I Jisobha 10 - O Mikanda Ikola

Sobha ia Saba ia muhatu u kunda Solomá

¹ Anga Na Mvuale ia Sabá kievu o fuma ia Solomá ni kutumbula dijina dia Jihova uiza ku mu lolela mu ifika.

² Anga u bhixila mu Jeluzaleme ueza ni kifuxi kia dikota; ni jikamelo kua longo ima ia kutoua ia mazumba, ni ulu ua nzungule, ni matadi a te kiavulu; hé uiza kua Solomá anga u mu zuelela ioso ia mu kexile ku muẋima uê

³ Anga Solomá u mu vutuila o maka mê moso; sobha kana kima kia mu bhonzo iu ua lémbua ku ki vutuila o muhatu ió

⁴ Na Mvuale ia Sabá kia mono o kuijiia kuoso kua Solomá, ni inzo ia tungile,

⁵ ni mákudia ku meza mê, ni uxikamenu ua akua mbèle iê, ni ukexilu ua idia-meza iê ni izuatu iâ, ni akua nganza jê, ni dibandelu diê, bhua kexi mu bandela kuia mʼonzo ia Ngana mu bhakula jisata, uívua ni nzumbi moxi ia senduka.

⁶ Anga uambela sobha, uixi: Maka a fuma ié a kidi u ngevua jinga koxi iami, kia tange o ima ié ni kuijiia kué.

⁷ Maka ió eme ki nga a xikanene katé ki ngeza, eme nga di muena-kiu ni mesuʼami; nga mono-phe kuma ka ngi tangela kaxaxi, mukonda eie ua somboka mu kuijiia ni mu fuma ia jimbote joso ji ngevu.

⁸ Azediua o athu é, azediuia o akua mbèle ié iá, ala bhu pholo ié izuua ioso, mu kuivua jinga o kuijiia kué!

⁹ Jihova, Nzambi ié, ataneku! Ió ua ku uabhela eie, iu ua ku solo phala ku ku tula ku kiandu kia Izalaiele; mukonda Ngana ua zola Izalaiele ni ku hádia ni hádia, kiene kia mubhangesa ku ku bhanga sobha, nda u bhange kia mu uabhela muene ni kubatula milonga ni kuiuka.

¹⁰ Anga u bhana kua sobha hama ni makuinhʼaiadi a talendu ja ulu, ni ndumba dia ima ia mazumba ia kutoua, ni matadiʼa te kiavulu. Nuka kuejile ima ia mazumba ia kutoua ia ndumba, kala ia bhele Na Mvale ia Sabá kua sobha Solomá.

¹¹ Jinaviu ja Hilamu ue, ja kexi mu tunda ku Ofidi ni ulu, ji kala mu bheka miẋi ia nzungule ia Sândalo, ni matadi a te kiavulu.

¹² Anga miẋi iii ia Sândalo sobha u bhanga na-iu jiphapha ja kuxitila ku inzo ia Ngana, ni ku inzo ia sobha muene, u iudika na-iu ue tukoxi ni jimbànza ja jingimba; nuka kuejile miẋi ioio ia sândalo, mba i moneka-ku dingi katé kizuua kia lelu.

¹³ O sobha Solomá anga uila: O ima ioso ia mu bhingile Na Mvale ia Sabá ia mu kexi mu hânji iê ua mu bhana-iu, o ku thandu dia ioso ia mu bhele kiá ua te-ku dingi iavulu muene ia kexi mu umvuama ua muene sobha Solomá. Bhenhobho Na Mvale u katuka kiua anga u vutuka kʼoxi iê, muene ni akua mbèle iê.

O umvuama ua Solomá ni fuma iê

¹⁴ Anga o ulu ua kexi mu bhekela Solomá ku muvu ni muvu kunema kuê ku soka hama jisamanu ni makuinhʼasamanu a talendo ja ulu;

¹⁵ ku thandu dia ulu iú, kua di ta jinga dingi o ulu ua akua kufuna, ni ua kusumba ni akua kuzunza, ni ua jisobha joso ja Alábia, ni ua jinguvulu ja ixi ieneʼoio.

¹⁶ Sobha Solomá hé u bhanga ue dingi hama jiiadi ja jingubu jònene ni ulu uòbete kiambote; u tuma kuila a pezala hama jisamanu ja sikulu ja ulu jiia mu ngubu imoxi;

¹⁷ kiene ue muene kia bhangesa dingi hama jitatu ja jingubu ja ulu uòbete kiambote; anga u tuma kuila a ji pezalela mina jitatu jiia mu ngubu imoxi; anga sobha u ji bhaka mʼonzo ia ditutu dia Libano.

¹⁸ Sobha hé u bhangesa dingi kiandu kionene kia mazu a nzamba, anga u ki kembesa ni ulu uazele kiambote ua fina.

¹⁹ Kiandu kiki ki kala ni maxikata a matala asamanu, anga o dixamenenu dia kiandu ku dima dié di kala mukondo, anga ki kala ni kua kuxamenena ue maku, mbandu ni mbandu maxamenenu aiadi; anga a ta hoji jiiadi ji kala bhu mbandu ia maxamenenu enhá.

²⁰ Kuinhi dia hoji ni jiiadi ja kexile ue kuenhoko ku matala asamanu a maxikata, ku mbandu hoji jisamanu ku mbandu hoji jisamanu. Nuka a bhangele-ku ufunu ua difu kiki mu maungana oso.

²¹ O itutu ioso ue ia kunuina ia sobha Solomá ia kexile ia ulu, ni itutu ioso mʼonzo ia ditutu dia Libano ia kexile ia ulu uozunze kiambote. Ku sange-mu ima ia phalata, mukonda mu izuua ia Solomá o phalata ki ia tele kima.

²² Mukonda o sobha ue ua kexile ni jinaviio ja Talxixi ku musanza ua kalunga kumoxi ni jinavio ja Hilamu. Ji ja kexi mu vutuka lumoxi ku mivu itatu kutunda ku Talxixi, ni kubheka ulu ni phalata, ni mazu ʼa nzamba, ni jihima ni jipavá.

²³ Kienhiki sobha Solomã hé u tunda o jisobha joso mu ngongo, kixi mu maumvuama kala mu kuijiia,

²⁴ mundu uoso anga a sota kumona o pholo ia Solomá, ni kuívua o kuijiia kuê, kua mu tele Nzambi ku muẋima uê.

²⁵ Anga athu oso a kuata ku mu bhekela muthu ni muthu ni ujitu uê ua itutu ia phalata ni itutu ia ulu, ni izuatu, ni ibhakatu, ni ima ia mazumba ia kutoua, ni jikabalu ni jimula. Anga a kuata kubhanga kienhiki muvu ni muvu.

O uenji ua ta jinga Solomá ku tubalu ni makalu

²⁶ Solomá hé u bhongolola ue ndumba ia makalu ni athu endela ku jikabalu, hé u kala ni midi ni hama jiuana ja makalu ni kuinhi dia midi ni midi jiiadi ja athu endela ku jikabalu; anga u a uanena mu jisanzala ja makalu, o amukuá a xala ni sobha mu Jeluzaleme.

²⁷ Anga sobha u bhangesa kuila mu Jeluzaleme mu izala ni phalata kala matadi; o misédulu mu kuvula, u fika kala mikuzu iala mu mikáu ku matutu.

²⁸ Anga Solomã a kala ku mu takanena jikabalu ja Ijito; anga afuni a sobha a kala ku ji tambula mu ilunga ilunga, kilunga ni suilu iê, kilunga ni suilu iê.

²⁹ Anga dikalu dia Ijito a kala ku di sumba mu hama jisamanu ja itadi ia phalata, o kabalu mu hama ni makuinhʼatanu; anga sobha joso ja Hiti ni jisobha ja Sidia, ji kala mu sumba ni ene kienhiki.