I Jisobha 3 - O Mikanda Ikola

Solomá u kuata ukamba ni Falaó hé u sakana ni monʼê

¹ Solomá anga u kuata ukamba ni Falaó, sobha ia Ejito, u bhenga monʼa Falaó ua muhatu, hé u mu bheka mu mbonge ia Davidi, kioso kiluua a zubha kutunga inzo iê-muène, ni inzo ia Jihova, ni kimbaka ki kondoloka Jeluzaleme.

² Mundu-phe hanji a kuata kusatela ku matala, mukonda katé mu izuua muenhomo ka tungile luua inzo ia Tembulu mu dijina dia Jihova.

Solomá ubhinga o kuijiia

³ Solomá anga u zola Jihova, u kala mu kuenda mu ijila ia tatʼâ Davidi; inda kima kimoxi ngó; u kala mu satela ku matala, ni kuohela-ku o fumasa ia dizumba.

⁴ Solomá anga uia ku Ngibiione mu satela-ku, mukonda o kuenhoko kuene-phe ku ditala dia dikota; midi ia sata ia kuoha ia bhana Solomá bhu kalatódio koko.

⁵ Bhu Ngibiione bhenhobho Jihova anga u tukulukila Solomá, ku nzoji, mu usuku. Nzambi anga u mu ambela, uixi: Bhinga kioso ki uandala ki ngi ku bhana.

⁶ Solomá anga u zuela, uixi: Eie, Ngana uedikiza henda iavulu kua mubhikʼé tatʼetu Davidi, kala kiendele muene bhu pholo ié mu kidi, ni mu kuiuka, ni kuimana muẋima o nzánza, kala ki ua mesena eie; lelu-phe eie ua mu bandekeza o henda ia dikota iaxedi kuema, ia ku mu bhana monʼa diiala mbé kuxikama bhu kiandu kiê, kala ki kia bhiti mu kizuua kia lelu.

⁷ Kiki-phe, u Jihova, Nzambi iami, ua ngi bhange eme ngi mulekiʼé, kukala sobha bhu kididi kia tatʼetu Davidi; eme-phe hanji ngi monʼauisu; ki ngejiia luua kioso ki ngi tunda, ni kioso ki ngi bokona.

⁸ Eme-phe ngi mulekiʼé ua ngi mono, ngala muʼaxaxi ka mundu ué u uà sola, mundu uadikota, mundu ki u xikina ku u tanga mba ku u kuata konda mukonda dia kuvula.

⁹ O ki ngalʼiki, Ngana, ngi bhane, ngi mubhikʼé, muẋima ua kutongoloka mu kufúndisa o mundu ué, phala ni unjimu uoso, ngi tene kutungula kia kidi ni kia makutu; kuma nanhi ua kambe unjimu, u ki tena, kia kufudisa o mundu ué uavulu kiki?

¹⁰ Maka enhá anga a uabhela Ngana, kuila Solomá ua bhingi kienhiki.

¹¹ Ngana Nzambi anga u mu ambela, uixi: Mukonda eie ua bhingi kima kiki, kua bhingi muenhu ué kulaia izuua iavulu, kua bhingi jimbongo phala eie, kua bhingi o kalunga ka jinguma jé, maji ua bhingi o kutongoloka kua kutungula o kidi;

¹² talesa, ngi ku bhanga kioso ki ua zuela: Ngi ku bhana o muẋima ua kuijiia kinéne ni kutongoloka katé kibhinga eie ku moneka luiadi, ni ku iá oso a ku bhingana, ki bhuà kala mukuenu u soka-nê.

¹³ Ni iii i ua kambe ku i bhinga, ngi ku bhana-iu ue, ni jimbongo ni kijingo, katé ku jisobha joso ki ku kala mukuenu u soka-nê, izuua ié ioso ia muenhu ué.

¹⁴ Se-phe eie uenda mu njila jami, hé u aiuka o ijila iami ni itumu iami, kala ki endele jinge tatʼenu Davidi, eme-phe ue ngi ku vudisa o izuua ia muenhu ué.

¹⁵ Solomá anga u phaphumuka ku kilu, manhi nzoji ianjiua. Anga uiza mu Jeluzaleme, hé u imana bhu pholo ia álaka ia kikutu kia Jihova, u bhana-bhu jisata ja kuoha ni jisata ja paze u bhangesa fesa ia dikota phala ene oso akua mbèle iê.

Solomá u batula mulonga ua ahatu kiiadi

¹⁶ Anga kua muenexi, kuiza ahatu kiiadi idianzunga, hé emana bhu pholo iê.

¹⁷ Muhatu umoxi anga u zuela, uixi: Auá! Kùku, ngana iami, tata! Ni eme ni mukuetu iú tuala inzo imoxi; eme anga ngi disanza monʼami, ni muene mukuetu ngala-nê mʼonzo.

¹⁸ O ki ngi zubha kudisanza, kizuua kia katatu, mukuetu iú u disanza ue monʼê; anga tu kala mʼonzo, etu ene ngó kiiadi kietu, ki bhuala dingi musonhi tuala-nê.

¹⁹ O monʼa mukuetu iú anga u fua mu usuku, mukonda ua mu xina kioso kia zeka.

²⁰ Anga muene u balumuka mu kaẋi ka usuku, hé u ngi tambula monʼami ua diiala bhu mbandu iami, kioso eme ki ngala ku kilu, hé u mu akata bhu jihata jê, o monʼê eʼmuène, u mu tula bhu jihata jami.

²¹ O ki kúkia ni kimene, ngedi ngi balumuka mu kuamuisa monʼami, ngi sanga mona uafu; kuila kuma kuazele, ku mu tala kiambote, nga mono manhi ki muene monaʼmi nga mu vuala.

²² Muhatu uamukuá ukumbulula, uixi: Kana, ió makutu! Mona uala ni muenhu muene monʼami, o mona uafuʼó muene monʼé. Kuala mukuá uadianga: Ki kiene; mona uafu monʼé, mona uala ni muenhu muene monʼami. Kiene kia mu zuelʼiki, bhu pholo ia muenexi.

²³ Muenexi anga u amba, uixi: O iú, uixi: Monʼa muenhu monʼami, uafu muene monʼé; o mukuá uixi: Kana; uafu muene monʼé, monʼa muenhu muene monʼami.

²⁴ Muenexi-phe, uixi dingi: Bekenu o xibhata kunu. Anga a bheka o xibhata bhu pholo ia sobha.

²⁵ Sobha anga u amba, uixi: Monʼa muenhu mu uanienu muʼaxaxi, iú mu mu bhane mbandu, iú ue mu mu bhane mbandu.

²⁶ Muhatu uoso ua vuala monʼa muenhu, bhenhobho u ambela muenexi, kuma henda ia mu kuata ia monʼê, uixi: Aiué! Ngana iami, tata, mu bhane o monʼa muenhu, kana ku mu jibha ngó! Mukuá-phe, uixi: Kana! Ka kale uami, ka kale ué; inda a mu uane!

²⁷ Muenexi anga u kumbulula, uixi: Mukua monʼê iú, a mu bhane-nê; kana ku mu jibha ngó, kuma iú muene-muène manhʼâ.

²⁸ Izalaiele ioso anga evua o kubatula kuku kua batula muenexi, anga a kala ni uoma ua muenexi; kuma a mu mono ni kuijiia kua Nzambi kuala naku, mu kutungula ni kubatula o kidi.