoxi.

⁵⁷ O Ngana dia Nzambi ietu a kale ni etu, kala kia kexile ni ji-tata jetu; ka tuehelele, kana, ka tu xe.

⁵⁸ Inda o mixima ietu a i bheke dingi ko kuê, nda tuende mu njila jê joso, ni kubhaka o ijila iê ioso, ni itumu iê, ni ioso dingi i mu uabhela, ia tumine ku jitata jetu.

⁵⁹ Ni kuila o maka mami iá u nga dionda na-u bhu pholo ia Ngana, ma kale jinge bhu pholo ia Ngana Nzambi ietu, usuku ni muanha, muene nda a bhange kia uabhela mubhikʼé ni kia uabhela o kifuxi kiê kia Izalaiele, kizuua ni kizuua.

⁶⁰ Sembele o madiembu oso mu ngongo ejiie kuma Jihova muene ngó Nzambi, kana-ku dingi uengi.

⁶¹ Enu-phe muẋima uenu u tenene mu kudituma ni Jihova Nzambi ietu, nda muendele mu itumu iê, ni mu bhake o ijila iê kala lelu ki mua mu bhangʼiki.

⁶² Bhenhobho sobha ni Izalaiele ioso a bhakula jisata ja kuluulula bhu pholo ia Ngana.

⁶³ Solomá ioso ia satela Ngana anga u i bhakula mu sata ia kutululuka, makuinhiʼaiadi a midi ni midid jiiadi ja ngombe ni hamʼa midi ni makuihʼaiadi a midi ia mbudi; kienhiki sobha ni ana oso a Izalaiele kia lumbila o inzo ia Jihova.

⁶⁴ Kizuua kieneʼokio sobha ua zelesa mʼoxi dia lumbu lua kexile ku pholo ia inzo ia Ngana; mbata muuene mua bhangelele jisata ja kuoha ni maujitu ni maji ma jisata ja uembu; mukonda o kalatódio ka ngòndo ka kexile bhu pholo ia Ngana, ka tolele kiavulu kuila kusoka jisata joso ja kuoha, ni mibhaku ia mákudia, ni maji ma jisata ja uembu.

⁶⁵ Mu kithangana kiene kimoxi, Solomá u bhitisa ue dingi o fesa ia jifundu, ni muene ni Izalaiele ioso, kionge kia dikota, bhu pholo ia Jihova, Nzambi ietu, athu a tunda bhu Hamate hé a bhixila ku ngiji ia Ijito; o fesa hé a i bhanga mu sambuadi dia izuua, ki kua di te dingi o sambuadi dia izuua ia dianga, kia bhange kuinhi dia izuua nʼiuana.

⁶⁶ Anga mu kizuua kia kanake a sulula kifuxi, ene anga a benzela sobha; aia kiua ku jifundu jâ, a sanguluka ni mixima ia tana, mukonda dia mbote ioso ia bhangele Ngana kua ngunza iê Davidi, ni ku kifuxi kiê kia Izalaiele.