Izekiiele 8 - O Mikanda Ikola

Ituxi ia isunji mu kididi kikôla

¹ Anga ki bhita kuila, mu muvu ua kasamanu, bhu mbeji ia kasamanu, mu kizuua kia katanu ku mbeji, kioso eme ki nga xikama mʼonzo iami, o adiakime a Juda a xikama ue bhu pholo iami, kiene kia ngi tulukila o lukuaku lua Ngana Nzambi bheneʼobho ku thandu diami.

² O ki nga tale, nga mono kídifua kala túbhia; tundé mu miongo katé bhʼoxi túbhia tuene; tundé mu miongo katé bhulu, kubenha kua kídifua kia utadi u luendela ua phenzuluka.

³ Anga u sunununa bheneʼobho kima kiedi kala lukuaku, ki ngi kuatela mu jindemba ja mútue; O Nzumbi ia Nzambi anga u ngi zangumuna mu dingani-dinga, hé u ngi bheka mu Jeluzaleme katé bhu muelu ua dibhitu dia lumbu lua mʼoxi, ua talela ku mbandu ia kusuku, bheneʼobho bhua tudila o kiteka kia difuba, ki bhangesa muthu ku kala ni difuba.

⁴ O ki ngi tala, ngi mona kuma o unéne ua Nzambi ia Izalaiele iú bheneʼobho, mukuâ ni kídifua ki nga muene mu honga.

⁵ Anga u ngʼambela, uixi: Eie monʼa muthu, zambula o mesu mê kindala, ku njila ia mbandu ia kusuku. Eme hé ngi zambula o mesuʼami ku njila ia kusuku, anga ngi mona ku mbandu ia kusuku, bhu muelu ua Kalatódio, bhuala kiteka kia difuba, bhu muelu bhene.

⁶ Anga u ngʼambela, uixi: Monʼa muthu, eie u monʼô, kia mu kuenda iá ni kubhanga? O maufusa a isunji ia makota ala mu kuenda ni kubhanga o dibhata dia Izalaiele bhabha, phala eme ngi sanduke ku dibhezelu diami dikola? Maji ua-nda kumona hanji maufusa ma tundu!

⁷ Anga u ngi bheka bhu dibhitu dia kimbaka: Bheneʼobho nga tale, hé ngi mona bhuala ngenda mu mutôto.

⁸ Uixi: Ndoko-phe, monʼa muthu, kanda kindala mu mutôto mueneʼomo. O ki nga kande mu mutôto, tala, muala dibhitu.

⁹ Bheneʼobho, uixi-phe: Bokona, u tale o imbamba ia isunji iaiibha ia mu bhanga ene mumu.

¹⁰ Anga ngi bokona. O ki ngʼedi suí, mu mbandu joso ku phalelu a seta-ku idifua ioso ia jinhoka ni midikixi ni ia iama ioso iaiibha kinéne, ni ia mahamba moso ma dibhata dia Izalaiele.

¹¹ Nga mono ue ni makuinhi sambuadi a muthu, ku ikulakaji ia dibhata dia Izalaiele, ala kumoxi ni Jahazaniia, monʼa Safane, ua kexi mu kaxi kâ, ia emana bhu pholo ia ima ienʼiii iòsete ku mutôto, o bhu maku mâ, muthu ni muthu ua kuata kienga kia ku uikila uasu ua dizumba; anga o kidixi kia uasu ua dizumba kiia ni kutukumuka kala dituta dia nguzu.

¹² Kieneʼokio anga u ngʼambela, uixi: Eie monʼa muthu, ua mono adiakime, o ikulakaji ia dibhata dia Izalaiele, kia muia ni kubhangela mua vundu, muthu ni muthu mu xilu diê muʼòsete ni iteka? Mbata ene amba, exi: Ngana ka tu mono. O Ngana muene ue ixi ua i ehelela!

¹³ Anga u ngʼambela dingi, uixi: Uandu mona dingi isunji ia makota iaiibha, o ia mu bhanga iá i kala ndenge.

¹⁴ Hé u ngi bheka bhu muelu ua dibhitu dia inzu ia Ngana, dia kexile ku mbandu ia kusuku, o ki ngi tala, bhuala ahetu a xikama ni kudila Tamuju.

¹⁵ Uixi: Monʼa muthu, eie u talʼô? Ua-nda kumona hanji isunji ia beta kuiibha, iii ndenge.

¹⁶ Anga u ngi bheka dingi mu kimbaka kia moxi kia inzu ia Ngana, mu ku tula-mu nga sange bhu muelu ua Tembulu ia Jihova, bhu kaxi ka lumbu luònene ni Kalatódio, bhuala athu atena makuinhi aiadi ni kitanu, o makunda mâ a ma bhela ku Tembulu ia Jihova, o jipholo a ji lungisa ku mutundila-kumbi; kienʼiki a kala mu kubheza o dikumbi, a telela o jipholo mu thunda.

¹⁷ Bhenhobho u ngʼambela, uixi: Ua mono, eie monʼa muthu? Manhi kuala dingi kima kia mukuá kia beta ku uôua mu dibhata dia Juda, o isunji iii iaiibha ia mu bhanga bhabha hé i kala ndenge? Kia zubha kuizalesa o ngongo ni kusuina, hanji a kuata ku ngi lokalala? Tala, iá bhiẋidisa muene o luthangu ku dizulu diâ.

¹⁸ Kala kiki, eme ue nga-nda ku a vutuila ni njinda ioso; o diesu diami ue ki dia-nda kukondeka mba ngi kala ni henda; né-mbe hanji a ngi kolela mu mátui ni nguzu, eme ki nga-nda kua evua.