Izekiiele 12 - O Mikanda Ikola

O kijimbuete kia ku muanganena kuema dia kimbaka, kijimbuete kia uhutile ua kumuanganena mu jixi

¹ Anga kizuelu kia Jihova kiza kokuami, kiexi:

² Monʼa muthu, eie ua tungu mu kaxi ka dibhata dia ximika, diala ni mesu a kumona maji kumona lémbue, diala ni mátui a kuívua maji kuívua lémbue; mukonda diala dibhata dia xinuka.

³ Eie-phe tata, monʼa muthu, iudika imbamba ié phala u bule dibhata uie ku ixi iengi, o kioso ki u katuka, ene oso a ki mona mu muanha uatu; o bhu kididi kié bhu uala, u sondoloka-bhu nʼuii bhengi ku mesuʼâ a kumona; sumba kienhiki a ki tongolola, sumbala ene ala dibhata dia ẋinuka.

⁴ U katuila imbamba ié bhu kanga mu muanha uatu, ku mesuʼâ muene a kutala kala ua mu taúla; eie-phe ua kà tunda mu ngoloxi, ku mesuʼâ muene a kutala, kala ki bhanga muthu ua bulu iu ua muia kididi kiengi.

⁵ U iudika ndungulu mu mutôto hé u katuila-bhu o imbamba nʼu i bheka ku kanga ene ia a tala.

⁶ Ua kà i ambata bhu isuxi, ene ia a tala muene; kioso ki kua kà vunda, kiene ki u i katula; o pholo ié u i vunga, mbebhu o ixi kua kà i mone; mukonda nga ku te u kale u kijimbuete ki di uanesa mu dibhata dia Izalaiele.

⁷ Eme nga bhange kienhiki, kala kia ngi tangela; imbamba iami nga i bheka bhu kanga mu muanha uatu kala muthu ua mu taúla; o ku tula mu ngoloxi, nga kande mu mutôto ni lukuaku; o ki kua vundu, imbamba nga i katuila bhu kanga, eme nga i ambata bhu isuxi, ene oso muene iá a tala.

⁸ O ki kuákie, kizuelu kia Jihova kiza kokuami, kuila:

⁹ Monʼa diiala o dibhata diodio, Izalaiele, dibhata dia ẋinuka ki di kuibhula, kuila: Eie-phe ua mu bhangaʼhi?

¹⁰ Tangela-u, uixi: O Jihova Nzambi uambe kiki: O kimbamba kiki kia lungu kua muenexi ua Jeluzaleme, ni dibhata dioso dia Izalaiele diala muʼaxaxe kê.

¹¹ Amba-kiu, kuma: Nga di-bhange ngi kijimbuete kienu ki di uanesa; kuma kala ki nga bhange emʼiki, ene uâ kiene kia-nda ku a bhanga, a-nda kuia ku ixi iengi ku ubhika.

¹² O muenexi uala muʼaxaxi-kâ uà kʼambata ue o imbamba iê bhu isuxi mu usuku, kua vundu, hé u tunda; a kà kanda mu mutôto, muene mua katuila o imbamba bhu ndungulu iê; ua kà divunga mbebhu o ixi ka i mone ni mesu mê.

¹³ O uanda uami ue nga kà u tandeleka ku thandu diê hé a mu kuata mu dibhebhe diami; anga nga kà mu bheka ku Babilonha, o ixi ia akua Kaldeia, maji ka kà i mona mesu, sumbala ua kà fuila momo.

¹⁴ O ió oso a kà kala mu mbandu jê phala ku mu banda, kumoxi ni masoladi mê moso, nga kà a muangena mu itembu ioso, hé ngi fomona o xibhata iia ni ku a kaiela kuema diâ.

¹⁵ Kioso ki ngʼa muangenesena mu miji ni ku a uanena mu jixi, kiene kiua ki-anda ku kʼijiia kuila eme-muene ngi Ngana.

¹⁶ Maji momuʼâ nga-nda kuxamu, amoxi-mu, Ofèle, a bhulaka ku xibhata, ni ku nzala, ni ku dibhebhu, phala ende ni kutanga o maufusa mâ mu kaxi ka miji muoso mua-nda ku di tela; anga a kʼèjiia kuila eme ngi Ngana.

¹⁷ Kienhokio-phe o kizuelu kia Jihova kieza kokuami, kuila:

¹⁸ Monʼa muthu, o kúdia kué ua kà kúdia ni kiteketela, o menha mé ua kà a nua ni kimbulambula ni hele.

¹⁹ Akuaʼxi ua kà ambela, uixi: O Jihova Nzambi ua tange kiki ku mbandu ia iá a tungu mu Jeluzaleme, mu ixi ia Juda, kuila: O kúdia kuâ a kà kudia ni hele, o menha mâ a kà a nua ni kimbuua, mbata oxi iâ a-nda kua kà i bhunda, o ima ioso ia di-buenge izuluka-mu, mukonda dia kuhama kua ene oso a tunga momo.

²⁰ O jimbanza ja tungile, ji xala jingùndu, o ixi ia kà di-bhanga kibuika; hé mua kà kʼijiia kuila eme ngi Ngana.

Muzambu ua ku kanena jipolofata ja makutu

²¹ O kizuelu kia Jihova anga kʼiza dingi kokuami, kuila:

²² Monʼa muthu, Sabhu iahʼii, i muala na-iu enu mʼoxi ia Izalaiele, muexi: O izuua ia-nda kuvula, o isuma ioso ki ià kala-ku dingi?

²³ Eie-phe ambela-u kiki: O Jihova Nzambi uambe kiki: O iseièngele iii nga-nda ku i bhuisa-ku, ki i kala dingi Sabhu mua Izalaiele; inda ambela-u kuma: O izuua ia bhixila kumoxi ni izuelu ia isukila ioso.

²⁴ Mukonda ki kua-nda kukala dingi kisukila kia ngoho, mba muzambu ua ku tobhesa athu, muʼaxaxe ka dibhata dia Izalaiele.

²⁵ Mbata eme, ngi Ngana, nga kà zuela, o kizuelu ki ngi zuela eme kia kà di-bhanga muene; ki kia kà kokoloka dingi; kuma mu izuua ienu muene, enu mu dibhata dia xinuka, muene mu nga kà zuela o kima, anga ngi ki kumbidila muene, Ngana dia Jihova ua ki tange.

²⁶ Kizuelu kia Jihova kieza dingi kokuʼami, kiexi:

²⁷ Monʼa muthu, talaze, akua dibhata dia Izalaiele a mu zuela, exi: O iú o isukila iê i a mona, ia izuua ia vulu, o muene u zambuila ithangana iala hanji kua lebha.

²⁸ Kala kiki, ambela-u: O Ngana dia Jihova uambe kiki: O izuelu iami ni kimoxi ngó ki kia-nda kukokoloka dingi. O kizuelu ki nga zuela kia-nda ku di-bhanga muene—kiene kia tange Ngana dia Jihova.