I Jisobha 11 - O Mikanda Ikola

Kubheza mahamba kua Solomá ni njinda ia Nzambi ku thandu diê, mukonda dia ahatu a tokala ku jixi jengi a sakanene na-u

¹ Sobha Solomá anga u dizola ni ahatu avulu akua jixi jengi, akua Mouabhe, ni akua Amone, ni akua Idumeia, ni akua Sidone, ni akua Hiti, ku thandu dia monʼa Falaó, a sakanenenê kiá.

² O akua jixi joso ja kidikile Ngana ku anʼa Izalaiele, kuma; Enu ki mua ka bokona mu kusakana ni ahatu ió, o ene ua ka ka bokona mu kusakana ni ahatu ko kuenu; sumba a kà diangula mixima ienu nda mu kaiele o jinzambi jâ. Ahatu iá-phe Solomá ene a sakanene-nâ mukonda dia ku a uabhela kinéne.

³ Sobha Solomá anga u kala ni hama sambuadi ia ahatu, anʼa jingana, ni hama jitatu ja akama; anga akajʼê a mu diangula o muẋima.

⁴ Mukonda ki bhita kuma, Solomá kia kukuka kiá akajʼê a mu diangula o muẋima uê, hé u kuata kiá kukaiela jinzambi jengi; anga kua Ngana dia Nzambi iê muẋima uê u dituna kiá kutenena, kala kia tenenene o muẋima ua tatʼâ Davidi.

⁵ Mukonda Solomá ua kaiela kia o dihamba dia Axitalote, nzambi ia muhatu ia akua Sidone; ni kukaiela ue Milikome, o kisunji kia akua Amone.

⁶ Kienhiki Solomá anga u bhanga kiaiibha ku mesu ma Ngana mukonda ka kolokota mu ku kaiela Ngana ni ufiiele kala tatʼâ Davidi.

⁷ Bhenhobho Solomá, ku mulundu uala ku pholo ia Jeluzalame hé u tunga-ku kididi kia ditala, phala Kamo, o kisunji kia akua Mouabhe, ni kia Moloke, o kisunji kia anʼa Amone.

⁸ Ahatuʼê oso a akua matumbu anga u a bhangela kienhiki; ene anga a kala mu kuohela jinzambi jâ uasu ua dizumba ni ku ji satela.

O njinda ia Nzambi kua Solomá

⁹ Kienhiki Ngana anga ki mu bhekela kuthathamena Solomá; mukonda ua bhambuile o muẋima uê kua Jihova Nzambi ia Izalaiele, ió ua mu tukulukilile mu luiadi luosʼulu.

¹⁰ Ni ku maka enhá kia mu kidikile kuala Ngana uixi kana kuenda jinga ni kukaiela jinzambi jengi. Maji o muene-phe, kia mu tendelela Ngana, ka ki aiuka.

¹¹ Kia bhekela Ngana kuambela Salomá, uixi: Mbata eie ua bhange kienhiki, eie ua fulu kubhaka o kikutu kiami, mba ngó kualuka o ijila i nga ku xindila, o utuminu uaʼxi iii nga-nda ku ku katula-u, anga ngi u bhana kua mubhikʼé.

¹² Maji kioso ki uala hanji eie ku muenhu, ki nga-ndu ki bhanga-phe mukonda dia henda i nga kuatela tatʼenu Davidi; maji kioso ki u kala bhu lukuaku lua monʼé ua diiala, kiene ki nga-nda ku u katula.

¹³ Ungana uoso-phe ki nga-nda ku mu tambula-u, maji kua monʼé ngi xa-ku muiji umoxi, mukonda dia henda i nga kuatela Davidi, o ngunza iami, ni mukonda dia henda i nga kuatela Jeluzaleme nga mu sola.

Nzambi u funhisa athu ku di kuata ni Salomá

¹⁴ Ngana-phe anga u balumuna Hadade, mukua Edomo, mu kukala nguma ia Salóma; muene ua kexi mukua mbutu ia sobha ia Edomo.

¹⁵ Mukonda kia bhiti kuma, kia kexile Davidi mu Edomo, anga Jouabe, mutumini ua kifuxi, u banda mu kufunda imbi, muene u jibha mala oso mu Edomo,

¹⁶ (Mbata Jouabe ua nakina-ku mbeji jisamanu ni Izalaiele ioso, katé kia buidisa mala oso mu Edomo.)

¹⁷ Hadadephe hé ulenga ni muene ni mala amoximu a akua Edomo, a tokala ku akua mbèle ia tatʼâ, anga uia-nâ mu Ijito. Kienhokio kala Hadade-phe uala hanji kamunzangala ngó.

¹⁸ Anga a katuka bhu Midiiane, hé eza bhu Palane. O bhenhobho anga ambata-bhu akua Palane amoxi-mu, anga a bhixila mu Ijito kua Falaó, sobha ia Ijito. Muene hé u bhana inzo kua Hadade, anga u mu bhana kizuelu kia ku mu bhana jinga kúdia, hé u mu bhana ue ni mikau.

¹⁹ Anga Hadade u di zola kiavulu ni Falaó, hé u sanga kiadi kiavulu ku mesu a Falaó; katé kia bhangesa ku mu bhana kusakana ni huediê ia muhatu ndengʼia mukajʼê, ndengʼia Na Mvale, Tafene.

²⁰ Anga ndengʼia Tafene u mu vualela monʼê ua diiala dijina diê Jenubate, anga o mona muenhú Tafene u mu sasela mʼonzo ia Falaó. Jenubate anga u kala mʼonzo ia Falaó, muʼaxaxi ka anʼa Falaó.

²¹ Hadade-phe kievu mu Ijito kuila Davide ua zeka kiá ku mavu kumoxi ni jitata jê, o Jouabe, ua kexe mutumini ua kifuxi, a mu jibha, Hadade uambela Falaó, uixi: Ngi Sule, nda ngiie kʼoxi ietu.

²² Falaó-phe kia kʼivu u mu ambela, uixi: Abha kua ku kambe kima kiahi mʼonzo iami, kiala ku ku sotesa kuia kʼoxi ienu? Kuala muene: Kana kima kia ngi kambe. Sumbala-phe kiene, maji ngi Sule, ngiie kʼoxi ietu.

²³ Solomá, Nzambi ua mu balumuina ue dingi nguma iamukuá, muene Lezone, monʼa Eliiada, ua lengele kua ngana iê Hadadezele, sobha ia Zoba.

²⁴ Muenhú ue u di bhongoluela athu kuia mu kúlua-nê, muene anga u kala mu tumina o kibuka kia makuenze enhó, kioso Davidi kia jibhile ndumba ia athu; ene anga aia mu Damasku, hé a kala muenhomo, anga u kala mu tumina mu Damasku.

²⁵ Anga u kala mu di kuata jinga ni Izalaiele izuua ioso ia Solomá, ku thandu dia phulu ue ia kexi mu bhanga Hadade, mukonda dia kuzemba Izalaiele, kuma Hadade muene ua kexi sobha ia Sídia.

²⁶ Katé ni Jelobouamu, monʼa Nebate, mukua Efalata, mu Zelede mubhika mukua mbèle ia Salomá (ua kexile ni mamʼâ, mutudi, dijina diê Zeluua) muenhú ua zangula ue o lukuaku luê mu kúlua ni sobha Solomá.

²⁷ Bhua tundile ndonda, ia kuzanguila sobha lukuaku luê, bhenhabha: Mukonda Salomá ua tungile Milo, anga u xita misula ku kimbaka kia sanzala ia tatʼâ, Davidi.

²⁸ Jelobouamu anga u kala munzangala ua dizonda: Salomá kia mono munzangala iú, kuma mukalakadi ua nguzu, u mu ta ku pholo ia kutumina kikalakalu mu dibhata dia Zuze.

²⁹ Mu kithananganʼomo-phe anga ki bhita kuila, Jelobouamu u tunda mu Jeluzaleme, anga u takana ni polofeta Ahiia, mukua Silo, kiiadi kiâ mu njila ubheka uâ mu iangu, polofeta-phe ua zuata kizuatu kia ubhe.

³⁰ Ahiia anga u kuata o kizuatu kia ubhe kia zuata ku mukutu uê, anga u ki tandujula mu kuinhi dia itetele nʼiiadi.

³¹ Anga uambela Jelobouamu, uixi: Eie tambula-bhu dikuinhi dia itetele, mbata o Ngana, Nzambi ia Izalaiele, uambe kiki: Hádia ngi tandula ungana uala bhu lukuaku lua Salomá, eie hé ngi kubhana-ku dikuinhi dia miji.

³² Maji muene-phe ua kà tambula-ku muiji umoxi, mukonda dia henda i nga kuatela ngunza iami Davidi, ni mukonda dia henda i nga kuatela Jeluzaleme, o sanzala i nga tungula ku miji ioso ia Izalaiele.

³³ Mukonda Solomá ua ngi xisa iú uaii mu kubheza Axitalote, o nzambi ia muhatu ia akua Sidone, ni Kamo o nzambi ia akua Mouabhe, ni Milikome, o nzambi ia anʼa Amone. Nguaiê kuendela mu njila jami, ni a bhange kia iukila ku mesuʼami, ni kualuka o ijila iami ni itumu iami, kala kia bhanga jinga tatʼâ Davidi.

³⁴ Sumbala kiene, maji ku ungana iú-phe ki nga-nda ku tambula-ku kima bhu lukuaku lua Solomá, mukonda muene-phe nga mu bhange, kukala kilamba izuua ioso ia muenhu uê, mukonda dia henda i nga kuatela ngunza iami Davidi, ió nga mu tungula, mbata muene ua bhakele jinge o ijila iami ni itumu iami.

³⁵ Inda ungana-phe nga kà u tambula kiá bhu lukuaku lua monʼê ua diiala, anga nga kà ku bhana-ku eie, o dikuinhi dié dia miji.

³⁶ O monʼê anga nga kà mu bhana-ku ngó muiji umoxi; sembele o ngunza iami, Davidi, a kale jinge ni muanga bhu pholo iami mu Jeluzaleme, o sanzala i nga tunguila kutula-mu o dijina diami.

³⁷ Eie-phe nga kà ku zangeleka, ni ua kà kale ngana ia kutumina ima ioso ia Seme o muenhu ué; anga ua kàla u sobha ia Izalaiele.

³⁸ Anga kia kà kala-phe kuma, eie se uívua ioso i ngi ku tuma, ni uendela mu njila jami, nʼu bhange kia iukila ku mesu mami, mu kubhaka o itumu iami ni ijila iami, kala kia bhanga jinga ngunza iami Davidi, eme ue nga kà kala jinga nʼeie, anga nga kà ku tungila inzo ia kuatenena kiambote, kala i nga tungila Davidi, o Izalaiele nga kà ku bhana-nê.

³⁹ Mùkonda dia kienhokio, o mbutu ia Davidi nga-nda ku i talesa hadi, maji ki nga a tatesa-phe kiá katé ni ku hádia.

⁴⁰ Bhene bhua tundile Salomá kusota kujibha Jelobouamu; maji Jelobouamu-phe u balumuka, anga u lengela mu Ijitu, kua Sizake, sobha ia Ijito; anga u kala mu Ijito muenhomo katé kiafu Salomá.

O kùfua kua Solomá

⁴¹ Ikalakalu dingi iamukuá ia Salomá, ni ima ioso dingi ia bhangele ni kuijiia kuê, manhi ki iòsoneke mu divulu dia ikalakalu ia Salomá?

⁴² Anga kithangana kioso kia Salomá kia nakina ku ungana ua Izalaiele ioso mu Jeluzaleme, ki tena makuinhʼauana a mivu.

⁴³ Anga Salomá u zeka ku mukànda ua mavu kumoxi ni jitata jê, anga a mu funda mu sanzala ia tatʼa Davidi; anga monʼê ua diiala Lobouamu, u hinga ungana bhu kididi kiê.