Izekiiele 6 - O Mikanda Ikola

Muzambu ua kibuika kia milundu ia Izalaiele

¹ Kizuelu kia Jihova anga ki tulukila kokuʼami, kuila:

² Eie monʼa muthu, talela o pholo ié ku milundu ia Izalaiele, nda u i zambuile o kibuika kiâ.

³ Ua kà tanga kiki: Enu mu milundu ia Izalaiele, ivuenu o maka ma Jihova Nzambi: O Jihova Nzambi uambe kiki, ku milundu ia Izalaiele, ni ku tumilundu tuofele, ni ku jihonga ni ku makôlo, uixi: Tala, kuma eme, èué eme-mueène, nga-ndu bheka xibhata ku thandu dienu anga ngi sengulula o ididi ienu ia dileka matala.

⁴ O Jikalatódio jenu joso ja kà xala bhoxi-mavu, o iteka ienu ioso ia dikumbi a ka i bula-bula, anga iò oso a mi tokala, a a kubujula, nga kà a buisa ngàmbu bhu pholo ia iteka ienu muene.

⁵ Anga o imbi ia anʼa Izalaiele nga kà i zeleka bhu mesuʼa iteka iâ bhene; o ifuba ienu hé ngi i muangena mu jimbandu ja jikalatódio jenu ue.

⁶ Mu ididi ienu ioso ia kutunga, o jimbonge a mi muangena-ju, o ididi ienu ia di-leka matala i xala bhoxi-mavu; mbebhu o jikalatódio jenu a ji sengulule ji xale bhoxi-mavu, o iteka ienu i budijike, ibhue-ku, o iteka ia idifua ia makumbi a i batujule phala o ikalakalu ienu i kituke kingoho.

⁷ O ió oso a a tubujula, aia ni ku di bhalela ngàmbu mu kaxi kenu muene; phala enu mu kʼijiie kuila eme ngi Jihova.

⁸ Maji-phe nga-ndu xisa-ku masubhu, mbé ku kale amoxi-mu a bhulaka ku xibhata muʼaxaxe ka akua jixi, kioso ki a-nda ku mi muangena mu tumbu ni ngongo.

⁹ Kienhokio-phe, amoxi-mu mudienu a-nda kua kà ngi lembalala dingi oso a kà bhulaka mu miji iengi ia makanga, kuene kua ambata ku ubhikʼoko; kuma eme nga luuala mukonda dia kubola kua muẋima uâ, ua ngi xisa eme, ni mukonda dia mesu mâ ma landukila undumbu ua iteka iâ. Hádia-phe a-nda ku di kala ni fuokoso eneʼâmuène, mukonda dia kuiibha kuavulu kua bhange mu maufusa mâ moso.

¹⁰ Ene nda à kʼijiia ku hádia, kuila eme, ngi Jihova ki ngi ki ambe mu ngoho, kioso ki nga tange ku a bhanga o kuiibha kuosʼuku.

¹¹ O Jihova, Nzambi uambe kiki: Beta ku maku, u bete ni kinama, uile: Ahá! ku isunji ioso ia maufusa ma dibhata dia Izalaiele! Mukonda a-nda kúbua ku xibhata, ku nzala, ni ku dibhebhu.—

¹² Uoso uala dikanga, uanda kúfua ku dibhebhu, ió uala bhua butu, ua kà tèmbuka ku xibhata; o uoso u xalela masubhu, kia mu kondoloka ua kà fua ni nzala; nga-nda kumbidila muene o njinda iami ku thandu diâ.

¹³ Kieneʼokio, kiene ki mua kà kʼijiia kuila eme ngi Ngana, kioso ki mu mona o imbi ia iá a a tubula ni xibhata ia zeka muʼaxaxe ka iteka iâ, ni mu jimbandu ja jikalatódio jâ, ni mu tu milundu tua di-leka, ni ku milundu ia makota bhu thala iê, ni moxiʼa miẋi ioso ia uisu, ni moxi dia mikuzu ia di-zandela, mu ididi mua kexi mu ku bhela jisata ja uabha dizumba ku iteka iâ ioso.

¹⁴ Nganda kusunununa o lukuaku luami ku thandu diâ mu kuzoka-nâ, o ixi anga ngi bhangesa kusenguluka, i beta kusenguluka o kikangalakata kia mbandu ia Dibalata ndenge, mu mabhata mâ moso; nda a kʼijiie kuila eme muene ngi Ngana.