Izekiiele 5 - O Mikanda Ikola

¹ Eie-phe, monʼa muthu, zangula phoko iatu kiambote kala phoko ia bhutu, iene i u zangula nʼu i bhitisa bhu thalʼa mútue ué ni ku muezu ué; anga u zangula o pezu nʼu uane o jindemba jé mu lutatu.

² Mbandu ia katatu, kioso ki ua-nda kuila o izuua ia mukondo ua Jeluzaleme ia zubha kiá o kutenena, u i oha mu túbhia mu kaxi ka mbonge muene; anga u zangula dingi o mbandu ia mukuá hé u kondoloka na-iu o mbonge nʼu i kuama ni xibhata; o mbandu ia mukuá ua kà i muangena ku kitembue; mbata o xibhata iami ia kutalesa hadi nga-nda ku i fomona mu kizu ni ii ni ku a kaiela.

³ U katula-ku ue tuma tuofele u tu kuta ku mizumbu ia kizuatu kié.

⁴ O ku tuenhutu, u katulaku dingi tua mukuá anga u tu takuila mu kaxi ka túbhia, nʼu tuoha mu túbhia; kuenhoko kuene kua kà tunda o túbhia tuoha o muiji uoso ua Izalaiele.

⁵ O Jihova Nzambi uambe kiki: Iú kiá muene Jeluzaleme! Nga mu te mu kaxi ka miji ni ka jixi ja mu kala mu jimbandu.

⁶ Maji muene-phe o mabatuilu mami ua ma lungulula mu ufusa, miji ioso ndenge, ni jingonge jami ue ua beta ku ji lungulula o jixi ja mu kala mu jimbandu ndenge; mukonda a tènde mabatuilu mami, nguâ kuenda mu ijila iami.

⁷ Kala kiki, o Jihova Nzambi uambe kiki: Mukonda enu mua beta o kuvudisa o ikuma ienu, o miji ioso ia mi kala mu jimbandu jenu iala ndenge, mua fulu kuenda mu jingonge jami, nguenu kubhanga o mabatuilu mami, né kiá ngoho o kubhanga kia tumu o mabatuilu ma miji iengi iala mu jimbandu jenuʼenu, lémbue!

⁸ Mukonda-phe dia kiki, o Jihova Nzambi, uixi: Tala kuma eme, xi, eme-muène, nga ku lungulukila; nga-nda kubhanga isunji mu kaxi ké, ku mesu ma akua jixi jengi.

⁹ Momuʼé nga-nda kubhanga-mu kima kiluua ngi ki bhanga, mukonda dia maufusa é oso.

¹⁰ Kala kiki, Jitata, mu kaxi ké, ja-nda kúdia o tuana tuâ, o tuana tua-nda kúdia o jitata jâ; anga mabatuilu mami ngi ma bhanga momuʼé; o oso a subhuka-ku ngʼa muangena ku itembue ioso.

¹¹ Uala kiki, kia kidi muene, kala eme ki ngala kulaia, Jihova Nzambi ua ki tange, uixi: Mbata eie o kididi kiami kikôla ua ki sebulula ni ima ié ioso iaiibha kiavulu, ni maufusa é oso, eme ue nga-nda ku ku sengulula, o diesu diami ki dia-nda ku ku loloka mba ngi ku kuatela ue henda.

¹² Mbandu ié ia katatu ia-nda kúfua ku dibhebhu, anga momuʼé aia ni kujikinina ku nzala; o mbandu ia mukuá ia-nda kuia ni kúfua ku xibhata mu jimbandu jé; o mbandu ia mukuá nga-nda ku i muangena mu itembue ioso anga ngi fomona o xibhata mu kizu ni ii ni ku a kaiela kuema diâ.

¹³ O njinda iami hé i di kumbidila momuʼé kienhiki, o kuthathamana kuami anga ngi ku zubha kienhiki o vondadi, ku muẋima ni ku ngi zele; nda a kʼijiie kuila eme ngi Ngana nga ki zuela mu muanu uami, kioso ki a-nda kumona o njinda iami ia di kumbidila momuʼâ.

¹⁴ Hé ngi ku tula mu mukondo; ua sebuluka mu kaxi ka miji ia ku kala mu jimbandu jé; ene oso a bhita a ki mona mesu.

¹⁵ O kusebuluka kué ni fuma iaiibha i ua-nda kukala na-iu, i di-bhanga disá ni kisuma ki bhekela kukakuka ku miji iengi iala mu jimbandu jé, kioso eme ki nga-nda kubhitisa o mabatuilu mami ni njinda, ni kutema ni jikaxitiku ja nguzu. Eme-muène, Jihova nga zuela.

¹⁶ Kioso eme ki nga-nda ku a asa o misongo ia nzala i kuatesa uôma, phala o dibuikilu diâ, o misongo i nga-nda ku mi asa muene phala ku mi jima o mbutu, anga o nzala ngi i vudisa ku thandu dienu, o huta ia mbolo hé ngi i bhanga kabilu-bilu.

¹⁷ Anga ku thandu dienu ngi tumikisa-ku nzala, ni iama iaiibha, ienda ni ku ku zubha o tuana; anga o kipheku, ni kihaxi, kia kà bhita momuʼé; o kuthandu diê, nga kà bhekaku xibhata. Eme ngi Ngana nga ki zuela.