I Jisobha 4 - O Mikanda Ikola

O Makota ʼathu mu utuminu ua Solomá, ni unéne uê uavulu

¹ Kienhiki, Sobha Salomá anga u kala mú tumina Izalaiele ioso.

² Enhá-phe ene o makota a tokala mu utuminu uê. Azadiia monʼa nganga Zadoko;

³ Eliholefe ni Ahiji, anʼa Siza, ene jikidivá; o Jozafate monʼa Ahilude muene musoneki a malunda;

⁴ o Benaia, monʼa Jehoiada, muene kabhitangu ka kifuxi kia masoladi; Zakoko ni Abiiatale ene o jinganga;

⁵ Azadiia, monʼa Natane, u tambula konda ia jikapataji; o Zabudi, monʼa Natane, muene kamba dia sobha, mukua ku mu bhana o jikaiula;

⁶ Ahisadi muene o kimbadi u tambula konda ia mbèle ioso ku lumbu lua sobha; o Adonilamo, monʼa Abada, u tambula konda ia akua kikalakalu kia ungamba.

⁷ Solomá anga u kala ni kuinhi dia kimbadi ni kiiadi mʼoxi ioso ia Izalaiele, akua kusota o kúdia kua muenexi ni mbèle iê ioso; kala muthu ni mbeji iê ia kubhana o kúdia.

⁸ O majina mâ, enhá: Bene-Hule, mu milundu ia Ifalaime;

⁹ Bebe-Dekele, mu Makaze, ni mu Salabini, ni mu Bete-Semexe, ni mu Elone ni mu Nete-hanana;

¹⁰ Bebe-Hesede, mu Alubote ni Soko, ni ixi ioso ia Hefele, ia mu tokala muene;

¹¹ Bebe-Abinadabe, mu thala ioso ia Ndodi (o muenhú, Na Tafate, monʼa Solomá ua muhatu, muene ua kexe mukajiʼê);

¹² Bahama monʼa Ahilude, mu Tahanaka ni Mejido, ni Bete-Sane ioso bhua di zukama ni Zeletane, ku luiji lua Jezeleele, tunde bhu Bete-Sane katé bhu Abele-mehola, katé mu kusomboka bhu Jokemeane;

¹³ Bene-Ngabele, mu Lamote-Ngiliiade ni jisanzala ja Jaíle monʼa Manasa mu Ngiliiade ja mu tokala, ni ixi ioso ia Alekobe mu Basane, ia mu tokala, makuinhi asamanu a mbonge a bhiti imbaka ni jitalanga ja utadi ua kobidi:

¹⁴ Ahinadaba, monʼa Ido, mu Mahanaíme;

¹⁵ Ahimaaze, mu Nafitali (muenhú ue, Na Basemate, monʼa Solomã ua muhatu, muene ua kexe mukajiʼê;)

¹⁶ Bahana, monʼa Husai, mu Asele ni mu Halote;

¹⁷ Jozafate, monʼa Paluua, mu Isakale;

¹⁸ Simeii, monʼa Ela mu Bejamí;

¹⁹ Ngebele, monʼa Udi, muene a mu te mʼoxi ia Ngiliiade, ni ixi ia Sihone sobha ia Mamodi, ni ia Hoke, sobha ia Basane; ixi iosʼoio muene ngó o kimbadi kimoxi uala-mu.

O kutululuka ni kuzediua kua utuminu ua Solomá

²⁰ Ni Juda ni Izalaiele ioso anga a vula kala kisekele bhu ndúndu ia kalunga, a kala mu kúdia ni kúnua ni kusanguluka jinga.

²¹ Solomá anga utumina o jisobha joso tunde ku Honga ia Ufalate katé ku ixi ia akua Fidíxia, katé ku mbámbe ni Ijito; ene oso a bheka jinga lubhaku kua muene, a bhikila jinga Solomá izuua ioso ia muenhu uê.

²² O kúdia kua Salomá kua kizuua kimoxi, ku bhinga makuinhʼatatu a kolo ia fuba ia fina, makuinhʼa samanu a kolo ia fuba ia ngoloso,

²³ kuinhi dia ngombe ia sevado, makuinhi aiadi a ngombe ji tunda mu kúdia ku iangu, hâma ia mbudi, kua di te jingulungu, jimbâmbi, jisexi, ni jihanga.

²⁴ Kuma Solomá muene ua kexe mu tumina jixi joso ku sámbua dia Honga ia Ufalate kunu, tunde bhu Tipiza katé ku Ngaza, jisobha joso ku sámbua kunu, ji mu beleselela muene; hé u kala ni kutululuka; ku jimbandu jê joso kana muthu ua mu kumbulula.

²⁵ Ni Juda ni Izalaiele, tunde ku Dane katé ku Beleseba, anga a kala bhua kondama, kala muthu u di xibhʼê mu kilembeketa kia muvide uê ni mu kilembeketa kia mufiuku uê, izuua ioso ia utuminu ua Solomá.

²⁶ Solomá anga u kala ni makuinhi auana a midi ia jikabalu ja tokala ku makalu, ni kuinhi dia midi ni midi jiiadi ja makuenze a mondala.

²⁷ Imbadi iê anga i kala mu sota kúdia kua sobha Solomá, ni athu oso a dia ku meza ma sobha Solomá, kala kimbadi ni mbeji iê; kʼehela kima ki kamba-bhu.

²⁸ Ni sevada ni iangu ia jikabalu kúdia, ioso ia tokala a i bheka jinga ue bhuoso bhu jala, kala muthu mu thembu ia kikalakalu kiê.

O kuijiia kua Solomá

²⁹ O Nzambi anga u bhana Solomá kuijiia ni kutongoloka kuavulu ni muẋima uakulu mu kutetuluka mukuâ ni kisékele ku ndundu ia kalunga.

³⁰ O kuijiia kua Solomá anga kutunda o kuijiia kua athu oso akexile mu thunda, o kuijiia kuoso kua akua Ijitu, ndenge.

³¹ Muene ue kiá o muthu uabetele mu kuijiia athu oso ndenge, kuma muene ua kexile kota mu kuijiia. Etane, mukua Zola ndenge, o Hemane, ni Kalekale, ni Dana anʼa Mahole ue, ndenge. O fuma iê anga idimuangena mu jixi ku jimbandu joso.

³² Uasoneka midi jitatu ja jisabhu ni jihéngele, o mimbu ia kuimba midi ni kitanu.

³³ O miẋi ioso ua i tange kioso ki iala, tunde ku miẋi iamakota o jisédulu jala mu muxitu ua Libano, katé ku tumiẋi tuofele tuedi kala indandauiji, o hisopo isabhuka ku malumbu a imbaka. Uazuela ue ku iama iamakota ni iòfele ikala ni inama iuana, ni jinjila ji bhita bhulu, ni iama ihuhutila ku thandu dia mavu, ni jimbiji jʼendela mu menha.

³⁴ Ku miji ioso kueza jinga athu mu kuívua o kuijiia kua Solomá, o jisobha joso mu ngongo evile o fuma ia kuijiia kuê, a mu tumikisa jinga jiphunga.