I Jisobha 21 - O Mikanda Ikola

Na bote u dituna kusumbisa Akabe o díbhia diê dia mivide

¹ Kia bhiti ima iii, Nabote, mukua Jizeleele, u kala ni díbhia dié dia mivide mu Jizeleele, dia zukama ni dizemba dia Akabe, sobha ia Samádia.

² Kunu ku eza, Akabe u zuelesa Nabote, uixi: Ngi bhane díbhia dié dia mivide, nda di kale ndombe iami, mbata dia zukama bhu mbanduʼa inzo iami; anga ngi ku bhana dia mukuá dia beta kuuabha diene ndenge; mba, se ki ku uabhela ku mesu mé, ngi ku bhana kioso ki dia te mu kitadi.

³ Nabote-phe uambela Akabe, uixi: Jihova a ngi lange; ka ngʼehele, kuila eme ngi ku bhana o undundu ua ngi xila jitata jami.

⁴ Bhenhobho Akabe uiza ku bhata diê, ua luuala o ku muẋima kua mu dimbuluka ni kuthathamana, mukonda dia kizuelu kia Nabote, mukua Jizeleele, kia mu tangela, uixi: Ki ngi tena ku ku bhana o undundu ua ngi xila jitata jami. Anga uiza, u zeka mu hama iê, ni pholo ia biluila ku mutôto, anga u dituna o kudia mbolo.

⁵ Kia mu sange-phe mukajʼê Jezabele, u mu ambela, uixi: Kuezaʼhi kia luualesa o nzumbi ié kiosuʼiki, anga u dituna kudia mbolo?

⁶ Anga muene u mu ambela, uixi: Mukonda nga zuelesa Nabote, mukua Jezeleele, ngixi: Ngi bhane díbhia dié dia mivide mu kitadi; mba, ngi ku bhana diengi bhu kididi kiê, se ki ku uabhela. Muene-phe nguaʼiê, iu uambe, uixi: Díbhia diami dia mivide ki ngi ku bhané-diu:

⁷ Bhenhobho mukajʼê Jezabele, u mu ambela, uixi: Kindala kʼeie ua mu tumina ku ungana ua Izalaiele? Balumuka, u die mbolo, muẋima ué u sanguluke; eme nga-nda ku ku bhana o dibhia dia mivide dia Nabote, mukua Jizeleele.

Jezabele u tuma kujibha Nabote

⁸ Bhenhobho muhatuʼê u soneka mikanda mu dijina dia Akabe, anga u i jika ni kidimbu kia sobha; mikanda anga u i tumikisa ku adiakimi ni ku jingana ja kexile mu sanzala ia kexile Nabote.

⁹ Anga u soneka mu mikanda, uixi: Kolenu ngonge ia kujila kudia, ni mu te Nabote ku uadiakimi ua kifuẋi kioso.

¹⁰ Anga mu mu bhekela anʼaiadi a Kadiaphemba ku pholo iê, hé ene a mu tetela umbangi ua makutu, exi: Eie ua ẋonguena Nzambi ni sobha; ni mu tubhuka-nê bhu kanga dia mbonge, anga mu mu bûba ni matadi katé ua fu.

¹¹ Anga akua mbanza iê, o adiakimi ni jingana, a kexile mu sanzala iê, a bhanga kala kia a tumina Jezabele, kia soneka mu mikanda ia a tumikisa.

¹² A kola-phe ngonge ia kujila kúdia, anga Nabote a mu xikamesa bhu kididi kia ujitu ku thandu dia kifuẋi kioso.

¹³ Bhenhobho kuiza malʼaiadi anʼa Kadiaphemba, hé emana bhu pholo iê; anga mala enhá ana Kadiaphemba, a tatela Nabote ni umbangi ua makutu, bhu pholo ia kifuẋi, exi: “Nabote ua ẋonguena Nzambi ni sobha”. Anga a mu ambata ku kanga dia sanzala, hé a mu búba ni matadi anga u fua.

¹⁴ Bhenhobho a tuma kutangela Jezabele, exi: Nabote a mu bûba ni matadi, iu uafu.

¹⁵ Anga ki bhita-phe kuma, Jezabele kievu kuila Nabote a mu bûba kiá ni matadi, iu uafu, Jezabele uambela Akabe, uixi: Balumuka, u tambule díbhia dia mivide dia Nabote, mukua Jizeleele, dia ditunine ku ku bhana mu kitadi; mbata Nabote kʼala dingi ni muenhu, kuma uafu kiá.

¹⁶ Anga ki bhita ue kuma, Akabe kievu kuila Nabote uafu kiá, Akabe u balumuka, phala ku kulumuka mu díbhia dia mivide dia Nabote, mukua Jizeleele, mbé ku di tambula kiá.

Nzambi u tuma Elija kuta jindumu kua Akabe

¹⁷ Bhenhobho o kizuelu kia Jihova kʼiza kua Elija, o musesedi, kixi:

¹⁸ Balumuka, u kulumuke ua kà takane ni Akabe, sobha ia Izalaiele, uala mu Samádia; talesa, kuma kindala muene uala mu díbhia dia mivide dia Nabote, mua kulumuka phala ku di tambula.

¹⁹ Anga ua kà mu tangela, uixi: Ngana uambe kiki: Manhi kua jibha, eie ua tambula undundu? Ua ka mu tangela dingi, uixi: Ngana uambe kiki: Bhu kididi bhua lesela jímbua o manhinga ma Nabote, jímbua ue bhene bhu ja kà lesela o manhinga mé, o mé eie-muène!

²⁰ Anga Akabe uambela Elija, uixi: Kiebhi nguma iami, ua ngi bongo kiá? Kuala muene: Nga ku bongo muene! Mbata eie ua di sumbisa kiá mu kubhanga kiaiibha ku mesu ma Ngana.

²¹ Talesa kuma nga-ndu bheka uíndua ku thandu dié, anga o mbutu ié nga kà i vuza, ni kua Akabe nga kà vuza-ku o diiala dioso, nga kà vuza-ku ue o mubhika ni ua kambe thumba ni samba mu Izalaiele.

²² Nga kà bhanga o dibhata dié kala ki nga bhange o dibhata dia Jelobouamu, monʼa Nebate, kala ue o dibhata dia Bahasa, monʼa Ahiia; mukonda dia kulokalala ku ua ngi lokalala mu kutesa Izalaiele kituxi.

²³ Ngana anga u zuela ue ku mbandu ia Jezabele, uixi: O Jezabele hinu jímbua ji mu dila ue bhu mbanduʼa kimbaka kia Jezeleele.

²⁴ Mukua Akabe ió u fuila mu sanzala, a kà mu dia ku jímbua, uoso u fuila mu iangu, jinjila ji bhita bhulu jene ja kà mu dia.

²⁵ Kana-ku-phe muthu ua sokela ni Akabe, mu ku di sumbisa mu kubhanga kiaiibha ku mesu ma Ngana kala muene, mukonda dia mukajʼê Jezabele, ua kexile ku mu funhisa jinga kubhanga kiaiibha.

²⁶ Muene anga u kala mu bhanga isunji ia makota, mu ku kaiela o mahamba, kala o ima ioso ia bhanga jinga akua Amolé, a a kaiele kuala Jihova mu jixi jâ, bhu pholo ia anʼa Izalaiele.

²⁷ Anga ki bhita-phe kuila, kia zubha Akabe kuivua maka iá, u tandujula o izuatu iê, anga u zuata dikuba ku mukutu uê, anga u jila; anga u zeka jinga ni dikuba, ni kuenda ni kutululuka kuoso, ni kudijingununa.

²⁸ Bhenhobho kizuelu kia Jihova kiza kua Elija, o musesedi, kixi:

²⁹ Eie Akabe kua mu mono kuila uala ku di tululula bhu pholo iami? Mukonda-phe ua di tululula bhu pholo iami, uíndua iú u nga tange ku mu bhanga ki nga-nda ku u bheka mu izuua iê, kana; nga kà u bheka-phe mu izuua ia monʼê ku thandu dia dibhata diê.