Izekiiele 2 - O Mikanda Ikola

Izekiiele a mu tuma ku ukunji

¹ Anga u ngʼambela, uixi: Eie monʼ muthu, balumuka uimane, nga-nda ku ku zuelesa.

² Bhenhobho kioso muene kia mu zuela ni eme, nzumbi ia Ngana ia bokona momuʼami ii ia ngʼimanesa, eme ngevu ió ua kexi ku ngi zuelesa.

³ Muene ua ngʼambela, uixi: Eie monʼa muthu, eme nga mu ku tuma ku anʼa Izalaiele, ku miji ia ẋinuka, a ngi ẋinukina eme; ni ene ni jitata jâ a ngi tondalela, katé ni mu lelu muenhumu.

⁴ O anʼâ a thathamana jipholo, ia a huku miẋima; eme-phe ngi ku tuma kua ene, ua ambela kiki: O Jihova, Nzambi, uambe kiki:

⁵ O ene-phe, kixi evua mba a kamba kuívua, (mbata ene ala dibhata dia ẋinuka) a-nda kuijiia-phe kuila mu kaxi kâ muejile musesedi.

⁶ Eie-phe, u monʼa muthu, kana ku a kuatela uôma, mba u kala ni uôma ua ioso ia zuela; né-mbe hanji o izuelu iâ i di-bhanga muxitu ua minha ni jisongo phala eie, eie anga u tunga ni jimvuanga, kana kukala ni uôma ua izuelu iâ, mba u teketa ki u mona o jipholo jâ, kuma ene ala dibhata dia ẋinuka.

⁷ Maji eie-phe, ua kà a tangela o maka ami, kixi evua kixi a kamba kuívua, kuma ene ala dibhata dia ẋinuka.

⁸ Maji eie-phe, u monʼa muthu, ívua kioso ki ngala ku ku tangela, ku kale ni kuẋinuka uila ki ala o dibhata dia ẋinuka; eie jikula mu kanu dié, u die kioso ki ngala ku ku bhana.

⁹ O ki nga tale, nga mono lukuaku lua mu kuiza ni kusununuka kokuami, o bhu lukuaku bhuala dilanda dia divulu.

¹⁰ Anga u di zala bhu pholo iami, diene diòsoneke ni moxi ni ku kanga; o ku dilanda a soneka-ku mitendu ni ku di tula mienhu, ni lamba!