Izekiiele 44 - O Mikanda Ikola

O kutungulula o Tembulu. O ukunji mu kididi kikôla a u bhanga dingi kiengi

¹ Kienhókio anga u ngi bhangesa kuvutukila mu njila ia muelu ua dibhezelu dia kanga, ua talela ku mbandu ia thunda, o uene kienhókio a u jika.

² O Jihova anga u ngʼambela uixi: O muelu iú a kà u jika jinga, ka kà u jikila; ki bha kà kala ue muthu u bokuena-bhu, mukonda o Jihova Nzambi ia Izalaiele bhene bhua bokuena; mukonda dia kenhiki, ua kà jikama.

³ O ku kilamba-phe, o ió uala kilamba ua kà xikama muenhomo kuma kilamba, nʼende ni kúdia o mbolo bhu pholo ia Jihova; u bokuena jinga bhu njila ia muelu ua mbalanda ia dibhitu, o mu njila ienhiʼii muene ue mua tundila jinga.

⁴ Kia zubha kiki, ua ngʼambata ku njila ia muelu ua kexila Kusuku, ku pholo ia inzu; o ki nga tale, nga mono o kizunda kia Jihova kiezalesa o inzu ioso ia Jihova; kienhókio anga ngi di ṗhudika O pholo bhoxi.

⁵ O Jihova anga u ngʼambela, uixi: Monʼa diiala, tongolola ku muẋima ué, nda u tale ni mesuʼé, uívue ni mátui é, ine ioso eme i nga-nda ku ku tangela ku jingonge joso ja dibhata dia Jihova, ni itumu iê ioso; u tongolole ku muẋima ué o dibokuenu dia inzu, ni matundilu oso a dibhezelu.

⁶ Nda uambele o jimbaluke, o muiji ua Izalaiele, uixi: O Jihova Nzambi uambe kiki: Kuabhu kiá, o maufusa enu oso, eie u muiji ua Izalaiele, tata!

⁷ Mukonda muexana athu engi, a kambe o ku a saia ku muẋima ni ku xitu, nʼa kale mu dibhezelu diami, nʼende ni ku di kasanesa mʼonzo iami, kioso enu ki muenda ni kubhakula o mbolo iami, ni maji, ni manhinga; o ene ia a numununa o kikutu kiami, mukonda dia maufusa enu oso.

⁸ Ki muʼaluka ue o kilèkelelu kia imbamba iami ikôla; o kia di te-ku dingi, anueniʼenu kiá mua di kitula mu alangidi a mutendelelu uami mu dibhezelu diami.

⁹ O Jihova Nzambi phe uambe kiki: Ki bhu kale muthu uengi uoso-uoso, ku jinzuàngiza jala muʼaxaxe ka anʼa Izalaiele uala ni dibôlo dia muẋima mba dibôlo dia xitu, nʼa bokone jinge mu dibhezelu diami.

¹⁰ Maji o jilevita, a ngʼixi eme iá a di takuila dikanga, kioso kienda jinga Izalaiele mu kutondala, kioso ene kia xile ima ia a fuama o kubhanga hé a kuata o kubungana ngó, anga a ngi sanduka mbé o kukaiela o mahamba mâ, enhó-phe hinu a kʼàmbata muene o kikuma kiâ ku thandu diâ.

¹¹ Né kienhókio, hanji-phe a kà kala akunji a dibhezelu diami, ni kulangidila bhu mielu iaʼnzu, a kà bhikila o dibhata diami; o ibhaku ia sata ia kuoha ene a kà i batula o xingo, ni sata ia ituxi, a kà kala bhu pholo ia mundu, phala o ku u bhikila.

¹² Mbata ene a a kexidile akunji bhu pholo ia mahamba mâ, a kitukile kidibhukanu kia Izalaiele mu kubhanga kiaiibha; kiene ue eme ki nga zengela o lukuaku luami ku thandu diâ, o ene-phe ue ia a-nda kuambata o kikuma kiâ ku thandu diâ, Jihova Nzambi ua ki tange.

¹³ Ene-phe a kà bhixila kokuami, manhi o ku ngi bhikila ku unganga, mba ue kubhiẋila ku kima kioso-kioso ku ima iami ioso ikôla mu kididi kikôla kinéne, maji o sonhi jâ a kʼènda na-ju ni maufusa mâ moso ma bhanga jinga.

¹⁴ Maji-phe hanji, eme nga-nda ku a bhanga alangidi a dibhata diami, ni mu ikalakalu iê ioso, ni mu ioso muene ia tokala dingi kubhanga muenhomo.

O ima ia fuama o jinganga kubhanga

¹⁵ Maji o jinganga, akua muiji ua Levi, o anʼa Zadoko, aiuka o kilèkelelu kia dibhezelu diami, kioso anʼa Izalaiele kia ngi balukila, ene enda ni kubhiẋila kokuami, phala ku ngi bhikila, enda ni ku kala bhu pholo iami, phala o ku ngi bhakuila o maji ni manhinga, Jihova Nzambi ua ki tange.

¹⁶ Ene a kà bokona jinga mu dibhezelu diami, hé a bhikila muene ku meza mami, mbé o ku ngi bhikila, nʼende ni kubhaka o kitendelelu kiami.

¹⁷ Anga kia kà kala-phe kiki, kuila kioso ene kia bokuena bhu mielu ia lumbu lua moxi, a kà zuata izuatu ia linhu; o lá ka kà i ta ku mikutu iâ, kioso ene kia kà kala mu kubhikila bhu mielu ia lumbu lua moxi, mʼoxiʼaʼnzu.

¹⁸ O ku mítue iâ kua kà kala matoka a linhu ni jixilola ja linhu ja zuata mu matabela; o mu ku zuata a di kuta kiambote phala ki kua eze suualu.

¹⁹ O ene, ki eza ku lumbu lua kanga, kuala o mundu, mu lumbu lua kanga, o izuatu ia bhange na-iu o ukunji a kà i zula, hé a i tula mu maxilu ma kôla, anga a kà zuata imbamba iengi, mbebhu o mundu ka kà u kôlese mukonda dia kukala ni izuatu iâ.

²⁰ O mítue iâ ka kà i konga, mba ehelela o kindemba kiâ kukula; maji-phe kioso ngó kia fuama, kiene kia bhuta o mítue iâ.

²¹ Ki bhu kale né ngó nganga imoxi u nua vinhu, kioso kia bokona mu lumbu lua moxi.

²² Ene ka kà sakana ni mutudi mba muhatu a mu senge, maji a katula mizeletete ia tokala mu muiji ua dibhata dia Izalaiele; mba mutudi, ió ua kexile kiá muhatuʼa nganga.

²³ Anga o mundu uami a kà u longa o kutungula bhu kaxi ka muthu ua iuka ni mukua phulu, nʼa u bhangese o kutongolola kioso kia xidi ni kia zele.

²⁴ O kioso ki bhu kala mvunda, ene ue bhene bha kala muene, mbé o ku i fundisa; a i fundixila mu mabatuilu mami; o itumu iami ni jingonge jami, mu ionge ioso i kôla, a kà i aiuka muene, o jisabhalu jami a kà ji kôlesa.

²⁵ O ene ka kà zukama ku kimbi kioso-kioso kia muthu uafu, mbata mu kubhanga kiókio a kà di kasanesa; ki kale ngó kua tatʼâ, mba kua mamʼâ, mba monʼê ua diiala, mba ua muhatu, mba kua phangʼiê diiala, mba phange iê ia muhatu ua kambe o diiala, kuene kua tena o ku di kasanesena.

²⁶ O kioso kia zubha o ku di bonza, a mu xindila sambuadi dia kizuua.

²⁷ O mu kizuua kioso kia bokona mu kididi kikôla, mu lumbu lua moxi, phala kubhanga o unganga bhu kididi kikôla, ua kà bhakula-phe o kilumbu kiê kia kituxi, kiene kia tange Jihova Nzambi.

²⁸ O jinganga a kà kala ni undundu uâ umoxi; Eme-muène nga kà kala ngi undundu uâ; enu-phe kana dingi ku a bhana dikânda mua Izalaiele; kuma emiʼeme ngi dikânda diâ.

²⁹ O mubhaku ua makúdia, ni sata ia kituxi, ni sata ia kuêla, iene ene ia dia jinga; o ima ioso kiá iòlumbile Nzambi mua Izalaiele ia kà kala iâ.

³⁰ Ni ibundu ioso kiá ia mutômo, ku ibundu ienu ioso ia dianga ku mbutu joso, ni maujitu oso ku maujituʼenu, a kala a ngene a jinganga; kumoxi ue ni makènde enu a dianga, mu bhana-ku jinganga; mbé a bhangese o kizediuise kubutama ku thandu dia dibhata dié.

³¹ Kana kima kioso-kioso kia di fuila, mba a ki kuata ku injila, mba ku iama, o jinganga nʼa kà ki dia.