Izekiiele 11 - O Mikanda Ikola

O mabatuilu ma Jihova ku thandu dia ilamba ia ifuẋi

¹ Bheneʼobho Nzumbi ua ngi fundumuna iú ua ngi bheka bhu dibhitu dia mbandu ia thunda ia inzu ia Jihova, dia talela ku mutundila-kumbi; tala, bhu muelu ua dibhitu bhua kexile makuinhi aiadi a muthu ni kitanu; o muʼaxaxe-kâ nga mono-mo Jahazaniia, monʼa Azule, ni Pelatiia, monʼa Benaia, o kilamba kia kifuxi.

² Anga u ngʼambela uixi; Monʼa muthu, iá ene athu a mu xinganeka iaiibha, anga aia ni kubhana kaiula ka iibha mu mbanza mumu.

³ Ene akua kuila exi: O kithangana kia kutunga o jinzu, kiluua ki bhixila; o mbanza iii iene o ímbia, etuʼetu tu xitu.

⁴ Uila kiki: Zambuila-nâ ima ia ku a bilukila; zambula, monʼa muthu, zambula.

⁵ O Nzumbi phe ia Jihova anga i tula kokuʼami, i ngʼambela, iexi: Zuela; Jihova uambe kiki, uixi: Kienhiki ki mua zuela enu mu muiji ua Izalaiele; mukonda o ima ia muia ni kuthuthuka ku muenhu uenu, eme nga ijiia.

⁶ Imbi ienu mua i vudisa mu mbanzʼumu, mu jiluua jê muezala imbi.

⁷ Kala kiki-phe Ngana dia Jihova uambe, kiki: O jifile jenu ji mua texile o imbi iê mu kaxi ka mbanza iii, iene o xitu, o mbanza iii, iene o ímbia; enu-phe, muʼaxaxe kê nga-nda ku mi katulamu.

⁸ Muala ni uoma ua xibhata, xibhata-phe nga-nda ku mi bhekela naiu ku thandu dienu, Jihova Nzambi ua ki tange.

⁹ Anga muʼaxaxe-kê nga kà mi tundisa-mu, hé ngi mi bhakula bhu maku ma athu engi, anga ngi bhanga o mabatuilu mami muʼaxaxe kenu.

¹⁰ Mua kà tenuka ku xibhata; Ku maẋokololo a Izalaiele kuene ku nga kà mi fundisila; phala muʼa kʼèjiie kuila eme ngi Ngana.

¹¹ O mbanza iii ki ia-nda kuẋikina ku mi kala ímbia, mba enu mu di bhanga xitu mʼoxi diê; kuma kua suku Izalaieleʼoko, kuene ku nga-nda ku mi fundixila.

¹² Hé mua kà kʼijiia kuila eme ngi Ngana, mukonda ki muende mu jingonge jami, mba kubhanga o mabatuilu mami, inda mua bhange kala kiala o mabatuilu ma miji ia mi kala mu jimbandu jenu.

¹³ Anga ki bhita kuila kioso ki nga mu zambuila mu uanji ua upolofeta, Pelatiia, monʼa Bebaia, uafu. Kienhokio hé ngi di ṗhudikila o pholo bhoxi, anga ngi di kola ni dízui dia suína, ngixi: Ahá! Jihova, Ngana, tata! o masubhu a Izalaiele mbé ua-nda ku a zubhidisa dingi?

Kikanenu kia kubhanguluka kua Izalaiele

¹⁴ Bhenheʼobho o kizuelu kia Jihova kieza kokuʼami, kiexi:

¹⁵ Monʼa muthu, o jiphange jé, o jiphange jʼèlele muene, o athu ku undandu ué, ni dibhata dioso dia Izalaiele, ene oso eneʼô a a ambela kuala ia a tunga mu Jeluzaleme, kuila: Jihova mu sondolokienu dikanga; ixi iii ua tu bhana-iu kiá, ni i kala ietu.

¹⁶ Uila kiki, zuela: Jihova, o Ngana, uambe kiki: Sumbale nga a takuila makanga mu ifuẋi; sumbala nga a muangena mu jixi, maji né kienhókio, hanji nga-nda ku di-bhanga ngi dibhezelu diâ, mu kakithangana kòfele ku jixi kuoso kua di tela.

¹⁷ Kala kiki, ila: O Ngana dia Jihova ua tange kiki: Nga-nda ku mi ongeka mu kaxi ka ifuẋi, anga ngi mi takana ku jixi kua mi takuile, nda ngi mi bhana oxi ia Izalaiele.

¹⁸ Anga a kʼèza mueneʼomo, hé a katula-mu o ima ié ioso iaiibha ni ima ié ioso ia isunji.

¹⁹ Hé nga kà a bhana muẋima uâ umoxi, o moxi diâ anga ngi ta-mu nzumbi ia ubhe; o muẋima ua ditadi uala mu xitu iâ nga kà u katula-mu, hé ngi bhinganesa-mu muẋima ua jixitu.

²⁰ Mbhebhu aie ni kuenda mu jingonge jami, ni alunde o mabatuilu mami, nʼende ni ku a bhanga; ene hé a kà kala kiá mundu uami, eme ngi kala ngi Nzambi iâ.

²¹ Maji o ió ala ni muẋima ua kuenda kala kia xindi o muẋima ua ima iâ iaiibha, ni ima iâ ia isunji, eme nganda kua kà bhangesa kuila o njila jâ ji buila ku thandu dia mítue iâ, Ngana dia Jihova ua ki tange.

²² Kienhókio o jixelubini ji leka o mabhabha mâ, o malola a ila-nâ bhuamoxi; o unéne ua Nzambi ia Izalaiele, u kala bhulu ku thandu diâ.

²³ O unéne ua Jihova anga u zangumuka tundé mu kaxi ka mbonge, anga u tula ku thandu dia mulundu ua kexile ku mbandu ia thandu ia mbonge.

²⁴ Kia zubha kubhita imʼiii, Nzumbi ia Nzambi ua ngi zangula iú ua ngʼambata mu kisuma katé ku Kaldeia, kua iá ala ku ubhika, ua ngʼambata mu Nzumbi ia Nzambi; anga o kisuma ki nga muene ki bhita.

²⁵ O ala ku ubhika hé ngʼa tangela ima ioso ia ngi londekesele Ngana.