Izekiiele 43 - O Mikanda Ikola

O kutungulula o Tembulu. O kizunda kia Jihova

¹ Kutunda bhobho, u ngi bheka bhu dibhitu, o dibhitu dia talela ku njila ia thunda.

² Tala-ze, ngi mona kizunda kia Nzambi ia Izalaiele ki kʼijiia ku njila ia thunda; o kunumina kuê kala kunumina kua menha a vulu, o ixi anga i di muika mukonda dia kizunda kiê.

³ O kidifua kia kisunji ki nga mono, kiedi kala o kisunji ki nga muene kioso ki ngʼeza mu kusengulula o mbonge; anga o isukila iê i di fuangana kala i nga muene bhu mbanduʼa ngiji ia Kebale; hé ngi di ṗhudikila o pholo bhoxi.

⁴ O kizunda kia Jihova anga ki bokona mu Tembulu, ku muelu ua bhela o pholo ku thunda.

⁵ O Nzumbi anga i ngi zangumuna, i ngi bheka mu lumbu lua moxi; o ku tala, kizunda kia Jihova kiezalesa o Tembulu.

⁶ Anga ngʼivua dízui dia ngi zuelesa dia tundu mu Tembulu, o muthu uiza hé uimana bhu mbandu iami.

⁷ Anga u ngʼambela, uixi; Eʼ monʼa diiala, o kiki kiene o kididi kia kiandu kiami, o kididi kia makànda a inama iami, bhu nga-nda kukala muʼaxaxe ka anʼa Izalaiele, katé ku hádia ni hádia; o akua muiji ua Izalaiele ue kanda kukasanesa dingi o dijina diami dikôla, ni maundumbu mâ ni imbi ia jisobha jâ, bhu ididi iâ ia di leka, kutale ene uixi o jisobha jâ,

⁸ ki a ta o muelu uâ bhu mbanduʼa muelu uami, ni mikangalu ia mabhitu mâ bhua lulama ni mikangalu ia mabhitu mami, hé bhu kala mutôto bhu kaxi kami ni ene; o ene a kasanesa o dijina diami dikola ni maufusa mâ ma bhanga jinga; kiene ki nga a jimina o mbutu mu njinda iami.

⁹ Kindala-phe ene a fuama kutexi dikanga diamiʼeme o maundumbu mâ, kumoxi ni imbi ia jisobha jâ, eme ni ngi tungu mu kaxi kâ katé ku hádia ni hádia.

O kutungulula o Tembulu: O Kalatódio ka jisata

¹⁰ Eie-phe, tata, monʼa diiala, o inzu londekeza na-iu o muiji ua Izalaiele, phala a kale ni sonhi ja ima iâ iaiibha; a katule phangu ku inzu ienʼiii.

¹¹ O ene kia kala ni jisonhi ja ima ioso ia bhange, eie-phe ijidisa-nâ o ulungu ua inzu iii, ni kidifua kiê, ni matundilu mê, ni mabokuenu mê, ni ukalelu ue uoso, ni jingonge jê joso, ni ikexilu iê ioso, ni itumu iê ioso; o ima iii soneka-na-iu muene ku mesu mâ, phala aluke o kikexilu kiê kioso.

¹² O kitumu kia inzu-phe, kienhiki: O bhu dizôko-zôko dia mulundu, mu jimbandu jê joso mu dia suku, kiene kia kà kala o kididi kikôla; talaze, kuma, o kiki kiene o kitumu kia inzu.

¹³ O jiji jene o jinzòngo ja kalatódio, kia zonga ku jikóvadu, o kóvadu i kala kóvadu ni dikànda dia lukuaku; o mbandu iê ia bhoxi, i kala ia kitala kia kóvadu, o kuzanza kuê kua kóvadu, o ku mizumbu iê kikondoluesa kiê kioso, ki kala kia kànda dia lukuaku; iii-phe iene o mbunda ia Kalatódio.

¹⁴ O bhu hôle, tundé ku mavu katé ku muxinda ua bhoxi, kóvadu jiiadi, o kuzanza kuê kóvadu imoxi; tundé mu muxinda uòfele katé mu muxinda ua dikota, kóvadu jiuana, o kuzanza kuê kóvadu imoxi.

¹⁵ O Halèle i kala ia kóvadu jiuana; o ku tunda mu Adiiele katé bhulu, muene mua kà sabhuka jimbinga jiuana, ji di leka bhulu.

¹⁶ O Adiiele ia kà kala ni kuinhi dia kóvadu ni kiiadi mu kulebha, ni kuinhi dia kóvadu ni kiiadi mu kukula, kifua i kala kisokèlele, i sokelela mu jimbandu jene kiuana kiâ.

¹⁷ O muxinda, u kala ni kuinhi dia kóvadu ni kiuana bhu mulebhelela ni kuinhi dia kóvadu ni kiuana bhu kuzanza, ku mbandu jê jene kiuana kiâ; o muhuhu, u kondoloka mu jimbandu jê, u kala ua kaxaxe ka kóvadu, o hôle iê i kala ni kóvadu mu jimbandu; anga o matala a masumbatu mê ma talela ku tundila o dikumbi.

O kulumbila o Kalatódio

¹⁸ Hé u ngʼambela, uixi: Èʼmonʼa diiala, o Jihova Nzambi uambe kiki: O jiji jene o jingonge ja Kalatódio, bhu kumbi dioso dia-nda ku ka bhanga, phala kubhakuila ku thandu diê o sata ja kuoha, ni kusangela-ku o manhinga.

¹⁹ O jinganga ja Levi, a tokala ku mbutu ia Zadoko, ala mu kubhiẋila jinga kokuami, phala ku ngi bhikila, eie ua-nda ku a bhana kamona ka ngombe, mbé o sata ia kituxi.

²⁰ Eie-phe anga ua kà tambula ku manhinga mê, hé ua kà a ta ku thungi jê jiuana, ni bhu thungi jiuana ja muxinda, ni ku mizumbu mu jimbandu; kienhiki ki ua kà bhanga jinga o dibônzo ni kilumbu.

²¹ Kienhókio ua kà zangula o kangombe ka ndumbe ka kilumbu kia kituxi, o kene hé a kʼòhela mʼonzo bhu kididi kioso kia xindila ima ienhiʼii, ku kanga dia kididi kikôla.

²² O mu kizuua kia kaiadi ua kà satela kisutu, kia kambe o dibaka, mbé o sata ia kituxi; maji o Kalatódio-phe mu tuama o ku ka bonza kala ki mua ka bonza ku kangombe ka ndumbe.

²³ O Kalatódio ki uila ua zubha kiá o ku ka zelesa ku dibônzo, ua kà bhakuila-ku kangombe ka ndumbe ka kambe o dibaka, ni kilumbe kia mbudi, mu kilunga, ki ki moneka ue dibaka.

²⁴ Anga ua kà i bhakula bhu pholo ia Jihova; o jinganga ene a kà i toua môngua ku thandu diê, hé a kà i bhakuila ni túbhia kua Jihova.

²⁵ Mu kithangana kia sambuadi dia izuua, u iudika jinga kizuua ni kizuua kisutu, mbé o sata ia kituxi; u iudika jinga ue o kangombe ka ndumbe ni kilumbe kimoxi kia mbudi ia kilunga, ia kambe o dibaka.

²⁶ O kilumbu kia Kalatódio ue a kà ki bhanga mu sambuadi dia kizuua, anga kia kà zubha o kuzela, mu kienhiki a ki kôlesa kiá.

²⁷ O kioso ene kia zubha kualuka o izuuʼiii, kia kà kala-phe kuila, mu kizuua kia kanake, tunde kiá bhu kumbi diê ʼte ku pholo, o jinganga ene kiá a kà iudika jinga, ku thandu dia Kalatódio o jisata jenu joso ja kubhakula ni túbhia ni jisata jenu ja paze; eme-phe kiá nga kà di kenha momuʼenu, Jihova ua ki tange.