Izekiiele 25 - O Mikanda Ikola

Muzambu ua kuzoka ni Amone

¹ O kizuelu kia Jihova anga kiza kokuami, kuila:

² Eie monʼa diiala, talela o pholo ié mu kubilukila anʼa Amone, u a tele Ó muzambu ua kuzoka ni ene.

³ Nda uambele anʼa Amone, uixi: Ivuenu o kizuelu kia Jihova Nzambi: Kuma o Jihova Nzambi uambe, kiki: Mbata eie uedi: Há! há! ku mbandu ia dibhezelu diami kioso kia di kasanesa; ni ku mbandu ia oxi ia Izalaiele kioso kia mu i kitula jingùndu; ni ku mbandu ia dibhata dia Juda kioso kiaii ku ubhika;

⁴ tala-ze, eie ue nga-nda ku ku bhakula bhu maku ma akua thunda, hé u tokala kua ene, o ene hé a ta momué o malombe mâ, momué muene mua kà tunga o mabhata mâ; ene hé a kà dia ku ibundu ié, a kà nua o lete ié.

⁵ O Lahabe nga kà mu bhanga kidilu kia jikamelu, o anʼa Amone kibhanga kia jimbudi; kiene ki muà ka kʼijiiia kuila eme ngi Jihova.

⁶ Mukonda o Jihova Nzambi, uambe kiki: Kala ki ua beta o jimbanda ku maku eie ua titila ni inama bhoxi, o mu muẋima eie ua sanguluka mu kuiibha kué kuoso, mu kuzemba oxi ia Izalaiele,

⁷ tala-phe, eme uami ue nga-nda kusunununa o lukuaku luami mu kuzoka nʼeie, hé ngi ku bhana ku akua jixi mu kukala u madibhundila mâ, ni nga kà ku katula muʼaxaxe ka ifuẋi, hé nga kà ku jimuna muʼaxaxe ka jixi, anga eʼmuène uoso ngi ku zubha-ku; phala ua kà kʼijiie kuila eme-muène ngi Jihova.

Muzambu ua kuzoka ni Mouabhe

⁸ O Jihova Nzambi uambe kiki: Mukonda kiedi kala kia mu tanga Mouabhe ni Seíle, exi: Tala, o dibhata dia Juda diedi kala o miji ia mukuá;

⁹ kala kiki eme o Mouabhe nga-nda ku mu jikula mbandu, tundé ku jimbanza, tundé muene ku jimbanza jê jala kuema dia jimbambe jê, ja di bhange ene o makembu aʼxi, ni Bete-Jesimote, ni Bahale-Miione katé ku Kidiataime,

¹⁰ katé ku anʼa thunda, ku ixi muene ia anʼa Amone, ioio i nga bhana kiá ni i kale iâ, mbebhu anʼa Amone ki bhu kale dingi o ku a xinganeka ni ku a lembalala mu kaxi ka akua jixi.

¹¹ Mua Mouabhe ue nga-nda kua kà bhangamu difundixilu, phala a kà kʼijiie kuila eme ngi Jihova.

Muzambu ua kuzoka ni Idomo

¹² O Jihova Nzambi uambe, kiki: Kuma Idomo ua vutula o phonzo ku dibhata dia Juda, ia a kituka akua mulonga ua dikota kioso kia a tate o phonzo.

¹³ Kala kiki, o Jihova Nzambi, uambe kiki: Eme uami o lukuaku luami nga-nda ku lu sunununa mu kuzoka ni Idomo, katé ki ngi halumuna-mu athu ni ibhaku; anga ngi mu kitula kikangalakata; tundé mu Temane katé mu Dedane, a kà tenuka ku xibhata.

¹⁴ Anga Idomo nga kà mu vutuila kiua o phonzo ku lukuaku lua mundu uami ua Izalaiele; mu Idomo hé a kà bhanga-mu kala bhua tela o njinda iami ni kuthathamana kuami; phala nʼa kʼejiia kioso ki kala o phonzo iami, Jihova Nzambi ua ki tange.

Muzambu ua kuzoka ni akua Fidíxia

¹⁵ O Jihova Nzambi, uambe kiki: Mukonda o ma Fidíxia a bhange ima ia phonzo, mu kuvutula o phonzo ni muẋima uaiibha, mbé o kuzanga ni kizembu kiâ ki kiene kúbhua,

¹⁶ kala kiki, o Jihova Nzambi uambe, uixi: Talenu, lukuaku luami ue nga-nda ku lu zengela o ma Fidíxia, o ijibhanganga nga kà i vuza hé nga kà jikinisa iá a subhuka ku mbanduʼa musanza ua kalunga.

¹⁷ Hé nga kà a vutuila phonzo ia dikota, ni ku a talesa hadi ni njinda, kiene kia kà kʼijiia kuila eme-muène ngi Jihova, kioso ki nga kà zubha o ku a vutuila o phonzo iami ku thandu diâ.