I Jisobha 6 - O Mikanda Ikola

Solomá utunga o Tembulu

¹ Anga andeka o kutunga o Tembulu mu muvu ua hama jiuana ni makuinhi nake, hanji kia tunda anʼa Izalaiele mu Ijitu, uene o muvu ua kauana ua Solomá kutumina Izalaiele, mu mbeji ia Zive, muene muandeka kutunga o inzo ia Ngana.

² O inzo ia Sobha Solomá iatungila Jihova, iakexile ni makuinhi asamanu a kóvadu bhu mulebhelela, makuinhi aiadi bhu kuzanza, ni makuinhi atatu mu kitala.

³ O mbalanda ia inzo bhu muelu ua Tembulu, mu ku i zonga iatenene makuinhi aiadi a kóvado kala kiala o kuzanza kua Tembulu, o kuzanza kuê, iakexile ni kuinhi dia kóvado mu kudisunga dingi ku pholo ia Tembulu.

⁴ O ku Tembulu sobha iu uate-ku jinjanena ja kembesa ni tumiẋi tua bhidijika kiambote.

⁵ Mu jimbandu joso ja Tembulu ua tungisa-mu maxilu ku matala-matala, a naminina ku mutôto ua tembulu ku kanga, ia a kondoloka o Tembulu ioso ni dibhezelu mu jimbandu jê.

⁶ O dixilu dia ditala dia bhoxi dia kexi ni kóvado jitanu mu kuzanza, o dia bhu kaẋi dia kexi ni kóvado jisamanu mu kuzanza, o dia katatu dia suku bhu-lu dia kexi ni sambuadi dia kóvadu mu kuzanza, mukonda o ku mbandu ia kanga kunu, a tungile-ku maxamenenu a kondoloka o tembulu mu kuata o mikambu, phala o mikambu ki i bhinge ku i bokuesa mu mutôto.

⁷ O mu kutunga o tembulu, matadi a dianga jinga ku a iudikila kiambote kua tundu, o kioso kieza na-u kiene ue kia a te ku inzo ia Jihova; kala kiki, kioso kia kexi mu kutunga kʼevua jingaku kuṗhoṗha kua malutelu mba kukoka kua dikuua mba kubeta dingi ni felu ioso-ioso.

⁸ O dibhitu dia ditala dia bhu kaẋi dia kexile ku mbandu ia kadilu ia inzu. A bandela jinga ku masumbatu a kihole phala kuia bhu ditala dia bhu kaẋi ni bhu ditala dia katatu dia bhulu.

⁹ Kienhiki Solomá kia tungu o inzo, iu ua i zubha kiambote ni ku i kembesa dingi moxi ni mabaia a miẋi ia musédulu.

¹⁰ O maxilu a matala a tungu mu jimbandu joso ja tembulu, adileka dingi. Kóvadu jitanu bhulu, ene oso iu ua a naminisa ku tembulu ni mikambu ia makota ia miẋi ia misédulu.

¹¹ Bhenhobho o kizuelu kia Jihova kiza kua Solomá, kuila:

¹² Eie-phe, ku inzo i ua mu tungiʼii, se uenda kiambote mu jingonge jami, o ima hé uenda ni ku i bhanga kiambote mu mabatuilu mami, anga uaiuka jinga o ijila iami ioso, ni ukala mu kuendela-mu, eme ue kokué ngi kumbidila o kizuelu kiami, ki nga zuela tatʼenu Davidi.

¹³ Nga kà tunga muʼaxaxe ka anʼa Izalaiele, o mundu uami ua Izalaiele ki nga kà xikina dingi ku ehelela, lémbua.

O kididi kikôla kinéne

¹⁴ Kienhiki Solomá uzubha kutunga o tembulu hé u i iudika kiambote.

¹⁵ O ku mutôto uoso mʼonzo uaiudika-ku kiambote ni mabaia a musédelu; mʼoxi dioso tunde bhoxi katé bhu hongo bhulu, uaiudika-bhu kiambote ni mabaia a misédeulu; o mʼonzo, bhoxi dioso, uakembesa-bhu ni mabaia a muxi ua faia.

¹⁶ O moxi ku hota kua suku o inzo uatungu-ku dingi ni mabaia a muxi ua sédulu, dixilu dia makuinhi aiadi a kóvadu dia folala kiambote ni mabaia a sédulu tunde bhoxi katé bhulu; dixilu didi diene dia bhange o dibhezelu mba o Kididi kikôla kinéne.

¹⁷ O Tembulu ioso moxi, mu, ku i zonga, ia kexile ni makuinhi auana a kóvadu.

¹⁸ Inzo ioso ia tembulu o ku i tala moxi, iófolale ioso ni mabaia a muxi ua sédulu, o ku mabaia a seta-ku itulu iadijika hanji ni iii ia jikuka kiá kiambote; ni bhoxi ni mu jimbandu joso u mona ngó mabaia a sédulu afolala-ku; kumono-ko ditadi.

¹⁹ Solomá uatungu o dixilu dia dibhezelu, koko kuhotʼoko, kuasuku o tembulu phala kutula-mu o álaka ia kikutu kia Jihova.

²⁰ O dibhezelu dienhidi, moẋiʼa tembulu, dia kexile ni makuinhi aiadi a kóvado mu kulebha ni makuinhi aiadi a kóvadu mu kuzanza ni makuinhi aiadi, mu kitala. Anga u di xiia ni ulu uoso uakenzuluka kiambote; o kalatódio ua ka kembesa kiambote ni mabaia a muxi ua sédelu.

²¹ Solomá anga inzo ioso, mu ku i kembesa, u i xiia ulu uoso moxi, ulu uakenzuluka kiambote, o ku pholo ia kalatódio utaku véu ia nhenga ku malubhambu a ulu, o véu u i folala ni ulu uoso ua fina.

²² Inzo ioso anga u i xiia kienhiki ni ulu ua fina katé inzo ioso kiiabhu; ni kalatódio koso ue ka kexile ku pholo ia dibhezelu, ua ka xiia ni ulu ua fina.

O jixelube jiiadi

²³ O moxiʼa dibhezelu uatula-mu jixelube ji iadi ja iudika ni mabaia a muxi ua mudiva; o jixelube jiji, kitala kiê kia kuinhi dia kóvadu.

²⁴ O dibhabha ngó dimoxi dia xelube mu kudizonga di kala ni kóvadu jitanu, o dibhabha dia mukuá ue kóvadu jitanu; kala kiki, tunde bhua tundu o dibhabha didi katé bhua suku o dibhabha dia mukuá dia xelube, mu kuzonga-bhu bhu tena kuinhi dia jikóvadu.

²⁵ Kiene ue kimoxi ni xelube iamukuá, kuma o jkixelube jene joso kiiadi kiâ, ja sokele mu kitala ni kubumba; ni ukalakalelu ue ua ji kalakala, uene umoxi.

²⁶ O xelubhe imoxi kitala kiê kia kuinhi dia kóvadu, xelube iamukuá ue kiene.

²⁷ Solomá anga u ji tula mu dixilu dia iudika moxiʼa tembulu, hé u ji tula muene kua suku o tembulu mu kaẋi anga o dibhabha dia xelube iii di tuta ku mutôto ua dibhezelu ku mbandu iii, o dibhabha dia xelube iamukuá di tuta ue ku mutôto ua dibhezelu ku mbandu iamukuá, o mabhabha aiadi amukuá a jixelube a di tuta mudiâ mu kaẋi-ni-kaẋi ka dibhezelu.

²⁸ Jixelube ue anga u ji xiia ulu uoso.

O kukembesa ku mabhitu ni ku mutôto

²⁹ O ku mutôto inzo ioso a i seta jixelube ni isálale ia maie, ni itulu iadimuika kiambote, kixi mu dibhezelu kixi ku tembulu ni moxi ni ku kanga.

³⁰ O bhoxi ue uaxiia-bhu ni ulu, ni moxi ni kukanga, kutale mu tembulu, uixi mu dibhezelu.

³¹ O bhu muelu ua dibhezelu uate-bhu mabhitu a mabaia ma muxi ua mudiva; o mikambu ni mikangala kífua iatambula o mbandu ia katanu ku mutôto.

³² O mabhitu ene kiiadi kiâ a a iudika ni mabaia a muxi ua mudiva; ia a seta-ku jixelube, ni isálale ia maie, ni itulu iadimuika kiambote ia kembesa ni ulu; ni jixelube ni isálale ia maie iene ioso ue a i kembesa ni ku i xiia ue ulu.

³³ O dibhitu dia Tembulu, jiphidika jê a ji iudika ja muxi ua mudívua; ja kididi kia mbandu ia kauana ia lumbu.

³⁴ O mabhitu ene kiiadi kiâ a a iudika ni mabaia a muxi ua faia; o ibasakasa iê, ia mabhitu ene kiiadi kiâ, iakexile ni kanama ka kuata mu jiphidika ja mikangala ia mabhitu, kífua jene o jidobaladisa.

³⁵ Anga u tuma kuila a seta-ku kiambote o jixelube, ni isálale ia maie, ni jifololo ja jikuka ji ja di muika kiambote, ima ioso ienhiʼii anga u i kembesa ni ulu.

³⁶ O lumbu lua moxi ua-lu tungisa ni mikalatata itatu ia matadi osete kiambote, ni mukalatata umoxi ua mukambu ua muxi ua sédulu.

³⁷ Bhu mbeji ia Zive, ia muvu ua kauana ua utuminu uê, kiene Solomá kiate o madisesa a Tembulu ia Jihova.

³⁸ O mu muvu ua kakuinhi ni umoxi, ua utuminu uê, bhu mbeji ia Bule, o mbeji ia kanake, kiene kia zubha kutunga o inzo ioso ia Jihova ni maxilu mê moso ni ima iê ioso ia tokala-ku, kala ki iafuama o kukala. Solomá uabhange sambuadi dia mivu ni ku i tunga kté ki iabhu.