I Jisobha 22 - O Mikanda Ikola

Mikaia Uzambula o kutoloka kua Akabe ni Jozafate

¹ Anga bhu bhita mivu itatu ni kubatama, ki kua kexile ita bhu kaẋi ka Sídia ni Izalaiele.

² Ku muvu ua katatu-phe Jozafate, sobha ia Juda, u kulumuka kua sobha ia Izalaiele, mu ku mu menekena.

³ Anga sobha ia Izalaiele uambela akua ʼbhata diê, uixi: Enu ki muejiia kuma Lamote dia Ngileiade uetuʼetu etuʼetu tua batamaʼetu, o ku mu tambula bhu lukuaku lua sobha ia Sídia, kana?

⁴ Bhenhobho muene uibhula Jozafate, uixi: Kiebhi, eie uia nʼeme ku ita mu kúlua ni Lamote dia Ngileiade? Jozafate anga uambela sobha ia Izalaiele, uixi: Eme nʼeie etuʼene amoxi, kifuẋi kiami kala o kifuẋi kiê, ni jikabalu jami kala jikabalu jê.

O mizambu ia misesedi ia makutu

⁵ Jozafate anga uambela dingi sobha ia Izalaiele, uixi: Lelu-phe u dianga hanji kusota kuijiia o kizuelu kia Jihova.

⁶ Bhenhobho sobha ia Izalaiele u bhongolola nzungule ia jiplofeata, manhí mba kukamba ngó bhuòfele mu kutenesa hama jiuana ja jipolofeta, anga u a ebhula, uixi: Enu kiebhi-ze, ngiia ma kúlua ni Lamote dia Ngiliiade, mba ki ngiii-ku? Kuala ene: Banda, mukonda Ngana ua kà mu bhana bhu lukuaku lué, u sobha.

⁷ Kuala-phe Jozafate: Kunu kana-ku hanji dingi polofeta ia Ngana, ni tu tena ku mu ibhula?

⁸ Bhenhobho sobha ia Izalaiele uambela Jozafate, uixi: Sai hanji muthu umoxi tu tena ku mu tuma ku tu sotela kuijiia kizuelu kia Ngana; maji eme-phe nga dizemba-nê, mukonda eme nuka a ngi zambuila mbote ia kima, kala kuii-bha mu kuiibha ngó; muenʼiú o dijina diê Mika, monʼa Imila. Jozafate-phe, uixi: Sobha kana kuzuela kiokio.

⁹ Bhenhobho sobha ia Izalaiele uixana ngolambole imoxi, uixi: Ngi bhekele Mika, mona Imila, lusolo!

¹⁰ Ni sobha ia Izalaiele ni Jozafate, sobha ia Juda, a xikamene kala muthu ku kiandu kiê, a zuata izuatu ia ungana, bhu kitanda, bhu kanga dia muelu ua Samádia; anga jipolofeta joso ji kuata kuzambula bhu pholo iâ.

¹¹ Anga Zedekiia, monʼa Kanaana, u di bhangela jimbinga ja felu, uixi: Ngana uambe kiki: Akua Sídia ua kà a lua ni jimbinga jiji, katé u a zubhidisa osololo muene:

¹² Anga jipolofeta joso muene zambula kienhiki, exi: Banda mu Lamote dia Ngiliiade, kuma ua-nda ku a tolola muene, mukonda o Ngana ua kà bhana Lamote dia Ngiliiade bhu lukuaku lua sobha.

Mika u zambuila sobha

¹³ Anga phunga uendele mu kuixana Mika, u mu zuelesa, uixi: Tala kunu, o jipolofeta nʼakuenu, mu dízui dimoxi ngó, a mu tangela sobha ima iambote iala ku pholo; eie-phe ue u zuela kiene kimoxi kala ene, nda u zuele ima iambote kua sobha.

¹⁴ Mika-phe uixi: Ngana kuene kuala, a tunge a some! Kuma eme ima ioso Ngana ia ngi tangela, iene i nga kà zuela.

¹⁵ Muene kia bhixila kua sobha, sobha u mu ambela, uixi: Kiebhi Mika, tuia mu kúlua ni Lamote dia Ngileiade, mba tuehetu kuia-ku? Muene u mu ambela uixi: Banda, ua-nda kua kà tolola; mukonda Lamote, Ngana ua kà i bhana bhu lukuaku lua sobha.

¹⁶ Maji o sobha u mu ambela, uixi: Lukuẋi lu nga-nda ku kulokesa, kuila u ngi tangela ngó kikale o kidi, mu dijina dia Ngana?

¹⁷ Bhenhobho muene, uixi: Izalaiele ioso nga mu mono ua di muangena mu milundu, kala jimbudi ja kambe kabhila; anga Jihova u zuela, uixi: Athu iá kʼala ni ngana iâ; a vutuke ni uembu, muthu ni muthu aie mʼonzo iê.

¹⁸ Bhenhobho sobha ia Izalaiele uambela Jozafate, uixi: Eme ki nga ku tangela-kiu kuma nuka a ngi zambuila mbote, kikala kuiibha ngó mu kuiibha?

¹⁹ Bhenhobho Mika, uixi: Ivua-phe o kizuelu kia Ngana: Nga mono Jihova ua xikama bhu kiandu kiê, ni kifuẋi kioso kia diulu, kiemana bhu mbandu iê ku lukuaku luê lua kúdia ni ku lukuaku luê lua kiasu.

²⁰ Anga Jihova u zuela, uixi: Nanhi ua kà funhisa Akabe, phala nʼa bande, anga u di bhalela mu Lamote dia Ngileiade, na file momo? Anga a kuata iú u zuela kiki, mukuá u zuela kiókio.

²¹ Kathangana ku tunda nzumbi imoxi anga uiza bhu pholo ia Jihova, uixi: Eme nga kà mu tobhesa. Anga o Ngana u mu ambela, uixi: U mu tobhesa ni kima kiaʼhi?

²² Muene uixi: Nga kà tunda, anga ngʼà kala ngi nzumbi ia makutu mu ʼkanu dia jipolofeta jê joso. Eme Ngana: Eie ua-nda kua kà mu tobhesa muene, hé ua kà mu tolola; tunda-phe, u ki bhange.

²³ Kala kiki-phe, dimuka! Kuma Ngana ua te nzumbi ia makutu mu kanu dia jipolofeta jé joso, mukonda Jihova ka zuela ima iambote ku mbandu ié-eie.

²⁴ Bhenhobho Zedekiia, monʼa Kanaana, u zukama, anga u bhana Mika huxi ku ditama, uixi: Eme nzumbi ia Ngana ia ngi sombokela bhebhi, nda i ku zuelese eie?

²⁵ Kuala Mika: Kingila, kizuuʼokio ua kà ki mona, kioso ki ua kèla u tunda xilu u bokona xilu, ni kusota bhuoso bhu u suamena.

²⁶ Bhenhobho sobha ia Izalaiele, uixi: Mika mu kuatienu, muie-nê dingi kua Amone, mutumini ua sanzala, ni kua Jouaji, monʼa sobha,

²⁷ anga mua kèla: Sobha uambe kiki: Diiala iú mu jikilienu mu kaleia, anga mu mu dikila jinga ni mbolo ia phaxi ni menha ma jingongo, katé eme kioso ki ngiza ni uembu.

²⁸ Anga Mika u zuela, uixi: Eie ku vutuka ni uembu, kale o Ngana ka zuelela moʼmuami. Uixi dingi: Enu athu oso ivuenu-kiu!

Ita ni akua Sídia, o kúfua kua Akabe

²⁹ Anga kienhiki sobha ia Izalaiele ni Jozafate, sobha ia Juda, a banda ku Lámote dia Ngileiade.

³⁰ Anga sobha ia Izalaiele uambela Jozafate, uixi: Eme nga-ndu di bhangesa kala ngi muthu uengi, anga ngi bokona mu mvunda; eie-phe u zuata o izuatu ié ia usobha. Sobha ia Izalaiele-phe hé u di bhangesa kala muthu uengi, anga u bokona mu mvunda.

³¹ O sobha ia Sídia-phe, kienhokio ua tumina o atumini a makalu, a kexile makuinhʼatatu a muthu ni kiiadi, uixi: Enu ki mua ka bhânge ni muthu uòfele mba uònene, kikale ngó sobha ia Izalaiele, kuabhu!

³² Anga ki bhita-phe kuma, atumini a makalu, ki a mono Jozafate, a zuela mudiʼâ, exi: Iú muene sobha ia Izalaiele, kana-bhu phata muene! Anga a zukama, mu kubhânga-nê. Jozafate-phe kia ki mono, ua dikola.

³³ Hé ki bhita ue kuma, atumini a makalu kia mono kuma ki muene sobha ia Izalaiele, a zumbuka ku mu kaiela.

³⁴ Bhenhobho diiala dimoxi, unana honji iê, mu luelu diê, sè ku kʼijiia, anga u kuama sobha ia Izalaiele bhu kaẋi ka phonda ni ibhakatu. Bhenhobho muene uambela muendesi a dikalu diê, uixi: Bilula lukuaku lué, u vutule dikalu kuema, nda u ngi katule mu kifuẋi, mbata a ngi kuama kiaiibha.

³⁵ Kizuuʼokio-phe anga mvunda iiia ni kudibandekeza, anga sobha ki mu bhinga kuimana mu dikalu diê ku pholo ia akua Sídia; muene-phe hé u fua mu ku bhixila mu kumbi dia ngoloxi; anga o manhinga mê ma kala mu kunguluka bhoxi, o mu dikalu anga muizala manhinga.

³⁶ Anga mu kifuẋi mu bhita ngonge kia zubha dikumbi kujika, exi; Kala muthu ni muthu aie ku sanzala iê, kala muthu ni muthu a vutuke kʼoxi iâ!

³⁷ Anga sobha u fua! Hé a mu bheka mu Samádia, anga a mu funda momo.

³⁸ O ki a kala mu sukula o dikalu bhu kixima mu mbonge ia Samádia, jímbua ji kala mu lesa ue manhinga mê, kala kia tangele o kizuelu kia Ngana.

³⁹ Kutanga o ikalakalu dingi ia Akabe, ni ima ioso ia bhangele, ni inzo ia mazuʼa nzamba ia tungile, manhi ki iòsoneke mu divulu dia malunda ma jisobha ja Izalaiele?

⁴⁰ Kienhiki Akabe anga u zeka ku mukànda ua mavu ni tata jê; anga Akaziia, monʼê ua diiala, u hinga ungana bhu kididi kiê.

O utuminu ua Jozafate

⁴¹ O Jozafate, monʼa Aza, ua mateka kutumina mu Juda ku muvu ua kauana ua utuminu ua Akabe, sobha ia Izalaiele.

⁴² Anga Jozafate u kala kiá ni makuinhʼatatu a mivu nʼitanu kia mateka o kutumina; anga u tumina makuinhʼaiadi a mivu nʼitanu mu Jeluzaleme. Hê u kala ni mamʼâ, dijina diê Azuba, monʼa Silki.

⁴³ Jozafate anga uendela muene mu njila joso ja tatʼâ Aza, ka ji bhambukile né ngó; hé u kala mu kubhanga jinga kiaiukila ku mesu ma Ngana.

⁴⁴ Inda o ididi-ku ia matala kʼa i katuile luua; athu hanji a kexi kusatela ni kuohela uasu ua dizumba mu ididi ia matala ienhoio.

⁴⁵ Anga Jozafate u kala ku uembu ni sobha ia Izalaiele, mbata a di tambuluile muene kiambote kiiadi kiâ.

⁴⁶ Kutanga ikalakalu dingi ia Jozafate, ni kutena kuedikiza, ni kia lua jinga o ita, manhi ki kiosoneke mu divulu dia malunda ma jisobha ja Juda?

⁴⁷ Ua balakala ue o minzangala ia mala, ioio ia di longele o udianzunga iii ia subhukile-ku mu izuua ia tatʼâ Aza.

⁴⁸ Mu izuuʼomo, mu Edomo ki mua kexile sobha, mua kexile-phe ngó nguvulu, isengele ia sobha, muene uakexi mu tumina-mu.

⁴⁹ Jozafate anga u bhanga jinaviiu ja Talxixi, jiia ku Ofidi mu kutakana o ulu; maji ja lémbua-phe kuia-ku, mukonda jinaviiu ja budikila bhu Enzone-Ngabele.

⁵⁰ Bhenhobho Akaziia, monʼa Akabe, uambela Jozafate, uixi: Akalakadiʼé aie kumoxi ni akalakadiʼami mu jinaviiu. Maji o Jozafate-phe ua ditunuʼê.

⁵¹ Jozafate anga u zeka ni mukànda ua mavu kumoxi ni tata jê, anga a mu funda bhu mbanduʼa jitata jê, mu sanzala ia tatʼâ Davidi. Anga monʼê ua diiala, Jolamu, u hinga o ungana bhu kididi kiêʼ.

O utuminu ua Akaziia, sobha ia Izalaiele

⁵² Kienhokio Akaziia, monʼa Akabe, u mateka kutumina mu Samádia, mu muvu ua kuinhi ni sambuadi ua utuminu ua Jozafate, sobha ia Juda; anga u tumina Izalaiele mu mivu iiadi

⁵³ Anga u bhanga kiaiibha ku mesu ma Jihova; mukonda uendela jinga mu njila ja tatʼâ, ni mu njila ue ja mamʼâ, ni mu njila ja Jelobouamu, monʼa Nebate, ua bhangesele Izalaiele kuta ituxi.

⁵⁴ Muene ua bheza jinga Baale, ni kubhetama bhu pholo iê mu ku mu diundila; anga Jihova, Nzambi ia Izalaiele, u mu thathamesa ni kubhanga o ima ioso ia bhangele jinge tatʼâ.