I Jisobha 1 - O Mikanda Ikola

O ukukilu ua Davidi

¹ Kiki kuila sobha Davidi ua kuka kiá, ua bhange kiá mivu iavulu, uabokona kiá mu izuua iê iasukidila-ku, ela a mu futa mavunga, maji-phe mu mukutu uê ki mu xikina kuiza munza, lémbué!

² Akua mbèle iê anga a mu ambela, exi: Kùku, a ku sotele monʼa kilumba uoso uala hanji muzeletete, a kale mu ku ku xibhidila, ni ku ku tambula konda; nda u zeke bhu jihata jé, u muenexi, phala o mu mukutu mu kuize o munza.

³ Kala kiki, aia mu sota kilumba kiauabha kiambote, ku jimbámbe joso ja Izalaiele, anga a sanga Abisaki, mukua Suneme, anga a mu bheka kua muenexi.

⁴ Monʼa kilumba muenhú u uabha kiavulu muene; anga u kala mu tambula konda ia muenexi, hé uia ni ku mu xibhidila; maji muenexiphe katena ku mu ijiia.

Adoniia u bhûnda o kiandu kia ungana

⁵ Thembu ienʼoio Adoniia, monʼa Hakiti, u di zangeleka, uixi: eme-muene ngi hinga o ungana; anga u iudikisa makalu, u sota akua jikabalu, ni makuinhi atanu a muthu enda ni ku mu tuamenena mu kuenda.

⁶ Tatʼâ tundiʼé ukulu, kene ku mu fudisa kima, kene ku mu ila ngó: Kiki ua ki bhangela-hi? Muenhú diiala muene dia disanze, o mu ku mu tala, uauabha kiavulu o pholo, ua kaiela ku kunda dia Abisalone mu ku a vuala.

⁷ Anga u ta kikutu ni Jouabe, mona Zeluia, ni nganga Abiiatale; ene anga a mu kaiela phala ku mu banda.

⁸ O Nganga Zadoko-phe, ni Benaia monʼa Jehoiada, ni polofeta Natane, ni Ximei, ni Lei, ni mazonda oso a tokala ni Davidi, ka zuama-ku kua Adoniia.

⁹ Adoniia anga u jibha jimbudi ni jingombe, ni ibhaku ia jisevadu, bhu Ndánji ia Nhoka, bhua zukama ni bhu tabhu dia kusukuila (Eni-rokele); hé u ixana o phange jê joso anʼa muenexi, ni akua Juda, a tokala mu mbèle ia muenexi.

¹⁰ Maji o polofeta Natane-phe, ni Benaia, ni mazonda, ni phange iê Solomá, ka exana.

¹¹ Natane anga u zuelesa Bete-seba, mamʼâ Solomá, uixi: Eie kua kʼivua kuila Adoniia, monʼa Hakiti ua hingi ungana, maji o muenexi-phe, na Davidi ka kʼijiia?

¹² Kiki-phe, nga ku diondo, izá ngi ku longe phangu, phala u bhulule o muenhu ué èʼmuene, ni muenhu ua monʼé Solomá.

¹³ Ndé kindala kienhiki kua sobha Davidi, u mu ambele, uixi: Kùku, eie kua ngi lokela, ngi kahatu ké, kuila Solomá monʼé, muene hinu u ku bhingana ku ungana, hé u xikama bhu kiandu kié? Kia bhiti-phe kiebhi, Adoniia lelu muene ua hingi o ungana?

¹⁴ Kioso-phe eie ki u kala mu zuela kiókio ni muenexi, eme uami ngi ku kaiela-ku, hé ngi ku lungisa mu kuzuela kué, kífua nga ku zubhila maka.

¹⁵ Bete-seba anga u bokona kua muenexi mu xilu; muene-phe ua kuka kiá kiavulu muene; kienhokio, Abisaki mukua Suneme, muene ua kexi mu xibhidila muenexi.

¹⁶ Bete-seba anga u bhetama u diundila muenexi, anga u zuela, uixi: Kuambeʼá? Ua mesena-hi?

¹⁷ Muhatu anga u mu ambela, uixi: Ngana iami, eie-muène ua ngi lokela, ngi kahatu ké, mu dijina dia Jihova, Nzambi ié, uixi: Solomá, monʼé, hinu muene u ku bhingana ku ungana, muene u xikama bhu kiandu kié.

¹⁸ Kiki-phe Adoniia ua hingi ungana; eie-phe, kùku, ngana iami, kua kʼijiia.

¹⁹ Ua mono, ua jibha jingombe ni ibhaku ia sevadu, ni jimbudi ja nzungule, iu uexana o ana oso a muenexi, ni nganga Abiiatale, ni Jouabe, kabhitangu ka kifuxi, maji o mubhikʼé-phe Solomá ka mu ixana.

²⁰ Kiki-phe, kùku, ngana iami, o mesu a Izalaiele ioso ala kokué, eie-muène a ku kinga ku a ambela uoso u tokala ku ku bhingana ku kiandu kié kia ungana.

²¹ O ki u kamba ku ki bhanga, hádia ki ua kà zekela kumoxi ni a-tatʼenu, kùku, ngana iami, ni eme ni monʼami Solomá a tu kita tu akua kituxi.

²² Bhenhabha-phe, kiosuʼiki muene hanji ua kuata kuzuela ni muenexi, polofeta Natane u bokona.

²³ Anga a tangela muenexi, exi: O Polofeta Natane iú. O muene kia zubha ubhiẋila bhu pholo ia muenexi, u bhetamena bhu pholo ia muenexi katé pholo ia tula bhoxi.

²⁴ Natane anga u zuela, uixi: Kùku, ngana iami, kífua eie-muène ua ki ambe kuila Adoniia muene u ngi bhingana ku ungana, muene u xikama bhu kiandu kiami?

²⁵ Kuma ua kulumuka kunu lelu, iu ua jibha jingombe, ni ibhaku ia sevadu, ni jimbudi ja nzungule, iu uexana o ana oso a muenexi, ni jikabhitangu ja kifuxi, kumoxi ni nganga Abiiatale; kiene ki tuala kuzuelʼiki iá a dia, iá a nua, bhu pholo iê, ala kuia ni kudikola, exi: Sobha Adoniia, a kole muenhu!

²⁶ Eme bhabha-phe, ngi mubhikʼé, ni nganga Zadoko, ni Benaia monʼa Jehoiada, ni mubhikʼé Solomá, ka tu ixana-ku.

²⁷ Kima kiki, o kuila eie-muène, kùku, ua ki bhange? Eie ua kambe kuidikiza abhikʼé, uoso u tokala kuxikama bhu kiandu kié, u muenexi, ni ku ku bhingana ku ungana?

Solomá a mu unda ku ungana

²⁸ Bhenhobho o sobha Davidi u kumbulula, uixi: Bete-seba muʼixanienu bhabha. Bete-seba anga u bokona muala muenexi, u imana bhu pholo iê.

²⁹ Muenexi anga u loka, uixi: Kola-ku Jihova, ua ngi kudila o muenhu uami mu jiphaxi joso!

³⁰ Kala ki nga ku lokela mu dijina dia Jihova, Nzambi ia Izalaiele, ngixi: Ni kidi muene Solomá monʼé, muene hinu u ngi bhingana ku ungana, muene u xikama bhu kiandu kiami; ngi ki bhanga-phe kiá muene mu kizuua kia lelu.

³¹ Bete-seba bhenhobho anga u bhetama, u tula o pholo bhoxi, u diundila muenexi, uixi: Kùku Davidi, ngana iami, a kolelè-ku o muenhu.

³² Sobha Davidi anga u zuela, uixi: Ixanenu nganga Zadoko, ni polofeta Natane, ni Benaia monʼa Jehoiada, eze bhabha. Anga a exana, eza bhu pholo ia muenexi.

³³ Muenexi anga u a ambela, uixi: Katulenu makuenze a ngana ienu, muile-nâ kumoxi, o Solomá monʼami mu mu mondalese ku mula iami, mu kulumuke-nê bhu Ngihône.

³⁴ O nganga Zadoko, ni polofeta Natane, a mu undile bhenhobho ku ungana ua Izalaiele. Mua ka xika koloneta, hé mua kèla, muexi: Sobha Solomá a laie, a kole muenhu!

³⁵ O ki mua kà zubha ku ki bhanga, mu bandela-nê kumoxi mualu kaiela ku kunda diê muene, nda eze a xikame bhu kiandu kiami, muene a kale ku usobha bhu kididi kiami; mukonda eme muene nga mu lekelela o kukala ku pholo ia Izalaiele ni ku pholo ia Juda.

³⁶ Benaia monʼa Jehoiada anga u kumbulula, uixi: Amén! Jihova Nzambi ié, muenexi, ngana iami, a ki kumbidile ʼla ki ua ki tange eie.

³⁷ O kioso Jihova kia kexile ni eie, Kùku, ngana iami, a kale ue ni Solomá, a bhangese kuila kiandu kiê ki kala kia dikota dingi, o kié eie hánji ndenge, u kùku Davidi, ngana iami.

³⁸ Bhenhobho-phe nganga Zadoko, ni polofeta Natane, ni Benaia monʼa Jehoiada, ni Makeleti ni Mapeleti, a kulumukina kumoxi, ni Solomá a mu mondalesa ku mula ia muenexi Davidi, hé a biẋila-nê bhu Ngihône.

³⁹ Nganga Zadoko hé u tunda ni lumbinga lua maji lua katula mu Balaka, anga unda Solomá ku ʼungana, hé a xika o koloneta, o mundu uoso akala mu kola, exi: Sobha Solomá a laie, a kole o muenhu.

⁴⁰ Mundu uoso anga a banda ni kukaiela ku dima diê, a kala mu xika jimbéndu hé a sanguluka ni ngalasa iavulu, katé mungongo muaditaia ni dízui diâ.

Adoniia ni mundu uê uoma u a kuata

⁴¹ Adoniia-phe ni asonhi oso ala ni muene, a kʼivua kioso kiala kuzumbuka mu kúdia. Jouabe ki evu dízui dia koloneta, uixi: Jiji jibuia jahi, mbanza ioso iedi ngó ni iene bulukutu?

⁴² Kioso-phe kiala mu zuela, Jonata monʼa nganga Abiiatale, u tula bhu kanga, Adoniia-phe anga u mu ambela, uixi: Tu sangeku! Bokona eie u muthu uambote, u dikuenze, ku kambe kuiza ni hundu iambote.

⁴³ Jonata-phe anga u kumbulula Adoniia, uixi: Kidi muene; ngana ietu sobha Davidi, ua hingisa Solomá ku ungana.

⁴⁴ Muenexi ua tumu ue nganga Zadoko, ni polofeta Natane, ni Benaia monʼa Jehoiada, ni Makeleti ni Mapeleti, ia a mu mondalesa ku mula ia muenexi.

⁴⁵ Nganga Zadoko, ni polofeta Natane ia a mu undu ku ungana bhu Ngihône; o mu kutunda kuenhoko-phe, a bande ni kusanguluka, kiene kia bhangesa mbanza ioso ku dʼitaia, kala ki muevuʼokio.

⁴⁶ Solomá-phe ua Xikama kiá bhu kiandu kia ungana.

⁴⁷ Ni akuambele oso a muenexi, eza mu tanesa sobha Davidi, exi: Nzambi ié eie, a bhane Solomá dijina di tunda o dijina dié, o kiandu kiê ki kale kia dikota dingi, o kié eie ndenge. O muenexi iu uetaia, ua sambe bhu hama bhuala.

⁴⁸ Muenexi ue iu ua zuela, uixi: Nga ki sakidila Jihova, Nzambi ia Izalaiele, ua ngi bhana muthu utena kuxikama bhu kiandu kiami kizuua kia lelu, katé muene eme nga ki mono ni mesuʼami.

⁴⁹ Asonhi oso a exanene kuala Adoniia anga a kala ni uoma, a balumuka-bhu, hé a di tela kala muthu ni njila iê.

⁵⁰ Adoniia muene u kala ue ni uoma mukonda dia Solomá; anga u tunda-bhu, uia u kuata ku jimbinga ja kalatódio.

⁵¹ Anga a ki tangela Solomá, exi; Adoniia-ze uala ni uoma ua sobha Solomá, ua mono ua kuata ku jimbinga ja kalatódio, uixi: Sobha Solomá a ngi lokele hanji lelu, kuma ka-nda ku ngi jibha ni xibhata eme ngi mubhikʼé.

⁵² Solomá-phe, uixi: Se uidikiza uthu, né lundemba luê ki lu láuka bhoxi; se a mu mona-phe ni úsueia, hinu úfua.

⁵³ Sobha Solomá anga u tuma athu, a mu katula ku kalatódio. Anga uiza, u bheza hanji sobha Solomá;