Izekiiele 42 - O Mikanda Ikola

O kutungulula o Tembulu. O maxilu a kôla

¹ O kia zubha kubhita imʼiii, ua ngi tundisa ku kanga dia lumbu lua kanga ku mbandu ia mutundila-kumbi; iú ua ngi bheka ku maxilu a lulamene ni kididi kia di kalela, ia a kexile ku pholo dia inzo ia talela ku Suku.

² O hamʼa kóvadu uene o mulebhelela ua kexile na-u o muelu ua thunda; o kuzanza kuê kua makuinhi a tanu a kóvadu.

³ Ku pholo ia makuinhi aiadi a kóvadu, a tokalele ku lumbu lua moxi, kua lulama ni dikanga dia lumbu lua kanga, kua kexile inzu ia matala a tatu.

⁴ O kupholo dia maxilu kua kexile dibèla dia kuinhi dia kóvadu mu kuzanza, ku mbandu ia mʼoxi, ni njila ia kóvadu imoxi; o mabokuenu mê a kexidile ku mbandu ia kusuku.

⁵ O maxilu a bhu thanduʼa sabhalalu a betele dingi o kutola; mukonda o itélembe ia bhulu ia betele dingi o ku tambula o kididi, o ia bhoxi ndenge mba ia bhu kaxi ka inzo.

⁶ Mukonda iene ue ia kexile ia matala a tatu, maji ki i kexile ni jingunji kala o jingunji ja malumbu; mu kienhiki o bhulu i ia kexile kiá mu-ia ni kutola tundé bhoxi, anga bhoxi i kala kota o bhulu ni bhu kaxi, ndenge.

⁷ O kimbaka kia kexile ku kanga, ku pholo dia maxilu, mu njila iia ku lumbu lua kanga, lua lulama ni maxilu, kia kexile ni makuinhi a tanu a kóvadu mu kulebha.

⁸ Mukonda ue o mulebhelela ua maxilu, a kexile mu lumbu lua kanga, ua kexile ua makuinhi a tanu a kóvadu; o ku talesa ku pholo ia Tembulu, kua kexile hamʼa kóvadu.

⁹ O ku mbandu ia bhoxi maxilu enhá, kuene kua kexile o muelu ua mbandu ia mutundila-kumbi, kioso ki uila ku bokona mu maxilu enhá ku lumbu lua kanga.

¹⁰ O bhu kusanzumuka kua kimbaka kia lumbu, ku njila ia mutundila-kumbi, lua lulama ni kididi kia di kalela, ku pholo dia inzo, kua kexile ue maxilu.

¹¹ O njila ku pholo dia maxilu ia di file ni maxilu ene, ia talela ue ku mutundila-kumbi; kia soko o mulebhelela uê, kia soko o kusanzumuka kuê; o matundilu ê oso, a di file ue ngó, kala kia di fu o mabokuenu ê.

¹² Ni kia di-fu ue o mabokuenu a maxilu a talela ku njila ia uombe, kua kexile ue dibokuenu dimoxi bhu hota ia njila, o njila ia bhiti ku pholo ia kimbaka kia kadilu, ku mbandu ia thunda, kioso ki u bokuena mu maxilu.

¹³ Anga u ngʼambela, uixi: O maxilu a kexile ku mutunmdila-kumbi ni maxilu a kexila ku uombe, ala ku pholo ia kididi kia di kalela, ió maxilu a kôla, mua bhingi kuila o jinganga, ja mu bhixila kua Jihova, muene mua dila o ima ikôla kinéne; o ima ikôla kinéne, muenhomo mua i tula, ni maujitu a makúdia, ni sata ia kituxi ni sata ia kuêla; mbata kididi kiókio kikôla.

¹⁴ O kioso o jinganga kia bokona jinga, ka kà tunda mu kididi kikôla nʼaii mu lumbu lua kanga, maji o izuatu iâ, ia bhange na-iu o unganga, a kà i ta muenhomo, mukonda o iene ue ikôla; a kà zuata-phe kiá izuatu iengi, kienhókio kiene kia kà zukama kiua kididi kia fuama o mundu.

¹⁵ O kioso muene kia zubha o kuzonga o Tembulu mʼoxi diê, muene ua ngi tundisila ku mbandu ia muelu ua talela ku thunda; anga u kondoloka ni kuzonga mu jimbandu.

¹⁶ Ua zonga o mbandu ia mutundila-kumbi ni lumbungu lua kuzonga-na-lu, lua bhana hama jitanu ja lumbungu, o lumbungu lua kuzonga-na-lu mu jimbandu.

¹⁷ Ua zonga o mbandu ia kusuku, ia bhana hama jitanu ja lumbungu, o lumbungu lua kuzonga-na-lu mu jimbandu.

¹⁸ O mbandu ia uombe ua i zonga ue, ni lumbungu lua kuzonga-na-lu, ia bhana hama jitanu ja lumbungu.

¹⁹ Anga u ta o mbelenge, u bhita ku mbandu ia mufuila-kumbi, hé u zonga hama jitanu ja lumbungu, ni lumbungu lua kuzonga-na-lu.

²⁰ Ua zonga muene ku mbandu jene kiuana kiâ; anga kukala o kimbaka kia kondoloka mu jimbandu, kia kexile ni hama jitanu ja lumbungu bhu kutandelela ni hama jitanu ja lumbungu bhu kukula mbé o ku tungula o muthu ua iuka ni mukua ituxi.