Izekiiele 3 - O Mikanda Ikola

¹ Bhenhobho u ngʼambela, uixi: Monʼa muthu, diá ioso i ua mono. Dilanda didi diá-diu, nda uie, u zuelele o dibhata dia Izalaiele.

² Kienhókio hé ngi jikula o dikanu diami, muene hé u ngi bhana kúdia o dilanda, anga u ngʼambela, uixi:

³ Monʼa muthu, vumu dié bhana-diu kia kúdia, nda uizalese o mídia ié ni dilanda didi di ngala ku ku bhana. Bhenhobho, ngadi anga ngʼivua dia touala mu kanu diami kala uiki.

⁴ Anga u ngʼambela, uixi: Monʼa muthu, ndé, u bokone mu dibhata dia Izalaiele, u mu tangele o maka mami,

⁵ Mukonda eie ka ku tumikisa ku muiji u zuela mbimbi iengi, mba muiji u zuela mbimbi i bhonza ku ívua, maji ku dibhata dia Izalaiele.

⁶ Mba ku ndumba dia miji i dingula, ala ni mbimbi ia bhonzo, a bhingi kia zuela ku tena kua evua; eme-phe se nga ku tumikisiniʼé kua enhó, ni kidi muene, eji ku ku bhana mátui.

⁷ Maji o dibhata dia Izalaiele, ki dia-nda kuinda ku ku bhana mátui, mukonda ene ngua-uâ ku bhana matui kokuamiʼeme; mbata o dibhata dioso dia Izalaiele diène ni pholo ia huku ni muẋima ua kolokota.

⁸ Talaphe, kiene ki nga bhangela kuila o pholo ié ia kolokota mu kutala o jipholo jâ ene ja kolokota, ni dibhomo dié-eie dia suina mu kutala o dibhomo dia ene.

⁹ O dibhomo dié nga di bhange kala utadi ua diiamande mu kukola, diene dia beta kukola o ditadi dia fijilu ndenge; uila kiki-phe, kana ku a kala ni uôma, mba u teketa ki u mona o jipholo jâ, mbata ene ala dibhata dia bhukumuka.

¹⁰ Iú ua ngʼambela dingi, uixi: Eie monʼa muthu, tá mu thulu ié o maka mami oso u nga-nda ku ku tangela, ívua na-u muene ni mátui mé.

¹¹ Zangula-phe, uie ku jihutile, ku ana muiji ué, kixi evua, kixi a kamba kuívua, ua kà a zuelele ni ku a tangela, kuamba: O Jihova, Nzambi, uambe kiki:

¹² Anga o Nzumbi ia Nzambi u ngi balumuna, hé ngivua, ku dima diami, dízui dia mutendu ua dikota, dia tokomoka tundé bhu kididi kiê, diexi: O unéne ua Jihova u tane-ku!

¹³ Anga ngʼivua o kinuminu kia mabhabha a iama a muia ni ku di-beta-beta kumoxi ni kinuminu kia malola ku pholo diâ, ni mutendu ua kibazu kionéne.

¹⁴ Bhenhobho, Nzumbi ia Nzambi ia ngi zangumuna, ii ia ngʼambata; eme anga ngiia ni dilamba dia vulu mu kikenene kia! muenhu uami; maji o lukuaku lua Jihova lua kexile ni nguzu iavulu ku thandu diami.

¹⁵ Anga ngiza ku iá a a kutu, bhu Tele-Abibe bhua tungile ene ku mbandu ia ngiji ia Kebale, eme ue ha ngi tunga bhuoso bhua tungile ene; anga ngi kala bhenhobho sambuadi dia kizuua, nga bhuuama mu kaxi kâ-ene.

Mulangidi ua Izalaiele

¹⁶ Anga ki bhita kuila, o kiabhu o sambuadi dia izuua, kizuelu kia Jihova kieza kokuami, kuila:

¹⁷ Eié monʼa muthu: Eme nga ku bhana u kale u mulangidi ua dibhata dia Izalaiele; eie uenda ni kuívua o maka a tunda mu dikanu diami, anga ku mbandu iami uenda ni ku a dimuna.

¹⁸ Kioso eme ki ngiia o muthu ua iibha, ngixi: Ua-nda kúfua, ni kidi kiene, eie anga u kamba ku mu dimuna, u fula o kuzuela phala kudimuna o muthu uaiibha ku njila iê ia iibha, phala kubhulula o muenhu uê, muthu ió uaiibha ua kà fua mu kikuma kiê, maji o manhinga mê nga kà mʼèbhula bhu lukauku lué-eie.

¹⁹ Maji, se o muthu uaiibha eie u mu dimuna, o muene hé u kamba kubiluka nʼa diela ku ikuma iê ni ku njila jê ja ibha, muene ua kà fua mu kikuma kiê, maji eie o muenhu ué ua u bhulula.

²⁰ Kiene ue kimoxi ni muthu ua iuka ki eha o kuiuka kuê anga u di-tela muengi, hé u bhanga kia iibha, anga eme ngi-ta ku pholo ie-muène kidibhukanu, muene ua kà fua muene; mukonda, o ki ua kambe eie o ku mu dimuna, muene ua kà fua mu kituxi kiê, o ima ioso ia kuiuka ia bhanga jinga ka kà i xinganeka dingi, maji o manhinga mê nga kà ebhula bhu lukuaku lué-eie.

²¹ Maji, eie-phe, ki u dimuna o muthu ua iuka phala ka-te kituxi, o muene anga u fula o kuta kituxi, ni kidi muene u kola muenhu, mukonda a mu dimuna; eie-phe ua bhulula o muenhu ué.

Izekiiele ua kà lémbua Kuzuela

²² O lukuaku lua Ngana, bhenhobho, lua kexile ku thandu diami, iú ua ngʼambela, uixi: Balumuka uie mu í honga, o muenhomo muene mu nga kà zuela ni eie.

²³ Anga ngi balumuka, hé ngi tunda nga-lu-ia mu dikôlo, mu ku bhixila-mu, tala, o unéne ua Ngana iú momo uila ki nga u muene bhu mbanduʼa ngiji ia Kebale; anga ngi di-bhala ni pholo iami bhoxi.

²⁴ Bhenhobho, Nzumbi ia Nzambi ia bokona momuʼami, ii ia ngʼimika, iú ua zuela ni eme uixi: Ndé, u di jikile mʼonzo ié.

²⁵ Mukonda, eie monʼa muthu, tala, a-nda ku tula mikolo ku thandu dié anga a ku kuta na-iu. O mu kaxi kâ kua-nda kutena ku tunda-mu-phe.

²⁶ Eme ue nga-nda kubhangesa kuila o dimi dié di naminina mu kanu, ua-nda ku kituka dibubu, kua-nda kukala u ala di tena ku a bazela; mbata ene ala bhata dia kubhukumuka enhó.

²⁷ Maji kioso ki nga-nda kuila nga zuela nʼeie, nga-nda kujikula o dikanu dié, eie nʼua kà a tangela, kuila: Jihova uambe kiki: Uoso uedi uívua, evue; o uoso ngué kuívua, a kale; mukonda enhó ala dibhata dia ẋinuka.