I Jisobha 7 - O Mikanda Ikola

Solomá utunga o dizemba diê

¹ Solomá hé utunga ue o dizemba die, anga ubhanga kuinhi dia mivu ni mivu itatu phala kudizubha.

² Ua tungu ue o inzo ia Muxitu ua Libano; ikala ni hama ia kóvado mu kulebha, o mu kuzanza makuinhi atanu a kóvadu, ni makuinhi atatu a kóvadu mu kitala. Inzo ienhiʼii ua i tungu ku mikalatata iuana ia jiphiladi ja muxi ua sédulu, ni mikambu ué ia jiphiladi ia muxi ua sédulu.

³ O mu maxilu a inzo ioso, bhulu diê, bhu mukambu, ua folala-bhu ni mabaia a muxi ua musédulu, o inzo ioso ia xikama ku thandu dia makuinhi auana a jiphiladi ni kitanu jala ku mikalakatata itatu, o mukalatata umoxi uambata kuinhi dia jiphiladi ni kitanu.

⁴ O jinjanena ue ja kexile ku minôno itatu; anga ji di lulama kala njanena imoxi idilunga ni njanena iamukua, mu jitatu-jitatu.

⁵ O mabhitu moso ni jiphidika jê, mu ku a tala ku mesu, asokelela kiambote mu jikuadro. O jinjanena-phe imoxi i di lulama ni iamukuá, ku misanga ia jitatu-jitatu.

⁶ Anga u iudika mbalanda iate ku jiphiladi ja makuinhi atanu a kóvadu mu kulebha ni makuinhi atatu a kóvadu mu kuzanza; o mbalanda anga ikexila ku pholo ni jiphiladi jê ni imikambu iê ia makota ku pholo kuene.

⁷ Ua tungu ue onzo ia Kiandu mua kexile kufundixila o milonga, o inzo ia Kibhuna kia Difundixilu, anga u i folala ni mabaia a musédulu tunde bhoxi bhua kudiota ni inama katé bhulu bhu mukambu.

⁸ O inzo iê-muène ia kukala, ua i tungu kuema dia iii ia Kiandu, mu lumbu luengi, maji o ukalakalelu ue, ua i kalakala, uene umoxi ni iii. Phala monʼa Falaó a mu sakana kuala Solomá, uatumu ku mu tungila ue o inzo iadifuangana ni iii ia Kiandu.

⁹ O jinzo joso jenhiji a ji tungu ni matadi ate kiavulu muene, kuma matadi a kubatula mu midila, asokelela kiambote, a kuselala ni sela ni moxi ni ku kanga. Enhá-phe ene a tungu na-u tunde bhoxi ku madisesa katé bhulu ku mikambu, o ku kanga kunu, ene a tungu na-u katé ku lumbu lua dikota.

¹⁰ O madisesa mê a ma tele a matadi ue a fina, matadi a makota, imatadi ia kuinhi dia kóvadu mba dinake dia kóvadu.

¹¹ O ku thandu dia iá kuene kua tungu ni matadi amukuá a fina, a te kiavulu a a batula kiambote mu midila iê, kumoxi ni mikambu ia muxi ua sédulu.

¹² O lumbu lua dikota lua kanga lua kondoloka, lua kexi lua mikalatata itatu ia matadi òkalakale kiambote, ni mukalatata umoxi ua mikambu ia sédulu. Kiene ue kimoxi ni lumbu lua moxi lua inzo ia Jihova ni kitélembe kia inzo ienhoio.

O kikalakalu kia sobha Hilamu ku Tembulu

¹³ Kia bhiti kiki, Solomá uatumu jiphunga ku Tilo, mu kuixana Hilamu, diiala uejidile ufunu ua kuzunza utadi ua ngòndo phala kukalakala na-iu ima ioso ia fuama,

¹⁴ muenhú monʼa mutudi ua muhetu ua tokala ku muiji ua Nafitali, o tatʼâ ua kexe mukua Tilo. Hilamu muenhú anga Ngana u mu bhana o uhete ni kuijiia ni kutetuluka kua kuzunza o utadi ua ngòndo ni kukalakala na-iu o imbamba ioso iatokala, muenhú ueza kua sobha Solomá, hé u mu bhangela o kikalakalu kia bhindamenene.

¹⁵ Mbata ua mu bhangela jiphiladi jiiadi ja kobidi, o kitala ngó kia philadi imoxi kia kuinhi dia kóvadu ni nake; o mukolo ua kuinhi dia kóvadu ni kiiadi uene ukondoloka o philadi imoxi bhu kubumba kuê.

¹⁶ Uazunza ue jikapitele jiiadi ja kobidi phala kutula ku thandu dia jiphiladi jiiadi jojo; kapitele imoxi ngó ku i zonga iambata kóvadu jitanu mu kitala, o kapitele iamukuá ue ia kóvadu jitanu mu kitala.

¹⁷ Uazunza ue ima iedi kala uanda phala kufuta na-iu o jikapitele ja tula ku mítue ia jiphiladi ni mikolo iê ia utadi ua kuxisa; manda iá a kala sambuadi phala kapitele kamoxi, sambuadi phala o kapitele ka mukua.

¹⁸ Kienhiki kia bhange o jiphiladi, iu uate o mikalatata iiadi ia jilomá mu jimbandu ja uanda phala kukembesa o mítue ia jiphiladi kuala o jikapitele ja vungina-ku.

¹⁹ O jikapitele jala kuthanduʼa mítue ia jiphiladi, ja mbalanda, ja kexile ni kidifua kia itulu ia jihonga, anga jikala ni kitala kia kóvadu jiuana.

²⁰ O jikapitele ja kexile ku sungu ia jiphiladi jiiadi, ja kexile ku pholo kiki ji ja tundu mu akuá ku thandu dia uanda ua utadi, a tele mikalatata ia hama jiiadi ja jilomá ja kondoloka mu jimbandu.

²¹ Hilamu muene uemika o jiphiladi jiiadi ja mbalanda ia Tembulu; o kiemika o philadi ia mbandu ia kadilu, ua i luku dijina dia Jakí; o kiemika o philadi ia mbandu ia kakiasu, ua i luku díjina dia Bouaji mba Bouaze.

²² O bhulu ku jisungu kua sukila o jiphiladiʼoko, ua seta-ku itulu ia jilírio. Mu kubhanga kiki, o kikalakalu kia jiphiladi a ki zubha ku ki bhanga.

O musanza ua utadi ua kuzunza

²³ Hilamu ua bhange ue ni musanza ua kalunga ua utadi ua kuzunza ua ngòndo; mu ku u zonga tundé disámbua didi katé disámbua diná, bhu tena kuinhi dia kóvado; o kikexilu kie kia kizengetenha kia kikondoluesa; mu kitala ua tena kóvadu jitanu; o kubhitisa mukolo anga u kondoloka o musanza uoso bhu luhata luê, mukolo iú mu ku u zonga u tena makuinhi atatu a kóvado.

²⁴ O bhoxi dia mizumbu iê a seta-bhu ibundu iedi kala jimbotá ia kondoloka mu jimbandu, kóvado imoxi ikala dikuinhi; anga i kala mikalatata iiadi ia ufunu ua kuzunza, kuma a i zunzila kumoxi kioso kia iudika o musanza ua kalunga, anga ikala iene imoxi ni musanza.

²⁵ Musanza anga a u xikika ku thandu dia kuinhi dia ngombe ni kiiadi, ja di uane kiki; Jitatu ja talela jipholo ku suku, jitatu ja talela ku mutudila-kumbi, jitatu ja talela ku Sulu, o jitatu ja talela ku mubhetukila-kumbi. O musanza ua kalunga anga u kuatenena ku thandu dià; o jimbunda joso ja jingombe ja talela moxi dia musanza, jʼosueke koxiʼa musanza.

²⁶ O mukômo uê ua kanda dia lukuaku, o ku mizumbu iê a kalakalaku kala ku mizumbu ia kopho, mba kikala o kitulu kia lírio. O musanza uenhú ku u izalesa ni menha, ki bhinga uambata menha a itabhu ia midi jiiadi ja jibatu.

O ima ia mukuá ia Tembulu

²⁷ Uazunza ue dikuinhi dia maxikikilu a utadi ua ngòndo, dixikikilu dimoxi o kulebha kuê ngó kua kóvado, o kuzanza kuê kua kóvado jiiuana ué, o mu kitala kóvado jitatu.

²⁸ O maxikikilu enhá a a kalakala kiki: A kexile ima ia a kondoloka kala ji-phonda jazuata, o jiphondʼiji anga jikala bhu kaẋi ka jimoldura jiiadi, iii bhu-lu o iamukuá bhoxi.

²⁹ O ku thanduʼa jiphonda ja kexile bhu kaẋi ka jimoldura aseta-ku jihoji, ni jingombe, ni jixelube; o ku jimoldura ja bhitile bhulu ni bhoxi dia jihoji ni jingombe aseta-ku tuisasa tuedi kala dilènge dia jinzenzela.

³⁰ Maxikikilu enhá akexile ni malola auana-auana a utadi ua ngòndo ni mikambu iê ia utadi ua ngòndo. O bhu thungi jiuana ja maxikikilu enhá bhua kexile ixamenenu ia utadi ua kuzunza ikala koxi dia mbasinha bhua sukila o jinzenzela.

³¹ O kua suila o jiphiladi mu kaẋi kê mua kexile ni dilonga dia menhʼa pholo diala ni kóvado mu kitala; dia kexile kikondoluesa anga bhu luhata luê di kala ni kóvado ni kaxaxe, a di kembesa ni ku di seta ima ia ndumba. O maxikikilu ma dilonga dienhidi asokelele ni jiquadro, ka kexile kikondoluesa, kana.

³² O bhoxi diê bhene bhuala o malola auana, abhingile kuila o mikambu iê ia kuatenena bhu kixina kiê bhene. O dilola dimoxi kitala kiê kia kóvado ni kaxaxe.

³³ A a iudika ni ufunu kala ua malola a dikalu ene. O mikambu ia malola enhá, ni jikamba jê, ni jikubu jê, ni jilaiu jê, ima ioso ienhiʼiii ia kuzunza.

³⁴ O bhu jithungi jiuana ja kinama kiê, bhua kexile ifikidilu iuana ia kuatenena ku kinama kuene anga i di bhanga muxixi umoxi.

³⁵ O bhulu dia kixina ni kixina bhua kexi dikoloua dia kitala kia kaxaxe ka kóvado; ifikidilu iê ioso ia ku thandu ia kuata o jimoldula iene ioso ia kexile ni kixina kimoxi.

³⁶ O ku thandu dia ifikidilu ienhiʼii ni ku mikambu iê ua kembesa-ku ni kuseta-ku jixelube, ni jihoji, ni isálale ia maie, ni jinzenzela mu ididi ioso ia xala ngó mu jimbandu joso.

³⁷ Anga u bhanga kienhiki kuinhi dia maxikikilu; ene oso-phe o usudilu uê uene umoxi, o kubumba kuê kuene kumoxi, usokekelu uê uene umoxi.

³⁸ Anga u bhanga ue kuinhi dia malongʼa menhʼa pholo, ene oso a utadi ua ngòndo; dilonga dimoxi ku di izalesa ni menha diambata makuinhi auana a batu. O dilonga dimoxi ngó ku di zonga diambata kóvado jiuana, anga a di tula ku thandu dia dixikikilu dimoxi; maxikikilu oso kiene, dikuinhi dioso.

³⁹ Hé u tula maxikikilu atanu ku mbandu ia kadilu ia inzo, ni maxikikilu atanu a mukuá ku mbandu ia kakiasu ia inzo.

⁴⁰ Kia zubha kubhanga ima ioso iii, Hilamu ubhanga dingi o jímbia ja makota ni jipá ni malonga a menha a pholo. Kienhiki Hilamu ua zubha kubhanga o kikalakalu kioso kia mu tumu sobha Solomá phala o inzo ia Jihova.

⁴¹ O ima ioso ia zubha kubhanga ienhiʼii: O philadi jiiadi, o makende aiadi a tudikile ku jikapitele bhulu ku thandu dia jiphiladi jiiadiʼojo; ni manda aiadi a kufuta na-u o makende aiadi ió a tudikile ku sungu ia jikapitele ja kexile ku thandu dia jiphiladi jiiadiʼojo.

⁴² Ni hama jiiuana ja jilomá phala o manda aiadi enhó, kifua mikalatata iiadi ia jilomá uanda umoxi, o mikalatata iiadi ia mukuá o uanda ua mukua, mbé kuvungina o makende aiadi ala ku jikapitele ja tudika bhulu ku sungu ia jiphiladi.

⁴³ Ni kuinhi dia maxikikilu kua tudika o dikuinhi dia malonga a menhʼa pholo.

⁴⁴ Ni musanza ua kalunga uòiudike ku thandu dia kuinhi dia ngombe ni kiiadi ja mu kalela bhoxi diê.

⁴⁵ Ni jímbia ja makota ni jipá, ni malonga a menhʼa pholo ni ingolongondo ioso kiá Hilamu ia bhange phala sobha Solomá, mbé o inzo ia Jihova. Ima ioso ienhiʼii ua i bhange ia utadi ua ngondo ia kenzuluka kiambote.

⁴⁶ Mu dinhana dia honga ia Njolodá, mu mavu a utuma, muene sobha mua i zunzila jinga, mu kuila o kuku Sukote o kuku Zeledata, bhu kaẋi kâ.

⁴⁷ O ima ioso ienhiʼii mukonda dia kuvula kuê ku ia vudile, Solomá ka tenene dingi ku i pezala phala ku i tala o kunema kuê, mbé nʼejiia se o ngòndo ioso kunema kuê kua soko kiebhi.

⁴⁸ Solomá anga u bhanga ue dingi o itutu ia tokalele mu Kididi Kikôla kia inzo ia Jihova: o Kalatódio ka ulu ni meza a ulu kua kuenda ni kutula jinga o jimbolo ja kutela;

⁴⁹ ni matundilu a jikandeia a ulu ua fina kinéne, atanu ku kadilu atanu ku kiasu, ku pholo ia Kididi Kikôla kinéne; ni itulu, ni tundeia, ni itokelu iê ia ulu ua beta kuiuka.

⁵⁰ Ni jikopho, ni ijiminu, ni malonga a menha a pholo ni itutu phala o uasu ua dizumba, ni iomuenu ia makala, iene ioso ia ulu ua beta kuiuka; ni jidobaladisa ja mabhitu a kubokuena mu Xilu Dikola kinéne, ni mabhitu a kubokuena mu Kididi Kikôla kia Tembulu, ene oso a ulu ua uabha kiavulu.

⁵¹ Kienhiki Solomá kia zubha o kikalakalu kioso kia bhange mu kutunga o Tembulu ia Ngana. Anga u tuma kiua kuila a mu bhekele o ima ioso tatʼâ Davidi ia lumbile kua Jihova, ni ia phalata, ni ia ulu, ni itutu ioso muene, hé u i tula mu mabhakelu a jimbongo joso ja Tembulu ia Jihova.