I Jisobha 16 - O Mikanda Ikola

Muzambu ua Jehu ua kutanga hadi iza kua Bahasa, sobha ia Juda

¹ Bhenhobho kizuelu kia Ngana kʼiza kua Jehu, monʼa Hanani, mu kuêlesa Bahasa, kuila:

² Mukonda eme nga ku zangula mu fufutila, eme nga ku bhake mu kutumina o kifuẋi kiami kia Izalaiele, eie-eie uakaiela mu njila ia Jelobouamu, ni kutesa kituxi ku kifuxi kiami kia Izalaiele, bhua mu tundu o ku ngi thathamesa ni ituxi iê,

³ talesa kuma Bahasa hinu ngi mu kungulula o luvualu luê ni luvualu lua dibhata diê dioso, anga o inzo iê nga kà i bhanga kala ki nga bhange ia Jelobouamu, monʼa Nebate.

⁴ Muthu uoso ua tokala kua Bahasa, u fuila mu sanzala, jímbua ja kà mu dia; o uoso mukua bhata diê u fuila mu iangu ku mukáu a kà mu dia ku jinjila ji bhita bhulu.

⁵ Kutanga o ikalakalu iamukuá dingi ia Bahasa, ni ioso ia bhangele, ni kutena kuê, manhi ki iosòneke mu divulu dia malunda ma jisobha ja Izalaiele?

⁶ Bahasa anga u zeka ni mukànda ua mavu kumoxi ni jitata jê, anga a mu funda mu Tídiza. Hé o monʼê ua diiala a mu ixana Ela, u hinga bhu kididi kiê.

⁷ Kienhiki ue kiejile o kizuelu kia Jihova, mu ukunji ua polofeta Jehu, monʼa Hanani, mu kuêlesa Bahasa ni dibhata diê; o kia ki bhekele, o usuéia uoso ua bhangele Bahasa ku mesu ma Jihova, kia mu thathamesa ni ibhangelu ia maku mê, mu ku di sokesa ni dibhata dia Jelobouamu, ni mukonda ue dia ku buidisa o dibhata dioso dia Jelobouamu.

O kikutu kia Nzidi

⁸ Ku muvu ua makuinhʼaiadi ni kisamanu ua utuminu ua Aza, sobha ia Juda Ela monʼa Bahasa, kiene kia mateka kutumina Izalaiele. Ua tungile mu Tidiza, anga u bhanga mivu iiadi kʼungana.

⁹ Anga Nzidi mukua mbèle iê mutumini ua kaxaxi ka makalu mê u mu ta kikutu kia ufe, kioso muene kiala mu Tídiza mu kúnua ni kukodiua mʼonzo ia Alasa, ngolambole iê, ua kexile mu Tídiza.

¹⁰ Muene kioso kia landuka ni kúnua ni kukodiua, Nzidi-phe u bokona anga u mu kuama, hé u mu jibha. Anga ku muvu ua makuinhʼaiadi ni kasambuadi ua utuminu ua Aza, sobha ia Juda, muene u hinga ungana bhu kididi kiê.

¹¹ Anga ki bhita kuila, muene kia kala kiá mù tumina, kuma ua xikama kiá ku kiandu kiê, u tuma ku jibha o dibhata dioso dia Bahasa ni ku di jimisa o mbutu, mbata ka mu xila-bhu muthu umoxi ngó mba jindandu jê, mba o makamba mê.

¹² Kienhiki, Nzidi ua buidisa o dibhata dioso dia Bahasa, kala kia tangele o kizuelu kia Jihova mu ukunji ua polofeta Jehu, ku mbandu ia Bahasa.

¹³ Kuenhuku kuene o kubazela kua Nzambi mu ituxi ioso ia tele Bahasa, ni ia monʼê Ela, i a bhangesele kutesa kituxi kua Izalaiele phala kuthathamesa Jihova Nzambi ia Izalaiele ni makuzangata mâ.

¹⁴ Mu kutanga o ikalakalu dingi ia Ela, ni ima ioso ia bhanga jinga, manhi ki iosòneke mu divulu dia malunda ma jisobha ja Izalaiele?

Nzidi uhinga ungana hé u tumina mu sambuadi dia izuua

¹⁵ Ku muvu ua makuinhʼaiadi ni kasambuadi ua utuminu ua Aza, sobha ia Juda, kiene Nzidi kia hingi ungana mu Tídiza; sambuadi dia izuua ia bhangele Nzidi Kʼungana. Kienhokio, kifuxi a kondoloka mu kúlua Jibetone, mbonge ia tokalele akua Fidíxia.

¹⁶ Anga athu a kexile bhu kibangu evua, exi: Enu-ze, o koko Nzidi ua te kikutu kia ufe kua sobha, iu ua mu jibhʼê. Mu kizuua kiene kimoxi kienhokio-phe Izalaiele ioso, kievu kuila sobha a mu jibhʼê kuala Nzidi, a kuata Omidi, ua kexi mu tumina o kifuxi bhu kilômbo, hé a mu bhanga sobha ia Izalaiele.

¹⁷ Omidi-phe anga u banda ni muene ni Izalaiele ioso, a tunda mu Jibetone, anga eza a konda o sanzala ia Tidiza.

¹⁸ Anga ki bhita-phe kuila, Nzidi kia mono kuamba sanzala iòtambule, u lenga hé uia ku mbanza mu ʼzemba dia sobha, anga u di ximikina túbhia mʼonzo ia sobha, anga u fuila muenhomo,

¹⁹ mukonda kima kiki kia mu tundu ku ituxi iê ia tele, mu kubhanga kiaibhila Jihova ku mesu mê, sobha kiendela jinga mu njila ia Jelobouamu, ni mu ituxi iê ia bhangesele na-iu Izalaiele kuta kituxi.

²⁰ Mu kutanga o iakalakalu dingi ia Nzidi, ni kikutu kiê kia tele, manhi ki iosòneke mu divulu dia malunda a jisobha ja Izalaiele?

Omidi u tolola Tibini anga u hinga ungana

²¹ Bhenhobho akua Izalaiele a di uana mu ibuka iiadi: kaxaxi ka kaiela Tibini, monʼa Jinate, phala ku mu bhanga sobha; o kaxaxi ka mukuá a kaiela Omidi.

²² Kifuẋi-phe kia kaiela Omidi a beta dingi nguzu o a kaiela Tibini, monʼa Jinate, ndenge. Tibini anga ufua, Omidi anga u hinga ungana ua kutumina.

²³ Ku muvu ua makuinhʼatatu nʼumoxi ua utuminu ua Aza, sobha ia Juda, Omodi uene ua mateka kutumina na-u Izalaiele, anga u tumina kuinhi dia mivu nʼiiadi; anga u tumina mivu isamanu mu Tídiza.

²⁴ Anga u sumba o mulundu ua Samádia kua Semele, mu talendu jiiadi ja phalata; anga u tunga dibhata ku mulundu, o sanzala ia tungile ku mulundu ua sumbu kua Semele, u i luka dijina dia Samádia, kifua ua luku Semele ngana ia mulundu ua Samádia.

²⁵ Anga Omidi ue u bhanga kiaiibhila Jihova ku mesu mê, anga u bhanga dingi kia beta kuiibha akuá oso a mu diangelele, ndenge.

²⁶ Mukonda uenda jinga muʼnjila joso ja Jelobouamu monʼa Nebate, kumoxi ue ni mu ituxi ioso muene ia bhangesele na-iu Izalaiele kuta kituxi anga u thathamesa Jihova Nzambi ia Izalaiele ni makuzangata mê.

²⁷ Kutanga o ikalakalu dingi ia Omidi, mua bhitile, ni kutena kuê kuoso kuedikiza jinga, manhi ki kuosòneke mu divulu dia malunda ma jisobha ja Izalaiele?

²⁸ Anga Omidi u zeka ku mukànda ua mavu kumoxi ni ʼtata jê, anga a mu funda mu Samádia; anga o monʼê ua diiala, Akabe, u hinga ungana bhu kididi kiê.

Akabe u tumina anga u sakana ni Jezabele

²⁹ Anga Akabe, monʼa Omidi, u mateka kutumina Izalaiele ku muvu ua makuinhʼatatu ni kanake ua Aza, sobha ia Juda. Akabe, monʼa Omidi, anga u tumina Izalaiele mu makuinhʼaiadi a mivu nʼiiadi; ua kexile mu Samádia.

³⁰ Anga Akabe, monʼa Omidi, u bhanga kiaibhila Jihova ku mesu mê, hé u beta muene dingi kubhanga kiaiibha ene oso a mu diangelele, ndenge.

³¹ Anga ki bhita kuma (kifua ua fika kima kiofele kia bhange, kia kuenda mu ituxi ia ta jinga Jelobouamu, monʼa Nebate) u taku dingi o kusakana hanji ni muhatu a mu ixana Jezabele, monʼa Etibahale, sobha ia akua Sidonha; anga uia mu kubhikila o kiteka kia Bahale, ni ku ki fukamena bhu pholo iê.

³² Anga Bahale u mu tungila kalatódio, mʼonzo ia Bahale ia tungile mu Samádia.

³³ Akabe anga u bhanga ue ni ditutu diê di kôla; o mukonda dia kiki, Akabe ua bhange dingi kia beta mu kuthathamesa Jihova Nzambi ia Izalaiele, o jisobha joso ja Izalaiele, ja mu diangelele-ku, ndenge.

³⁴ O mu izuua iê, muene Hiiele, mukua Betele, mua tungu dingi o sanzala ia Jedikó; anga u i kandeia o disesa, kiafu phandekumbi iê Abilame, hé u i ta o mabhitu, kiafu kasule kê Sengube, phala kutenesa kizuelu kia Nzambi, kia tangele ku ukunji ua Josuué, monʼa Nune.