Izekiiele 4 - O Mikanda Ikola

Jeluzaleme a mu konda, maji ki mu kidi, kifika ngoho

¹ Eie-phe, u monʼa muthu, zangula ditijolo, u di tule bhu pholo iéeʼmuene, u Sete ku ditijolo kuenhoko o mbanza ioso ia Jeluzaleme.

² O iene ta na-iu mu mukonda u i tungile kimbaka, u i kandele mbonge mu jimbandu, u i tele ilômbo mu jimbandu, ni a bulaimbaka mu jimbandu.

³ Eie-phe uzangula kienga kia felu, hé u ki-ta ki kale kimbaka kia felu bhu kaxi ni eie ni mbonge; o pholo ié i talela kuenhoko, mu kiki i kala mbonge iòkonde, eie ua i kondela; phala kienhʼiki ki kale kijimbuete ku dibhata dia Izalaiele.

⁴ Uzeka ue kimbanji ku mbandu ia lukuaku lué lua kiasu, o kikuma kia dibhata dia Izalaiele, u ki tule ku thandu diê. Kioso kiá kia kà soka o dialuilu dia izuua ioso i u zekela-ku, kiene ue ki ua-nda kuambata o ikuma iâ.

⁵ Mukonda eme nga ku xindila o mivu ia kuiibha kuâ kia soko o dialuilu dia izuua, hama jitatu ni makuinhiʼvua dia izuua; kiene ki ua kʼambata o kikuma kia dibhata dia Izalaiele.

⁶ O ki ua-nda kuila ua zubha o kutenesa izuua iii, ua kà lunguluka-phe, hé ua kà zekela kiá ku mbandu ié ia lukuaku lua kúdia, hé ua kʼàmbata o kikuma kia dibhata dia Juda mu makuinhi auana a izuua; nga ku bhana kala kizuua muvu, kizuua muvu.

⁷ O pholo ié i talela jinga koko kua Jeluzaleme a mu kondo, o lukuaku luéeie ki lu kale lua zuata, u tange ima iaiibha ia-nda kubhita ni Jeluzaleme.

⁸ Eie-phe nga-nda ku ku kuta ni mikolo, mu kubhanga kiki eie kua-nda kutena kulungulukila ku mbandu kuku mba ku mbandu koko, katé ki u zubha o kukumbidila o izuua ia mukondo ué.

⁹ Eie-phe u zangula o tiliku, ni sevada, ni mufaba, ni jihâsa, ni masa, ni aveia, u i bunda mu kututu, iene i u bhanga na-iu o mbolo: Kala kiabhu kia soko o dialuilu dia izuua ié ioso i u zekela bhu mbandu, ienʼiii iene i u dia, mu hama jitatu ja kizuua ni makuinhiʼvua.

¹⁰ O kúdia kué ku u dia, o kunema kuê ku kala kua makuinhi aiadi a xikulu mu kizuua; uila u nanga-ku, u dia-ku; u nanga-ku, u dia-ku.

¹¹ O menha mé a kúnua ua kà a zonga ue, mbandu ia kasamanu ia hine, kuabhu! Uila u nanga-ku, u nua-ku; u nanga-ku, u nua-ku.

¹² O ioso i u dia ila kala mbolo ja sevada, anga u i lambela ku thandu dia ditobe di tunda mu muthu, bhu pholo ia enhoso muene.

¹³ Jihova anga uila, uixi: Kienhiki ue anʼa Izalaiele kia-nda kúdia o mbolo iâ ia kasana, mu kaxi ka miji iengi muanda ku a takuila.

¹⁴ Eme bhenhobho, anga ngʼila: Àhá! Jihova, Jihova, tata! Tala, muenhu uami ki u di kasanesa, mukonda nuka ngi dia kima kia di-fuila mba a ki kuata ku iama, tundeʼami undenge ʼté kindala; mba ngó xitu ia ibha i bokona mu kanu diami! Kikola!

¹⁵ Anga u ngʼambela, uixi: Tala, nga ku bhana kiá ʼtobe dia ngombe bhu kididi kia ditobe dia muthu; diene kiá di ua kà lambela o kudia kué.

¹⁶ Bhenhobho iú ua ngi tangela, uixi: Eie monʼa muthu, tala: O huta ia mbolo, mu Jeluzaleme, nga-nda ku i bhanga kuila iia ni kulungujuka, ki i kala ukalelu umoxi, anga o mbolo ia kúdia i bhinga ku i pezala, maji ni dilamba, o menha a kúnua a kà a zonga ue mu nzôngo, maji ni kukakuka.

¹⁷ Phala o kúdia ni kúnua ku a kambe, nda aie ni ku di kakukisa ene mudiâ, ende ni ku di jikinisa mu ikuma iâ.