I Jisobha 19 - O Mikanda Ikola

Elija a mu kusa kuala Jezabele

¹ Anga Akabe u tudila Jezabele o ima ioso ia bhange Elija, ni kia jibha o jipolofeta ja Bahale josololo ku xibhata.

² Bhenhobho Jezabele u tuma phunga kutangela Elija, uixi: Jinzambi ji ngi bhange-kiu, anga a ngi tela-ku dingi ku kidi muene, se mungu, bhu kumbi Ma didi, o muenhu ué ki ngʼu bhange kala ua umoxi mudiâ.

³ Mukuetu Elija kievu kiokio, phala kusubhuka ni muenhu, u balumuka, u katuka anga uiza bhu Beleseba, moxi ia Juda, anga u xa-mu o kambonga kê ka mu kuenda na-ku.

⁴ Muene anga uia mu kikangalakata, uenda kizuua kimoxi, anga uiza, u xikama bhoxi dia muzimbru; anga u bhinga kúfua moxi diê, uixi: Kuabhu kiá, eie u Ngana! Katula o muenhu uami kindala, mukonda eme ki ngala kota, o jitata jami ndenge mu kuuabha.

⁵ Anga u zeka, anga uia ku kilu bhoxi dia muzimbru bhua zeka, bhenhobho anju i mu zambesa, anga i mu ambela iexi: Fundumuka, u die.

⁶ Muene anga u tona hé u tala, anga u mona ku mutuelu uê kuala mbolo iozuze ku makala, ni kadisanga ka menha; anga u dia, u nua, anga u zeka dingi.

⁷ Anga anju ia Ngana i vutuka lua kaiiadi, anga u mu zambesa dingi, uixi: Fundumuka u die, mukonda ua-nda kuenda njila ia lebha kiavulu.

Elija ku mulundu ua Holebe

⁸ Muene-phe hé u balumuka, anga u dia, anga u nua; bhenhobho ni nguzu ia kudia koko kuadi, uenda makuinhʼauana a izuua ni makuinhʼauana a usuku, hé u bhixila ku Holebe, ku mulundu ua Nzambi.

⁹ Kuenhoko anga u bokona mu dibânda anga u zekela-mu o usuku; anga ku muiza kizuelu kia Ngana, ki mu ambela kiexi: Elija, ua mu bhangaʼhi bhabha?

¹⁰ Muene uixi: Eme, Ngana Nzambi ia Ifuẋi, nga mu dielela kiavulu, ngala ni muanu ua imbamba iê, mukonda anʼa Izalaiele kikutu kiê a ki xi, kalatódio jê a ji bulu, ni jipolofeta jê a ji jibha-jibha ku xibhata; eme ngó nga xala-ku ubheka umai, ia a mu sota dingi ku ngi katula muenhu uami.

¹¹ Anga muene u mu ambela, uixi: Tubhuka bhu kanga, uimane bhu pholo ia Jihova, ku mulundu iú. Anga Ngana u kala mu bhita, kubhita ue kitembu kia dikota kia nguzu, ki kala mu bazesa o milundu ni matadi u ma bula ku pholo ia Jihova; mu kitembu-phe Ngana ka kexile-mu; anga ku kitembu ku kaiela kiteketela kiaʼxi; maji mu kiteketela kiaʼxi ue Ngana ka kexile-mu.

¹² Anga ku kiteketela kia ixi ku kaiela túbhia, maji mu túbhia-phe ue Ngana ka kexile-mu; anga ku túbhia ku kaiela o dízui dia lenduka kiambote, dia talala kala mulenge ua mu bhuselela.

¹³ Anga ki bhita-phe kuma, Elija, kia dʼivu, u futa o pholo iê mu divunga diê, anga u tubhuka bhu kanga, anga uiza hé uimana bhu muelu ua dibânda diê; hé uívua kua mu iza dízui: Elija ua mu bhangaʼhi bhabha.

¹⁴ Muene-phe, uixi: Eme Ngana Nzambi Ia Ifuẋi nga mu dielela kiavulu, ngala ue ni muanu ua vulu ua imbamba iê, mukonda anʼa Izalaiele kikutu kiê a ki xi, kalatódio jê a ji bulu, ni jipolofeta jê a ji jibha-jibha ku xibhata; eme ngó nga xala-ku ubheka uami, maji a mu sota dingi ku ngi katula o muenhu uami.

¹⁵ Anga Ngana u mu ambela, uexi: Ndé, vutukila mu njila ia kuia mu kikangalakata kia Damasku; o ki ua kà bhixila koko, ua ka unda Hazaiele ku usobha ua Sídia.

¹⁶ Jehu ue, monʼa Nimisi, ua kà mʼunda ku usobha ua Izalaiele; o Ilizeu ue, monʼa Safate dia Abele-meola, ua kà mʼunda polofeta phala a bhingane bhu kididi kié.

¹⁷ Anga kia kà kala-phe kuma, uoso u subhuka ku xibhata ia Hazaiele, a kà mu jibha kuala Jehu; o uoso u lenga ku xibhata ia Jehu, a kà mu jibha kuala Ilizeu.

¹⁸ Eme nga xalesa ue sambuadi dia midi ia muthu mu Izalaiele, ió o jiphuna jâ joso ki ja fukamena Bahale, ni dikanu diâ dioso ki dia mu bhana jibeju.

O ukunji ua Ilizeu

¹⁹ Elija-phe u katuka-bhu, anga u sanga Ilizeu monʼa Safate, ua mu dima ni makuinhʼaiiadi a ngombe ni jiuana ku pholo iê, anga muene u kala mu dima ni jiiadi ja sukidila-ku; anga Elija, mu ku mu somboka, u mu takuila o divunga diê ku thandu.

²⁰ Bhenhobho muene u xa jingombe, anga u kaiela Elija ni lusolo, uixi: Ngʼehele nga kà bhane beju kua tatʼetu ni mamʼetu, ni ngi ku kaiele kiua. Kuala muene: Ndé, phala u vutuke kiua, mbata eie uejiia kiá kioso ki nga ku bhange.

²¹ Muene-phe hé u vutuka ku dima, anga u kuata ngombe jiiadi, anga u ji jibha, hé u teleka o xitu iê ni miẋi ia jitula ku jingombe, anga u ibhana o kifuẋi kia sanzala iê, ene anga a dia; muene hé u balumuka kiua mú kaiela Elija, anga u kala mu ku mu kalakela ni ku mu bhikila.