Izekiiele 7 - O Mikanda Ikola

Zubhilu dí dʼiza! Zubhilu dí dʼiza!

¹ Kieneʼokio o kizuelu kia Jihova kieza kokuami, kuamba:

² Eie-phe, u monʼa muthu, zuela, uixi: O Jihova Nzambi ua tenge kiki ku ixi ia Izalaiele: O dizúbhilu dí-diza, dí-diza o dizubhilu ku thûngi jiuana jaʼxi.

³ Kindala-phe o dizubhilu dí-diza kokué, mukonda nga-ndu tumikisa o njinda iami ku thandu dié, anga ngi ku fundisa kala kia fuama o njila jé, o ku thandu dié anga ngi bheka-ku o maufusa mé moso.

⁴ O diesu diami ki dia kà ku kondeka, mba ngi ku kuatela henda, maji o jinjila jé joso nga-ndu ku tula na-ju ku thandu dié, o maufusa mé ma kala muene mu kaxi ké, anga mu kʼijiia kuila eme-muène ngi Ngana.

⁵ Kienhiki ki ambe Jihova Nzambi, uedi: O kuiibha, talesa-ze kuiibha ku moxiʼèlele ngoho, kua-nda kuiza.

⁶ O dizubhilu dí-diza, dí-diza o dizubhilu, dia ku balumukina eie muene, tala, dídiza.

⁷ Kuêla kué kua bhixila, eie ua tunga mu ngongo. Eie ua tunga mu ngongo, iá eza mu ku ku belesa, kithangana ki kiza; o ku milundu, kizuua kia hadi kia bhixila, ki kia kusanguluka, kana.

⁸ Ni lusolo luoso nga-ndu lundulula o njinda iami ku thnadu dié kindala, anga o kutema kuami ngi ku londekeza muene kokué, hé ngi ku fundisa kala kia tokala mu jinjila jé, o maufusa mé moso anga ngi ku tudika na-u ku thandu.

⁹ O diesu diami ki dia kà ku kondeka, mba ngi ku kuatela henda; kala kioso kia soko o jinjila jê, kiene ue ki nga-ndu ku ku xinjika dingi ku thandu, o maufusa mé moso a kà kala muʼaxaxe ké muene; nda mu kʼijiie kuila eme ngi Ngana, ngi bhana kaxitiku.

¹⁰ Talenu, o kizuua kiki kiabhuʼiki, talenu ki kiza, uíndua ué ua bhixila; o kubhanga ufusa kua sabhuka, o izala ié ia buingita.

¹¹ O kusuina kua kulu kiá ku kuate itulu, phala ku kituke mbangala ia ufusa; kala kiki, kokuʼâ ene ki kua-nda kusubhuka kima, mba ku kifuẋi kiâ, mba ku kilungutu kiâ, mba bhu kala ngó ku a dila.

¹² Kithangana ki kiza, o kizuua kié kia bhixila; uoso u sumba ka sanguluke, o ió u sumbisa ka luuale; mukonda o njinda i uama iala ku thandu dia kifuẋu kiâ kioso.

¹³ Mbata o uoso u sumbisa, kima kia sumbisa kiá, ka kà kala na-kiu dingi; né-mbe u kalʼé muene kumoxi ni athu a muenhu; mukonda o kisunji kia mono kiá, ki kia-nda kuvutuka dingi kuema, ku thandu dia mundu uâ uoso; ki bhuala ue muthu u kuatesa o muenhu uê mu kubhanga kia ibha.

¹⁴ O koloneta a i xiki kiá, ima ioso ió iudike kiá, maji ki bhuala uia ku ita, mukonda ku thandu dia mundu uâ uoso, kuala o kuuama kua njinda iami.

¹⁵ Ku kanga kuala xibhata, o moxi muala dibhebhu ni nzala; uala ku mukáu ua ká-fua ku xibhata, o uala mu mbonge ni nzala ni dibhebhu ene a-nda kua kà mu dia.

¹⁶ Kua kà subhuka ngó oso a kà subhuka momuʼâ, maji a kà di uanena ku milundu uila membe a jihonga, ene oso a kuata o kukema muthu ni muthu, mukonda dia kuiibha kuá.

¹⁷ O maku moso ma kà botomoka, o jiphuna joso ja kà zunzumuka menha.

¹⁸ Anga a ka di-kuta jisaku, o kiteketela kia kà a vungina; o ku jipholo joso kua kà kala jisonhi, o mu mítue ioso mabhaia.

¹⁹ O phalata iâ a kà i takuila ngó mu jinzunga, o ulu uâ ua kà kituka ditobe; ní, o phalata iâ, mba o ulu uâ, ki ua kà tena ku a bhulula bhu kizuua kia njinda ia Jihova; iene ki ia kà tena kuizalesa o mienhu iâ mba i tena kuikutisa o mavumu mâ, kuma iii ia kexile iene o kifudisu kia kuiibha kuâ.

²⁰ O matunda ma makembu mâ, muene ua ma tula ku unéne; maji ene a bhangemu iteka ia maufusa mâ ni isunji ki i xikina ku i tanga; kiene ue eme ki nga a lunguluila kala kima kia bolo phala ene.

²¹ O matunda enʼiá a kà a bhakula bhu maku ma athu engi nʼa kale mbole iâ, ni bhu maku a ingumba nʼa kituka manonena mâ; anga a kuata ku ma sebulula kiá.

²² Hé ngʼa a suekela o pholo iami, ene anga a sebulula ni kididi kiami kia kasuèkele; kuma abhundi a kà bokona muenhomo, anga a ki sebulula.

²³ Eie bhanga lubhambu, mukonda o ngongo iezala ituxi ni manhinga, o mu mbonge muezala kusuína.

²⁴ Anga ngʼixana athu a beta kota mu kuiibha, ene mu kaxi ka miiji ku mundu, ene a kà tunga mu jinzu jâ; anga ngi buisa-ku o kuzangalala kua mazonda, o ididi iâ ikôla ia kà sebuluka.

²⁵ O kibuika kí kiza; ene a kà sota o kutululuka, maji o kutululuka ka ku mono, lémbua.

²⁶ Kua kʼèza uíndua mu uíndua, anga kua kà balumuka kilungutu mu kilungutu; kienhokio-phe a kà sota polofeta phala ku a tangela kisukila, maji o nganga katé ni kitumu kia kà mu jimba muene lalá, o adiakime a lémbua o kaiula.

²⁷ Sobha ua kà di-kuata mukondo, o Kilamba kia kà zuata kubhindama, o maku ma athu mu ixi a kà di-kuata kimbula-mbula; kioso kiala o jinjila jâ eme ue kiene ki nga kà a bhanga, o mu mabatuilu mâ muene ue mu nga kà a batuila ene; hé a kà kʼijiia kuila eme ngi Ngana.