Izekiiele 16 - O Mikanda Ikola

O muhatu ua Kidianzunga ni maufusa a Jeluzaleme

¹ Anga o kizuelu kia Jihova kiza kokuami, kiexi:

² Monʼa diiala, Jeluzaleme mu ijidise o maufusa mê,

³ zuela, uixi: O Jihova Nzambi ua tange kiki kua Jeluzaleme, uixi: o dimatekenu dié ni vualelu dié diandekela moxi ia akua Kanana; tatʼenu ua kexi mamodi, o mamʼenu dihivi.

⁴ Eie-phe, o vualelu dié, mu kizuua kia ku ku vuala, o hôua ka ku batuile-na-iu, mba ngó a ku sukula ni menha, mbé o ku ku zelesa, lémbue; kuambe dingi ngó bhuòfele kuila a ku kunga môngua mba a ku futa milele, kana.

⁵ Ki bhuala diesu dioso-dioso dia ku kuatelele henda, kuila di ku bhanga ngó kima kioso-kioso ku ima ioso iii, mukonda dia ku ku kuatela o henda; inda a ku takuidié ngó mu kanga dia hatu, mukonda dia muenhu ué ua kuatesa fokoso, mu kizuua kia ku vuala.

⁶ Eme-phe, mu kubhita bhu mbandu ié, nga ku mono ua dimbujuka mù sangi ié, emiʼeme nga kuambela, ngixi: Sumbale hanji uala mu sangi ié, maji u laia muene; xi, nga kuambela, ngixi: Né-mbe hanji ua dimbujuka mu sangi ié, maji u laia muene.

⁷ Eme nga ku bhangesa ku di vualulula kala luthangu lua ubhe ku muxitu, eie ua kulu, ua jingi, kuuabha kué kua tomboka dingi kiavulu; mele a nanuka a suku, o jindemba ku mútue ja kulu; maji ua kexidiʼé ngó tuẋi-a-thakala, ka ku zuika.

⁸ Eme-phe, mu kubhita bhu mbandu ié, nga ku mono, tala, o ki nga kuidi suí, nga ku mono kuila ua bhixila mu kithangana kia ku ku ta iambu; anga ngʼoleka o muxiku ua thanga iami ku thandu dié, hé ngi vunga o tuẋi ié; kienhókio nga ku lokela, eme nga bokona mu kikutu ni eie, kiene kiambe Jihova Nzambi; eie kiá ua kituka u uami.

⁹ Eme nga ku sukula ni menha, nga ku kondona ku manhinga mé, eme nga ku uaie ni maji.

¹⁰ Eme nga ku zuika ni ima ia matunda, nga ku zuika jisabhatu ja kibha kia njimbu, nga ku kutu phonda ia linhu ia nzeta, mu mbunda, nga ku vungina muene ni seda.

¹¹ Nga ku kembesa ni makembu ma soko, eme nga ku te malenge mu maku, ni musanga ua makoladi mu xingu.

¹² Bhu dibhomo nga ku te phelu ia nzaji, ni jibixa ji zenzela mu mátui ni kitundu kia fuma ku mútue.

¹³ Kienhiki, nga ku kembesa ni ulu ni phalata, o izuatu ié, i nga ku zuika, ia linhu ia nzeta ni seda, ni ima ia kubordala. Ua di dikila ni fuba ia iuka, ni uiki ni maji; o kuuabha kué kù kua tomboka kinéne-nene, eie ue ua zediua katé ki ua bhixila bhu ditala dia kukala u sobha. Ua kituka eie Na Mvuale!

¹⁴ O fuma ié iaii ku miji ioso, mukonda dia kuuabha kué, kuma ua tenena kiambote, mukonda dia kizunda kiami ki nga tudile kokué, kiene kia tange Jihova Nzambi.

¹⁵ Maji eie ua dielela ngó o kuuabha kué, eie ua di-kasananesa mukonda dia fuma ié; ua bhanga jinga undumbu ni ene oso a bhita, phala nʼu kala u uâène.

¹⁶ Eie ua katula jinga muene ku izuatu ié, eie ua bhanga jinga ididi ia di-leka ni ku i kembesa ni milele ia idifua-idifua, eie ua bhita jinga ni ku bhangela o undumbu kuenhoko; o ima iii, mʼukulu ki i bhita jinga, ki mungu ue dingi ia-nda bhita.

¹⁷ Eie ua zangula o makembu mé ma ku di-zakela, u nga ku bhana eme, ku ulu uami ni ku phalata iami, eie ua bhange iteka i ua ta jinga na-iu o jiphanda.

¹⁸ Eie ua zangula O izuatu ié ia kubordala, iene i ua a vungina jinga na-iu; o maji ami ni ima ia dizumba iene i ua-te bhu pholo iâ.

¹⁹ Ni mbolo iami, i nga ku bhana, ni fuba ia iuka, ni maji, ni uiki, u nga kexi mu ku ku dikila na-u, ima iosuʼiii ue ua i tula bhu pholo iâ mu ku bhanga zumba dia mbote, kiene muene ki kia bhiti, Jihova Nzambi ua ki tange.

²⁰ Sumbala ua bhange iii, maji uate-ku dingi o kukatula anʼé a mala ni anʼé a ahetu u ua vuala nʼeme, eie ua a satela iteka iènhʼoio, phala ku a jikinisa; manhi o undumbu ué iú, ua tolo?

²¹ Eie ua jibha anʼami, eie ua bhakula kua ene, phala ku a bhitisa mu túbhia.

²² O mu maufusa é oso, ni mu maundumbu mé, ua lémbua kuxinganeka o izuua ia unzangala ué, kioso ki ua kexile tuẋi-a-thakala, ua zula, ua di dimbula mu sangi ié.

²³ ʼKí kiedi-phe, o ki ua zubha o kubhanga kuiibha kué kuosʼuku (uaué! Uaué! Kokolo dié, tata! Jihova Nzambi ua ki tange).

²⁴ Ua tungu inzu ia undumbu, eie ua bhange matala ma di-leka mu nzunga joso.

²⁵ Mu thungi joso ja jinjila ua tunga jinga-mu ididi ia dileka, eie ua kasanesa o kuuabha kué, inama ié ua i bhanuina jinga oso a bhita; eie ua sokolola jinga o maundumbu mé.

²⁶ Ua bhange ue undumbu ni anʼa akua Ijitu, jinzukame jé u ua zukama-nâ, akua xitu jònene, eie ua vudisa o undumbu ué phala ku ngi lokalala.

²⁷ Kala kiki, tala-ze, kiene ki nga sununuina o lukuaku luami ku thandu dié, eme nga sosolola o dikânda dié; eme nga ku bhakula ku vondadi ia iá oso a ku zembe, ana a ilumba mu Fidíxia, ió a kexi mu kala ni jisonhi ja njila ié-eie ia ufusa.

²⁸ Ua bhange ue undumbu ni ana a akua Asídia, mbata eie ki ua kexi, ua kexi u kiuaia kionéne, o u ku zubha o hânji ka moneka; o ki uata jinga-nâ jiphanda, hanji, né kienhókio, ki ki ku soko.

²⁹ Inda o jiphanda jé ua ji sokolola dingi mʼoxi ia Kanana katé ni mu Kaldeia, maji hanji, né kienhókio ue, ki ki ku kumu luua.

³⁰ Jihova Nzambi phe, uixi: Muẋima ua ku bhuila kinéne, tata! eie ua mu kuenda ni kubhanga ima kala iii, ia tokala ngó muhatu uala kiuaia kia kukamba o sonhi!

³¹ O ki ua tunga jinga o jinzu jé, ja uuaia, mu jiphambu joso ja jinjila, eie ua bhanga jinga ididi ia di-leka mu jinzunga joso, né kiá ngó ue kuila kala u Kidianzunga, lémbua, kuma ni futu eie ku i andalele lémbue.

³² Uediʼé ngó kala u muhetu ua mukua jiphanda, ua bhingi, bhu kididi kia muadi uê, uia ni kutambulula athu engi.

³³ Idianzunga ioso ene mu ku a futa, maji eie, èie dingi uia ni kubhana o maujitu ku jisaii jé joso; anga uia ni ku a bhana o maujitu, mbé a tunde ku mbandu joso mu kuiza kokué, mukonda dia maundumbu mé.

³⁴ Kala kiki, o ima i bhanga o ahetu ni akuenu mu maundumbu mâ, eie ua i lungulula, mukonda oso ió a kuʼidi fita-fita, ka mu ku kaiela dingi o undumbu ué. Kuma eie ki ua mu a futʼokio, o ene ka ku futu kima, ima-phe ua i lungulula.

³⁵ Kala kiki, eie u Kidianzunga, ívua o kizuelu kia Jihova.

³⁶ Jihova Nzambi, uambe kiki: Mbata o jimbongo jé ua ji zange, ia a ku zula mu maundumbu mé mu ua bhanga jinga ni jisaii jé, kala ue ki ua bhanga jinga ni iteka ia maufusa mé, ni mu manhinga ma anʼé u ua satela jinga o iteka.

³⁷ Tala, o jisaii jé joso, ji ua sungila jinga na-ju, nga-nda ku a bhongolola, kumoxi ni iá u ua zolo, ni iá u ua zembe, nga-nda ku a bhongolola ku jimbandu joso nʼa ku kondoloka mu ku ku bilukila, hé ngi ku zula tuẋi-a-thakala bhu pholo iâ, ene nʼa ku mono muene kioso ki ua kala.

³⁸ Anga ngi ku fundisa muene kala kiene kufundisa ahetu a ta jiphanda, ni iá a bhubhisa o manhinga; anga ngi ku bhakula ku kibhubhe kia manhinga ma njinda ni ma difuba.

³⁹ Anga ngi ku bhakula bhu maku mâ, inzu ié ia undumbu a kà i lundumuina bhoxi, o ididi ié ia di-leka a kà i sengulula, hé a ku zula o izuatu ié, o makembu mé ma ku kemba-nâ a kà ku tambula-u, hé a kà ku xa tuẋi-a-thakala, ua zuluka muene, ua xala ngó.

⁴⁰ Kienhókio a kà bandesa kibuka ki ku kitukila, hé a ku bûba ni matadi, anga a ku kubujula ni jixibhata jâ.

⁴¹ O jinzu jé a kà ji oha mu túbhia, mu ku ku belesa a kà ku bhanga ima ia vulu bhu pholo ia ahetu andumba muene; anga ngi ku zumbula mu ku kala u kiuaia, o futu ue kua kà i bhana dingi.

⁴² Kienhiki, o njinda iami kokué ia kà tululuka kiá, o difuba diami ue kokué ngi di katula-ku, o ki nga-nda kuzubha ku ku bhanga iosuʼiii, anga ngi dixibhaʼmi kiá, ki mungu dingi nga-nda kuthathamana.

⁴³ Mbata-phe eie kua xinganeka o izuua ia unzangala ué, eie ua ngi lokalala o njinda ni ima iosuʼiii; tala-ze, eme ue o njila ié nga-nda ku ku lauila-iu ku thandu dia mútue ué—Jihova Nzambi ua ki tange,—o ku thanduʼa maufusa mé moso kua-nda kutaku dingi o kuximika kué kuosʼuku.

⁴⁴ Talesa-ze, oso akua ku-ta jisabhu, a-nda ku ku tela o Sabhu iii, kuamba: Ki kala o mama, ki kala ue monʼê ua muhatu.

⁴⁵ Eie-phe, eie-muène u monʼa mamʼenu, ua kexile ni fokoso ia munumiʼê ni ia anʼê; eie, eie-muène u phangeʼa phange jé a kexile ni fokoso ia a muadi uâ ni ia anʼâ; kuma mamʼenu ua kexi dibhiti o tatʼenu mamodi.

⁴⁶ O kota dié dia muhetu, muene Samádia, ua tunga ku mbandu ié ia kiasu ni anʼê a ahatu; o ndengʼié ia muhatu, ua tunga mbandu ié ia kúdia muene Sodoma ni anʼê a ahatu.

⁴⁷ Sumbala kiene, maji eie mu njila jâ ua lémbua kuenda-mu, né ngó kubhanga maufusa kala mâ-ene; maji mukuâ ni kuila kala o ia bhange ene iii, ia tolo, eie mu njila jé joso ua beta dingi o ku di iibhisa ene ndenge:

⁴⁸ Jihova uambe-phe kiki: Nga loka muene, kala eme ki nga mu laia, o Sodoma dia phangiʼé, ni muene ni anʼê a ahatu, ka bhange kala i ua bhange eie kumoxi ni anʼé a ahatu.

⁴⁹ Tala-ze o kituxi kia Sodoma dia phangiʼé: Izala, ndumba dia makudia, ni umonha uavulu ua kexi na-u ni muene ni anʼê a ahatu; maji ue o ngadiama ni phulungu ua tate, kuila u a kuatela ngó henda, lémbue.

⁵⁰ A di zangeleka ia a bhange ufusa bhu pholo iami; kala kiki, eme ue, mukonda nga ki mono, nga a katulabhu.

⁵¹ O phangiʼé Samádia ue, ituxi iê ia-te, ki i tena kusoka ni kaxaxe ka ituxi ié-eie; mukonda eie ituxi ié ua beta dingi o ku i vudisa ene ndenge, mu kubhanga kiki o jiphange jé ua ji bhana kulûnga, ni mu ima ioso ia ufusa i ua bhange eie.

⁵² Eie u tala hadi ni sonhi jé, eie ua bhana o kulûnga ku jiphange jé mukonda dia ituxi ié i ua ta jinga ia beta o kuiibha o ia ene ndenge; ene-phe a beta o kuiuka eie ndenge; sonhi-phe ji ku kuate ue muene; sonhi jé ji ku talese hadi, mbata ua lungisa o jiphange jé.

⁵³ Eme-phe o jihutile jâ nga-nda ku ji vutûla; o jihutile ja Sodoma ni ja anʼê a ahétu, ni jihutile ja Samádia ni ja anʼê a ahatu, kumoxi ni jihutile ja uhutile ué-eie mu kaxi kâ;

⁵⁴ phala o lebhu dié uie ni kuenda na-diu, mbé u kale ni jisonhi ja ima ioso i ua bhange, uende ni ku a ximbakatesa.

⁵⁵ Kioso jiphange jé, Sodoma ni anʼê a ahatu, kia vutuka bhu ditala diâ diòkulu, o Samádia ni anʼê a ahetu a vutuka ue bhu ditala diâ diʼokulu, eie ue ni anʼê a ahetu mua-nda kuvutuka bhu ditala dienu diòkulu.

⁵⁶ Eie-phe, né ngó Sodoma dia phangiʼé ku mu tumbula mu kanu dié, bhu kizuua kié kia izala, kioso o maufusa mé kiluua a tukuluka.

⁵⁷ Kiki ua dibhange kala muene; ua kituka u kima kia malebhu ku anʼa ahetu a tokala ku Sídia, ni kua iá oso a mu kala mu jimbandu jê, o anʼa ilumba ia Fidíxia ala ku ku sebulula.

⁵⁸ Eie o uama ué ni maufusa mé, hádia ua kʼàia na-u—kiene kia tange Jihova.

⁵⁹ Mukonda o Jihova Nzambi uambe, kiki: Kioso ki ua bhange, eme ue hádia kiene ki nga-nda ku ku bhanga, mbata o mulôko u ua-te ua u lokola, eie ua bulu o kikutu.

⁶⁰ Maji-phe né kienhókio, eme o kikutu kiami ki nga-ta ni eie mu izuua ia unzangala ué, hanji nga-nda kua kà ki banza muene, hé nga kà ta dingi ni eie kikutu ki nangenena.

⁶¹ Bhenhobho o jinjila jé uanda kua kà ji lembalala, hé sonhi ja kà ku kuata kioso ki ua kà tambula o jiphange jé ja ahatu ja makota a ku tundu, kumoxi ni jiphange jé ja ndenge ja ahetu a ku tundu ku undenge, mbata ene osoʼâ nga kà ku bhana-nâ, a kà kituka anʼê, maji ki mu kikutu kié-eie dingi.

⁶² Mukonda eme nga-nda kua kà ta o kikutu kiami ni eie, hé ua kà kʼijiia kuila eme muene ngi Ngana;

⁶³ mbé uie ni ku ki lembala, sonhi jende ni ku ku kuata, mu ima ioso i ua bhange, phala kioso ki ngi diʼondolola nʼeie, ki mungu dingi u jikula dikanu mukonda dia jisonhi—kiene kia tange Jihova Nzambi.