I Jisobha 12 - O Mikanda Ikola

Lobouamu u bhekela miji ku di uanununa

¹ Anga Lobouamu uia ku Xikeme, mukonda o Izalaiele ioso ejiie mu Xikeme phala ku mu hingisa muene ku usobha.

² Anga ki bhita-phe kuila, Jelobouamu, monʼa Nebate, u kʼivua, mu Ijito hanji muala (mukonda muene ua lengele bhu pholo ia sobha Salomá, anga u kala mu Ijitu).

³ Hé a katula athu, anga a tuma ku mu ixana. Muene anga u tunda ku Ijitu, uiza kumoxi ni kionge kia Izalaiele anga a zuelesa Lobouamu, exi;

⁴ Tatʼenu ua nemesene kiavulu ophi ietu; eie-phe, kiki, sosolola o ubhika ua bhuiza ua tu tele tatʼenu, ni kinemenu kia ophi ia tu tuikile, mbé tu xikamene o ku ku bhikila jinga.

⁵ Anga muene u a ambela, uixi: Ndenu, mu bhitisa izuua itatu, anga mu ngi sanga dingi. Anga kifuxi ki di muanga.

⁶ Anga sobha Lobouamu mu kusola kaiula u kala ni kionge ni adiakime a kexi mu kubhikila bhu pholo ia tatʼâ. Solomá, kioso kiala hanji ku muenhu, uixi: Phangu iahi i mu ngi bhana ni ngi mono kia kuvutuila athu iá?

⁷ Ene anga a mu ambela, exi: Eie lelu se u tolokela athu iá, nʼu di te bhu kididi kiâ, kala u mubhika uâ, anga, o mu ku a vutuila u a zuelela makʼambote, ene uâ a-ndu ku kalakalela jinga izuua ioso.

⁸ Muene-phe u xia o phangu ia mu bhana ku adiakimi, anga u kala dingi ni kionge kia minzangala ni akuá, a kudila-nê kumoxi, a nanga jinga na-u bhu pholo iê.

⁹ Anga u a ambela, uixi: Kiebhi, enu phangu ienu iahi i mu ngi bhana ni ngi vutuila athu iá, a ngi zuelesa, exi: Tu sosolole ophi ia tu tuikile tatʼenu?

¹⁰ Anga minzangala a kudila-nê kumoxi a mu ambela, exi: Athu iá, a ku zuelesa, ia edi exi: Tatʼenu ua nemesene kiavulu ophi ietu, eie-phe sosolola-iu ku thandu dietu; ua kʼambela kiki: “Mulembu uami ua kathetheke ua beta dingi kukoma kinhonga kia tatʼetu ndenge

¹¹ Uila kiki, se tatʼetu ua mi tuikile ophi ia neme, ophi ienu eme hanji nga-ndu i bandekeza dingi; se o tatʼetu ua mi beta jinga ni jisanzu, eme-phe nga-ndu mi beta jinga ni jingìnga.”

¹² Kutula mu kizuua kia katatu-phe. Jelobouamu uiza kumoxi ni athu oso, kua Lobuamu, kala kia zuelele muene sobha, uixi: Mu ngi sanga kizuua kia katatu.

¹³ Anga sobha u vutuila kifuxi ni kuthathamana kuoso, mukonda ua xile phangu ia mu bhele o ikulakaji.

¹⁴ Anga u a zuelesa mù kaiela phangu ia mu longesa minzangala uixi: Tatʼetu ua nemesene kiavulu ophi ienu, eme-phe ophi ienu nga-ndu i bandekeza hanji: tatʼetu ua mi beta jinga ni jisanzu, eme-phe nga-ndu mi beta jinga ni jingìnga

¹⁵ Sobha-phe ka bhana mátui ku kifuẋi, mbata o kubaluka kuku kua kexi mu tunda muene kua Jihova, phala Ngana kutenesa o kizuelu kiê kia tangele mu ukunji ua polofeta Ahiia, mukua Silo, kua Jelobouamu, monʼa Nebate.

Dikuinhi dia miji a kaiela Jelobouamu

¹⁶ Izalaiele ioso-phe kia mono kuma, sobha ka a bhana mátui, athu oso a mu vutuila, exi: Mbandu iahi i tuala na-iu ni Davidi? Kua monʼa Jese kana-ku undundu uetu, Ndé ku jifundu jenu, eie u Izalaiele! Kindala soka ni dibhata dié, eie u Davidi. Bhenhobho Izalaiele ioso a di muangena ku jifundu jâ.

¹⁷ Kuiza-phe ku anʼa Izalaiele a kexile mu jisanzala ja Juda, ene ngó a xalela ni sobha Lobouamu, monʼa Solomá.

¹⁸ Bhenhobho sobha Lobouamu u a tumukisa Adolame, a mu tele mù tambula o lubhaku; Izalaiele ioso-phe anga a mu bûba ni matadi, hé ufua. O Seba Lobouamu-phe kia ki mono, u lenguluka kubanda mu dikalu diê anga ulengela mu Jeluzaleme.

¹⁹ Kiene kia di batuka akua Izalaielʼiki ni dibhata dia Davidi katé mu kizuua kia lelu.

²⁰ Anga ki bhita-phe kuila, kia zubha Izalaiele ioso kuívua kuma Jelobouamu, ua vutuka, ua tundu kiá ku Ijito, a tuma ku mu ixanena bhu kionge, anga a mu bhanga sobha ia Izalaiele ioso. Kienhokio kana-ku dingi muthu ua kaiela o dibhata dia Davidi, kikale o muiji umoxi ngó ua Juda, kuabhu.

Nzambi u fudisa Lobouamu kúlua ita ni kuinhi dia muiji ia Izalaiele

²¹ Lobouamu kieza-phe mu Jeluzaleme, u bhongolola o dibhata dioso dia Juda ni muiji ua Bejamí, hama ni makuinhi nake a midi ia muthu, malʼòsole kiambote ejidila kulua ita phala kuia mu kubhânga ni dibhata dioso dia Izalaiele, nda a a vutuile dingi ku ungana ua Lobouamu, monʼa Salomá.

²² Maji mu kuiza-ku-phe kizuelu kia Nzambi kieza kua Semaia, muthu ua Nzambi, kixi:

²³ Tangela Lobouamu monʼa Solomá, sobha ia Juda, ni inzo ioso ia Judá, ni Bejamí ni kifuxi kia xala-bhu, uixi:

²⁴ Jihova uambe kiki: Ki mu bande, mba mua kà bhanga ita ni phange jenu, o anʼa Izalaiele; Vutukenu kala muthu aie ku bhata diê, mbata kima kia mu bhita kiki eme muëne nga ki bhange. Ene anga evua kia zuela Ngana, anga a vutuka kala kia a tangela o kizuelu kia Jihova.

Jelobouamu u kala mubhezi a mahamba

²⁵ O Jelobouamu-phe anga u tunga Xikeme, ku mulundu ua Efalaime, muene anga u kala kuenhoko; o kia bhange thembu anga u tunda-ku, hé u tunga Penuuele.

²⁶ Anga Jelobouamu u zuela ku muẋima uê, uixi: Kindala o ungana ua-ndu vutukila dingi monzo ia Davidi.

²⁷ Kuma athu iá se a banda mu Jeluzaleme mu kusatela monzo ia Jihova, muẋima ua athu iá ua-ndu lunguluka hé a di banda kua ngana iâ, Lobouamu, sobha ia Juda; eme-phe anga a ngi jibha, ene anga a vutuka kua Lobouamu, sobha ia Juda.

²⁸ Sobha anga ki mu bhekela kutambula phangu, kuma kia zubha kuxinganeka kiambote o imiʼii, u iudika ngombe jiiadi ja ulu; anga u tangela kifuxi uixi: Mua-ndu tala hadi ia vulu, o kubanda katé mu Jeluzaleme; tala-ze kunu o jinzambi jé, eie u Izalaiele, ja ku katula mu ixi ia Ijito.

²⁹ Anga u tula imoxi mu Betele hé uimika iamukuá mu Dane.

³⁰ Kima kiki kia bhange anga ki kituka kituxi; mbata athu a kala mu kuia jinga katé mu Dane mu kubheza o kangombe ka ulu.

³¹ U bhanga ue jinzo ja kubhezela mu ididi iala matala a di leka; anga u bhanga ue o jinganga ku athu a ngoho oso-oso mu kifuxi, kʼa tokalele ku anʼa Levi.

³² Anga Jelobouamu, u bhanga fesa bhu mbeji ia kanake, mu kizuua kia kuinhi ni kitanu ku mbeji, mukua ni fesa ia kexi mu bhanga mu Juda, anga u satela ue ku kalatódio; hé u bhanga ue kiòmuene mu Betele, ni kubhakuila jisata ku jingombe ja bhangele. O mu Betele ue ku ididi ia matala a di leka ia bhangele, ua te-ku ue jinganga.

³³ Anga u banda mù satela ku kalatódio ka bhangele mu Betele, mu kizuua kia kuinhi ni kitanu, kia mbeji ia solele muene ku muẋima uê; kienhiki hé u bhangela anʼa Izalaiele fesa anga u satela ku kalatódio, uoha uasu ua dizumba.