I Jisobha 13 - O Mikanda Ikola

Polofeta imoxi u kalanga kuêlesa o kalatódio

¹ Kienhokio anga mu Juda mu tunda muthu ua Nzambi, uiza mu Betele ni kizuelu kia Jihova; u sanga Jelobouamu uemana bhu mbanduʼa kalatódio, mu kuoha uasu ua dizumba.

² Anga u dikola mu kuêlesa o kalatódio ni kizuelu kia tundu kua Jihova, uixi: Eie Kalatódio ka kime, kalatódio ka kime! Ngana uambe kiki: Ku hádia, mʼonzo ia Davidi, a kà vualamu mona ua diiala, ua kà kala ni dijina dia Joziia, muenhó o jinganga ja mu kuohela uasu ua dizumba ku thandu dié, ua kajisatela ku thandu dié o ku thandu dié anga à kohela-ku ifuba ia athu.

³ Mu kizuua kienhokio muene anga u bhana kijimbuete, uixi: Kiki kiene o kijimbuete kia kuila Ngana muene ua mu zuela: Talesa kuma kalatódio kaka ka-ndu baza, ka di tandula mu kaẋi, hé o utókua uala-ku, u di muangena bhoxi.

⁴ Anga ki bhita-phe, kuma, sobha kia zubha kuívua kia zuela muthu ua Nzambi, mu kuêlesa o kalatódio ka Betele, Jelobouamu u sunununa lukuaku luê ku thandu dia kalatódio, uixi: Mu kutienu. Maji o lukuaku luê-phe, lua sunuina kutuma ku mu kuta, lua kukuta, ni ku lu vutula dingi ku mukutu uê ka tena.

⁵ Anga kalatódio ka baza, hé o utókua ku kalatódio u sukumuka kala o kijimbuete kiedikizile o muthu ua Nzambi mu kizuelu kia Ngana.

⁶ Bhenhobho sobha u di kola, anga uambela muthu ua Nzambi, uixi: Ndoko samba bhu pholo ia Jihova, Nzambi ié phala u ngi diondele, mbé muene a ngi vutuile o lukuaku luami. Bhenhobho o muthu ua Nzambi anga u samba mu kudionda Ngana, sobha a mu vutuila dingi lukuaku luê, anga lu xalela dingi kala ki lua kexile mʼukulu.

⁷ Anga sobha uambela o muthu ua Nzambi, uixi: Iza nʼeme ku bhata, u nhohe-ku; eme nda ngi kubhange ujitu.

⁸ Maji o muthu ua Nzambi-phe uambela sobha, uixi: Né-mbe ua ngi bele kaxaxi ka inzo iê ioso, eme ki ngejʼuia nʼeie, né kúdia dikoka mba kúnua menha bhu kididi kiki.

⁹ Mukonda Ngana ua ngi tumina kiki mu kizuelu kiê, uixi: Kana kua kà dia kúdia mba ua kà nua menha; mba ua kà vutukila dingi mu njila i uendela.

¹⁰ Anga u di tela kiá njila iengi, o njila iejila mu kutunda ku Betele, ki iene dingi ia vutukila.

Polofeta a mu jibha kuala hoji

¹¹ Anga mu Betele mu tunga polofeta imoxi ia muadiakimi; anga anʼê eza hé a mu tangela ima ioso ia bhangele o muthu ua Nzambi mu Betele kizuuʼokio, ni maka oso a tangelele sobha, anga a a tangela tatʼâ.

¹² Anga tatʼâ ua ambela, uixi: Muene uendela njila kuẋi? Anga anʼê a mu idikiza o njila iendelele muthu ua Nzambi ua tundile mu Juda.

¹³ Bhenhobho muene uambela anʼê, uixi: Ngi telienu dikombola ku bulu. Anga a mu tela dikombola ku bulu, anga muene u banda-ku.

¹⁴ Hé uia ni kukaiela o muthu ua Nzambi, anga u mu sanga ua xikama bhoxi mu kilembeketa kia mukaluvalu, anga u mu ambela, uixi: Eie-muene u muthu ua Nzambi, ua tundile mu Juda? Kuala muene: Eme muene.

¹⁵ Muene bhenhobho u mu ambela dingi, uixi: Izá-phe tu vutuke ku bhata diami, ua kà die mbolo.

¹⁶ Muene-phe, uixi: Eme ki ngi tena kuvutka nʼeie, né ngó kua kà bokona monzo ié. Né ngó kuila ngi dia kúdia, mba ngi nua menha mu kididi kiki.

¹⁷ Mukonda kiene kia ngi tumu o kizuelu kia Ngana, kuila Kana kua kà dia-ku mbolo, mba ua kà nua-ku menha; né kualukila mu njila i uendela.

¹⁸ Anga muene u mu ambela, uixi: Eme uami ngi polofeta ni mukuenu, anjo ia ngi tangela mu kizuelu kia Jihova, uixi: Mu vutule, uize-nê ku bhata dié, nda a die-ku kadikoka ni kunua-ku tumenha. Mbe-phe ua mu tangela makutu.

¹⁹ Anga muene ualuluka, hé uiza, anga u dia mbolo mʼonzo iê anga u nua menha,

²⁰ anga ki bhita-phe kuila, ene ki a xikama ku meza, kizuelu kia Ngana kiza kua polofeta ua mu vutuile.

²¹ Anga u kolela o muthu ua Nzambi, ua tundile ku Juda, uixi: Jihova uambe kiki: Eie mukonda dia kubhukumukina o dikanu dia Ngana, eie ua kambe kubhaka o kijila kia ku tumine Jihova Nzambi ié;

²² inda ua vutuka muene, eie ua di mbolo, eie ua nu menha mu kididi ki nga ku tangelele, ngixi: Kana kua kà dia-ku mbolo, né kua kà nua-ku menha, kimbi kié ki kia kà bokona mu mbila ia jitata jé.

²³ Anga ki bhita-phe kuma, kia zubha kudia mbolo, ni kunua menha, muene u zuika dikombola ku bulu ia polofeta ia vutuile.

²⁴ Muene kia kala mu kuia, u takana ni hoji mu njila, anga i mu jibha; kimbi kiê anga ki takukila mu njila, ni bulu ia mu imanena bhu mbandu iê, ni hoji ia kexile bhu mbanduʼa kimbi.

²⁵ Anga bhu bhita athu, hé a mona mukutu ua takukila mu njila, a mona ue o hoji, ia kexile bhu mbanduʼa mukutu uê; anga eza, a ki tangela mu sanzala mua kexile o polofeta ia muadiakimi muenhó.

²⁶ Anga, kia kʼivu, polofeta ua mu vutuile mu njila u zuela, uixi: Ió muene o muthu ua Nzambi, ua bhukumukina o kizuelu kia Jihova; Ngana kiene kia mu bhela ku hoji, ia mu sasujula iii ia mu jibha, kala kia mu tangelele Ngana.

²⁷ Bhenhobho uambela anê uixi: ngi telienu dikombola ku bulu. Ene hé a i ta dikombola.

²⁸ Kienhokio uia, anga u sanga kimbi kia takukila mu njila, kumoxi ni bulu ni hoji, jemana bhu mbanduʼa kimbi; hoji mukutu ka u dile, mba kujibha o bulu.

²⁹ Bhenhobho polofeta u zangula o kimbi kia muthu ua Nzambi, anga u ki tula ku thandu dia bulu iê anga u ki ambata; kienhiki o polofeta ia muadiakimi uiza-nê mu sanzala, phala ku mu dila thambi ni ku mu funda.

³⁰ Anga u tula o kimbi kiê mu mbila iê-muène; anga a kuata ku mu tela mbundu ia kudila, exi: Uaué phangʼiamiʼé tatʼé!

³¹ Anga ki bhita-phe kuma, kia zubha ku mu funda, u tangela ue anʼê, uixi: eme uami kuila ngafu, mu ngi funda mu mbila mu a fundu o muthu ua Nzambi; mu tula o ifuba iami bhu mbanduʼa ifuba iêmuene.

³² Mukonda ni kidi muene hádia ki tenena kia dikolele muene mu kizuelu kia Jihova mu kuêlesa o kalatódio kala mu Betele, kala kiêlesele ue o jinzo joso ja ididi ia matala ma di leka jala mu jisanzala ja Samádia.

³³ Kia zubha ku bhita ima ioso iii, Jelobouamu kuenda kiaiibha ka kueha; inda uexana dingi athu a beta kusebuluka mu kifuxi hé u a bhanga jingana ja ididi ia matala; hé uia ni kuila uoso a mu andala u mu izalesa lukuaku, anga u mu bhanga ue kiá nganga ia kusatela ku ididi ia matala a di leka.

³⁴ Kienhiki anga ki di bhanga ndònda ia kituxi mʼonzo ia Jelobouamu, kia bhekela ku i buidisa ni ku i jimuna mu ngongo.