Izekiiele 9 - O Mikanda Ikola

O jikaxitiku ja Jeluzaleme

¹ Bhenbhobho hé u ngi kolela mu mátui ni dízui dia suina, uixi: Oso o makaisongo a mu tumina o mbonge a bhiẋidisienu kunu, kala muthu mata mê ma kubuikisa na-u, eze na-mu bhu maku.

² Ngi tala, kuala kuiza athu kisamanu a lungu bhu dibhitu dia di-leka, dia talela ku mbandu ia kusuku, o muthu ni muthu ni mata mê ma kubuikisa bhu maku; o mu kaxi kâ muala muthu ua zuata kizuatu kia linhu ni tindelu ia musoneki ia kutila mu phonda iê; anga a bokona, emana bhu mbanduʼa Kalatódio ka ngôndo.

³ O kubenha kua Nzambi ia Izalaiele, kua zangumuka ku thandu dia xelubini ku kua kexile, katé bhu muelu uaʼnzo; anga u kolela o diiala dia zuata o linhu, ua kexile ni tindelu ia musoneki mu mbunda iê.

⁴ Ngana hé u mu ambela, uixi: Bhita mu kaxi ka mbonge, muʼaxaxe ka Jeluzaleme, u te kidimbu bhu mabhômo ma athu oso a mu di tula muenhu ni kukema, mukonda dia isunji ioso iaiibha ialuʼia ni kubhanga athu mu kaxi ka mbonge mumu.

⁵ Akuá hé u ambela, emiʼeme ngʼivua muene, uixi: Bhite-nu mu mbonge ni ku mu kaiela, mu jibhe; diesu dienu ki di kondeke muthu, mba ku kuatela muthu henda.

⁶ A kuka jibhenu, minzangala jibhenu, ilumba ia mizeletete jibhenu, tuana tua ndenge jibhenu, ni ahetu jibhenu, katé ki mu a jimisa o mbutu; maji muthu uoso mu mu sanga ni kidimbu, ió ki mu mu bhixile; andekelenu mu dibhezelu diami muene. Anga a matekena ku adiakime ene a kexile ku pholo ia inzu ia Jihova.

⁷ Uixi: Inzu kasanesenu-iu muizalese o malumbu mê ni imbi, mu tunde. Anga a tunda a kuata kujibha mu mbonge.

⁸ Anga ki bhita-phe, kuma, kioso ene kia zubha kujibha o mbonge ioso, hé ngi subhuka ngó eme, nga di ṗhudika o pholo hé ngi di kola, ngixi: Auá! Ngana Nzambi, tata! Mbé ki bhita kuila o masubhu oso a Izalaiele u a jikinisa ni kulundulula kiki o njinda ié ku thandu dia Jeluzaleme?

⁹ Muene-phe uixi: O kuiibha kua dibhata dia Izalaiele ni dibhata dia Juda kua vulu kinene, o ixi i iezala manhinga, o mbonge iezala mangonha; ene amba, exi: O Ngana ixi ua i ambula. Kiene Ngana kia mu kambela kumona.

¹⁰ Kala kiki, eme uami ue, diesu diami ki dia-nda kukondeka muthu mba ngi kuatela henda; nga-nda kulunduluila o njila iâ ku thandu dia mítue iâ.

¹¹ Bhenhobho ngi mona muthu ua zuata o linhu, ió mu mbunda iê mua mu kexile o tindelu, ua bhixila ni mvutu, uixi: Nga bhange kala ki ua ki tumu.