Izekiiele 21 - O Mikanda Ikola

O xibhata ia Jihova

¹ O kizuelu kia Jihova anga kʼiza kokuʼami, kixi:

² Eie monʼa muthu, lungulula o pholo ié mu ku bilukila Jeluzaleme, o maka mé lundulula-u mu kubilukila o ma dibhezelu, u te muzambu ua kuxoka ni ixi ia Izalaiele,

³ o ixi ia Izalaiele u i tangele kuma: O Jihova uambe kiki, uixi: Tala, eme nga ku bilukila, o xibhata iami nga-nda ku i fuomona mu kizu, hé ngi jibha mu kaxi ké o muthu ua iuka ni mukua phulu.

⁴ Kienhiki-phe, nga-nda kujibha mu kaxi ké o muthu ua iuka ni mukua phulu, o xibhata iami ia kà fuomoka mu kizu mu kuzoka ni xitu ioso, tundé ku Sulu katé ku Suku.

⁵ O xitu ioso hé ia kà kʼijiia muene kuila eme ngi Jihova, o xibhata iami nga i fuomona mu kizu; o muene ki mungu dingi ia-nda kuvutukila-mu.

⁶ Eie-phe, tata, monʼa diiala, di-tule muenhu; di-tule muene o muenhu bhu mesuʼâ ni mukondo uoso ua muẋima ni kikote.

⁷ Anga kia kà bhita-phe kuila, kioso ene kia kuibhula, exi: Eie-phe ua mu di tudilaʼhi mienhu? Eie-phe ua ambela, kiki: Mukonda dia njimbu, mbata ia-nda kuiza muene; o miẋima ioso ia-nda kuambuka, o maku oso a kà bokotomoka, o mienhu ioso ia kʼèzala kikote, o phuma joso ja kà kituka menha; tala, imʼiii ia-nda kuiza hé ia kà bhita muene, Jihova ua ki tange.

⁸ O kizuelu kia Jihova kieza kokuʼami, kuila:

⁹ Monʼa diiala, zambula u zuele, uixi: Jihova uambe: Zuela: O xibhata, o xibhata iòzuike, ia a i seke kiá.

¹⁰ A i zuika phala kujibha, a i seke phala i benhe; o ki tualʼiki mbé tu sanguluka? O mbasá ia monʼami ki i xikina muẋi uoso-uoso.

¹¹ A i bhana o ku i seka phala kubhânga na-iu; o xibhata iii a i zuika, a i seke phala ku i tula bhu lukuaku lua kijibhanganga.

¹² Dikole, u kumbe, eie u monʼa muthu, mbata o xibhata iòlunge mu kuzoka ni mundu uami, ni mu kuzoka ni ilamba iene ioso ia Izalaiele, ió a a bhakula ku xibhata kumoxi ni mundu uami; eie-phe di bete ku ditabela.

¹³ Mbata ene a-nda ku a lola hanji; kieji kukala kiebhi-phe se o mbangala ioio ki i xikina muẋi uoso-uoso ki i kexile-bhu? Jihova ua ki tange.

¹⁴ Eie-phe, monʼa muthu, zambula, u bete ku maku, lulu ni lua mukuá; mbata o xibhata, mu tula lua katatu, ia-nda kunhongonoka; o xibhata phala iá oso a a toma, a a kuamena o kúfua, ia kà bokona mua ene katé moxiʼèlele.

¹⁵ Phala o muẋima uambuke, o idibhukanu iie ni kusokoloka, o ku mabhitu mâ moso nga te-ku xibhata ia talela o sungu kuenhoko, iòiudike, kala nzaji, ia xikamena kujibha!

¹⁶ Eie xibhata, tata, di budike, u lungulukile ku kadilu; di iudike ualulukile ku kiasu ni kuoso-kuoso kiá kua-nda ku lungulukila o pholo ié.

¹⁷ Eme ue nga-nda kubeta ku makuʼami, lumoxi ku lukuaku lua mukuá, anga o njinda iami ngi i bhangesa kunhoha; eme ngi Jihova, ememuène nga zuela.

¹⁸ O kizuelu kia Jihova anga kiza kokuʼami, kuila:

¹⁹ Eie-phe monʼa muthu, tá njila jiiadi mua-nda kuijiia o xibhata ia sobha ia Babilonha; jene kiiadi kiâ ja-nda kutunda ixi iâ imoxi; eie hé u sola kididi, o bhu thala ia njila ia mbonge bhene bhu u ki solela.

²⁰ Uidika o njila mua-nda kuijiia o xibhata kua Labah dia anʼa Amone, ni kua Juda, ni kua Jeluzaleme, uene mu imbaka ia kolo.

²¹ Mukonda o sobha ia Babilonha, kia-nda ku tula bhu jiphambu, ua kʼèmana bhu thala dia njila jiiadi jojo, mu kuzambula: O misongo iê ua kà i zuikila bhenhobho, uibhula ku iteka ia bhata diê, hé uia ni kuividila mu mala.

²² O ku mbandu iê ia kadilu kuene kuà kala o muzambu ua Jeluzaleme, mbe-bhu o kuambela o jiadiiete phala o kijibha a ki jikule mu kanu, mbé o kuzangumuna o mbimbi ia kutana phala o ibula mabitu ki i tula bhu mielu ia kuzangumuna o imbaka phala kutunga o jimbonge.

²³ O kienhiki-phe kianda kuila ku mesuʼâ kala kuzambula kua hatu, mukuâ ni kusuma ngó, mukonda a a lokela ni milôko muʼaxaxe kâ; maji o Nzambi phe ua-nda kuxinganeka o kikuma kiâ phala nʼa a kuata.

²⁴ Kala kiki, O Jihova Nzambi uambe kiki: Kuma enu mua mu ngi tukumuna o kikuma kienu, kioso ki mua muia ni kutukulula o itondalu ienu, o ituxi ienu ii ia muia ni kumoneka mu ibhangelu ienu ioso; o kiki-phe kuma mueza mu ixinganeku, a-nda ku mi kuata mu maku.

²⁵ Eie-phe, kilamba kia Izalaiele, u mukua phulu ku moneka Nzambi, ua bhingi hádia kumbi dié di ku sanga bhu kithangana kia phulu ia dikota.

²⁶ Jihova Nzambi uambe kiki, uixi: O dilénga katula-diu, o kitundu sondolola-kiu; o kiki ki kiene dingi kia-nda kuà kala-ku; uoso ua di tolesa, eie u mu zangeleka; o uoso ua di zangeleka, eie mu tululule.

²⁷ Mu senguludienu! Mu senguludienu! Nga-nda ku mu sengulula hé ngi mu kambesa-bhu muene, katé kia kʼèza ió ua mu tokala mu kidi kiene, o kokué kuene ku nga kà mu bhana.

O Xibhata ni akua-Amone

²⁸ Eie-phe monʼa muthu, zambula u zuele, kuma: O Jihova Nzambi ua tange kiki ku mbandu ia anʼa Amone ni ku mbandu ia usudi uâ, uedi: Amba-kiu-phe: O xibhata, o xibhata iòktule mu kizu, a i seke phala kijibha, ni kujikinisa, ni kuila banhi-banhi;

²⁹ Sumbala, a ku muena kingoho, a ku zambuila makutu, phala nʼa ku tudike bhu xingu ia akua phulu a a kuamena o kúfua, a bhingi o kumbi diâ dia kʼèza bhu kithangana kia phulu ia dikota.

³⁰ Fomeka o xibhata ié mu kizu; mukonda bhu kididi bhua ku sasela ni mu ixi ié mua ku vualela muene mu nga-nda ku ku fundisila.

³¹ Hé nga kà lundulula o njinda iami ku thandu dié, o mu kuzoka nʼeie nga kà bhusila o túbhia tua kutema kuami kokué, anga ngi ku bhakula bhu maku a iiala ia handamana, athu ejidila kujibha, akua kufunha kibuika.

³² Ua kà di bhanga kúdia kua túbhia; o manhinga mé a kà kala muʼaxaxe ka ixi; ki mungu dingi a kà ku banza, mbata eme ngi Jihova nga ki zuela.