Izekiiele 41 - O Mikanda Ikola

O kutungulula o Tembulu: O dibhezelu

¹ Ku tunda bhenhobho u ngʼambata mu Tembulu, anga u zonga o jiphiladi, kóvadu jisamanu ja kuzanza ku mbandʼuku, kóvadu jisamanu ja kuzanza ku mbandu ia mukuá, kuene o kuzanza kua balaka.

² Anga o kuzanza kua dobokuenu diê ku kala ni kuinhi dia kóvadu; o mu jimbandu ja dibokuenu u zonga-mu kóvadu jitanu ku mbandu iii, kóvadu jitanu ku mbandu ia kamukuá; anga u zonga ue o mulebhelela uê, ua makuinhi a uana a kóvadu, o kuzanza kuê kua makuinhi aiadi.

³ Anga u bokona mʼoxi diê, hé u zonga o philadi iala bhu dibokuenu, kóvadu jiiadi, o dibokuenu, kóvadu jisamanu, o kuzanza kua dibokuenu, sambuadi dia kóvadu.

⁴ Anga u zonga ue o mulebhelela uê, makuinhi aiadi a kóvadu, o kuzanza kuê kua makuinhi aiadi a kóvadu ue, ku pholo ia tembulu; anga u ngʼambela uixi; O kiki kiene o Kididi Kikôla Kinéne.

⁵ O phalelu ia Tembulu anga u i zonga kóvadu jisamanu, o kuzanza kua maxilu ala mu jimbandu, kóvadu jiuana, a kondoloka o Tembulu ioso.

⁶ O maxilu mu jimbandu a kexile ku matala a tatu, xilu ku thanduʼa dixilu dia mukuá, ditala dimoxi makuinhi a tatu; o ku mutôto ua Tembulu anga ku kala o makungu, mbé o maxilu a kondoloka mu jimbandu, phala o mikambu i kuata muenhomo, ka i kuzule mu mutôto ua Tembulu.

⁷ O ku kula kua kuzanza kua maxilu mu jimbandu kuʼaia jinga ni kuvula dingi ku ditala ni ditala, mbé o kusokesa ni ididi ia di kande ku Tembulu ku matala-matala mu jimbandu; kienhókio kia bhangesele o Tembulu o kubeta dingi o kukala ni kuzanza kuavulu bhulu. Mu kienhokio ela jinga, o kutunda bhoxi phala kubanda bhu ditala dia bhulu, a bokuena jinga bhu ditala diala muʼaxaxe.

⁸ Eme nga mono o mbalanda ia di leka ia kondoloka o Tembulu; o madisesa a maxilu ala mu jimbandu a kexile ni kitala kia mbangala ia muvimba, kuma o ku a zonga a kala ni kóvadu jisamanu josuʼiji.

⁹ O kukoma kua mutôto ua maxiluʼa kanga mu jimbandu, kua kexi kua kóvadu jitanu; o kididi kia xisa jinga ngoho, kiene o kididi kia maxiluʼa tokala mu jimbandu, a zukamene ku Tembulu.

¹⁰ O bhu kaxi ka dixilu ni xilu dia mukuá, bhua kexile jinge kuzanza kua makuinhi aiadi a kóvadu, mu jimbandu joso ja Tembulu.

¹¹ O mielu ia maxilu mu jimbandu ia talela jinga ku ididi ia xala ngoho; muelu umoxi ku mbandu ia mutundila-kumbi, o ua kamukuá ku mbandu ia uombe; o kuzanza kua kididi kia xala ngoho kukala kua kóvadu jitanu mu jimbandu.

¹² O inzu ue ia kexile ku pholo ia kididi kia di kexidila, bhu thungi ia mbandu ia mutundila-kumbi, kuzanza kuê kua makuinhi sambuadi a kóvadu; o inzu ioso ue, mu jimbandu, o mutôto uê ua kóvadu jitanu mu kuzanza; o mulebhelela uê ua makuinhʼivua a kóvadu.

¹³ Anga u zonga o Tembulu, iala ni kulebha kua hamʼa kóvadu, u zonga ue ni kididi kia di kexidila, ni inzu, ni mitôto iê, hamʼa kóvadu o kulebha kuê.

¹⁴ Ni kuzanza kua mbandu ia kupholo dia Tembulu, ni kutunda bhu kididi kia di kexidila ku talela ku mutundila-kumbi, ni kuku ni ku mbandu ia kamukuá, hama ia kóvadu.

¹⁵ Anga u zonga ue o mulebhelela ua inzu, ku pholo dia kididi kia di kalela, kia kexile ku dima, ni itelembe iê ku mbandʼuku ni ku mbandu ia mukuá, ia tena hamʼa kóvadu, kumoxi ni Tembulu ia mʼoxi ni jimbalanda ja lumbu.

¹⁶ O jinjanena jala ni tumabaia tua di kuatenena ku thandu dia akuâ, ja kexile mu mbandu joso ku ididi iene kitatu kiâ. O miẋi, ku mutôto, a folala-ku mabaia mu jimbandu, kienhiki tundé bhoxi ndú ku jinjanena ja vunginine bhulu.

¹⁷ O ku dizanzu bhu thanduʼa muelu, katé mu Tembulu mʼoxi ni ku kanga, mua kexile ima ia kuseta, ni ku mutôto uoso mu jimbandu, kutale mʼoxi uixi ku kanga.

¹⁸ Anga o kisetelu kiê a ki bhanga kia jixelube ni máie, hé kʼila muene kuku xelube kuku xelube o díie di kala bhu kaxi, o xelube i kala ni pholo jiiadi,

¹⁹ pholo ia muthu i talela ku diáie diala ku mbandu iii, o pholo ia kamona ka hoji i talela ku diáie dia mbandu ia mukuá; kienhiki muene kia kondoluesa ni kubhanga o inzu ioso mu jimbandu.

²⁰ Tundé bhʼoxi katé bhulu dia muelu, ezalesa-ku ni kubhanga-ku o jixelube ni máie, kiene kimoxi ue ku mutôto ua Tembulu.

²¹ O milambu ia mielu ia sokelela mu jikuadro; o ku tula ku muelu ua kubokuena mu kididi kikôla kinéne, o kidifua kiê kia kexile kiene kimoxi ni kia mukuá.

²² O Kalatódio ka mabaia ka kexile ka kóvadu jitatu mu kitala, o mulebhelela uê ua kóvadu jiiadi, hé ka kala ni jithungi jê; o maxikikilu mê ni mutôto uê, ua kexile ua mabaia; anga u ngʼambela, uixi: O iá ene o meza ala bhu pholo ia Jihova.

²³ O Tembulu ni dibhezelu, kiiadi kiâ, a kexile ni mielu iiadi.

²⁴ Anga kukala o batende jiiadi, mbé o mabhitu; batende jiiadi jiia ni ku-di-zambesa; jiiadi phala o dibhitu didi, jiiadi phala o dibhitu dia mukuá.

²⁵ Anga a seta-ku, ku mabhitu, jixelube ni máie, kala kia ji bhange ku mitôto, hé kukala o kibhuna kiamuẋi kia dikota, mu mbalanda ku pholo, bhu kanga.

²⁶ Hé kukala jinjanena jala ni tumabaia tua di kuatenena ku thandu dia akuâ, ni máie ku mbandu kuku ni ku mbandu ia mukuá ia mbalanda, kala ue mu maxilu ala mu jimbandu ja tembulu ni ku ibhuna ia makota ia miẋi.