Izekiiele 10 - O Mikanda Ikola

Kisuma kia kaiadi kia jixelubini. O makala ma túbhia

¹ Kienhokio-phe ki nga tale nga mono kuila ku diulu dia kexile ku thandu dia mítue ia jixelube kua tukuluka ku thandu diâ, kima kala ditadi dia Safídia, kia moneka kala kídifua kia kiandu.

² Iu ua zuelesa o muthu ua zuata o linhu, uixi: Di-tele mu malola, katé mʼoxiʼa xelubini, u vuote makala a túbhia mu kaxi ka jixelubini, o maku ezala muene, u a muangene ku thandu dia mbonge ioso. Muene hé u bokona muene mu malola, ku mesuʼami a kutala.

³ Bhenhobho jixelube ja kexilile ku mbandu ia ʼkuaku lua kúdia lua inzu, kioso kia bokona o muthu; mu lumbu lua moxi anga muizala dituta.

⁴ Kienhokio o unéne ua Jihova anga u tunda ku thandu dia xelubini iala bhu muelu ua kubokuena mʼonzo; o mʼonzo anga muizala dituta, o mu lumbu muizala ni kubenha kua unéne ua Jihova.

⁵ O kinuminu kia mabhabha a jixelubini, a kʼivu katé ni mu lumbu lua kanga, mukuâ ni dízui dia Nzambi Uatena Ioso, kioso kia kala mu zuela.

⁶ Kioso-phe muene kia ambela o diiala ua zuata linhu, uixi: Zangula o túbhia bhuʼaxaxe ka malola, bhu kaxi ka jixelubini, muene ua bokona hé uimana bhu mbanduʼa malola.

⁷ Bhenhobho xelubini imoxi u sunununa lukuaku luê muʼaxaxe ka jixelubini katé ku túbhia tua kexile mu kaxi ka jixelubini; hé u tu zangula, u tu tula bhu maku a iú ua zuata o linhu; o muene u tu tambula hé u tunda.

⁸ Ku jixelubini hé ku tukuluka kídifua kia lukuaku lua muthu moxiʼa mabhabha mâ.

⁹ Kienhokio-phe nga tale, kua moneka malola auana bhu mbanduʼa jixelubini, bhu mbanduʼa xelubini dilola, o bhu mbanduʼa xelubini iamukuá dilola; o malola ku a tala, o kidifua kiê edi kala ditadi dia tulukeza.

¹⁰ Mu kuibhula o kidifua kiê, malola oso kiuana kiâ a kala ni kidifua kimoxi; ela kala o dilola didi diala mu kaxi ka dilola diamukuá.

¹¹ Ene ki aia ni kuenda, ene ue ia enda ku mbandu jâ jene jiuana; ka kexi mu lunguluka kioso kiʼaia ni kuenda, maji ku kididi kuoso kua lungila o mútue, kuene kuʼaia; ka lunguluka jinga kioso kiʼaia ni kuenda.

¹² O mukutu uâ uene uoso, ni makunda mâ, ni maku mâ, ni mabhabha mâ kumoxi ni malola a kexile na-u kiuana kiâ, ezalele mesu mu mesu mbandu joso.

¹³ O malola nga evu a exana muene, exi: Ngalengale. Mu ku ki lombolola, ambe exi: Ikundumuke.

¹⁴ Kala xelubini ia kexile ni pholo jiuana: pholo ia dianga ia kexile pholo ia xelubini; o pholo ia kaiadi, pholo ia muthu; o ia katatu pholo ia hoji, o ia kauana pholo ia holokoko.

¹⁵ O jixelubini anga a zangumuka bhulu; iii iene o iama i nga muene bhu mbanduʼa ngiji ia Kebale.

¹⁶ O jixelubini ki jiia ni kuenda, o malola aia ni kuendela-nâ kumoxi; o jixelubini kioso ki ji oleka o mabhabha mâ phala kuzangumuka bhulu, ni malola ue kà di muangununanâ.

¹⁷ Ene kioso ki emana, ene ue emana; ene kioso ki a di leka, ene ue a di leka, mukonda o nzumbi ia muenhu iala mua ene.

O unéne ua Nzambi ku Tembulu u tunda-ku

¹⁸ Bheneʼobho o unéne ua Jihova anga u tunda bhu muelu ua inzu iê, hé uiza uimana ku thandu dia jixelube.

¹⁹ Jixelubini bhenhobho anga jʼoleka mabhabha mâ, hé ji di leka bhulu, ku mesuʼami muene a kutala, kioso ki jaii; o malola ue a di nhenge-nâ; anga jʼimana bhu muelu ua mutundila-kumbi ua inzu ia Jihova; o unéne ua Nzambi ia Izalaiele ua di leka bhulu ku thandu diâ.

²⁰ Ene-â, ene o iama i nga muene bhoxi dia Nzambi ia Izalaiele, bhu mbanduʼa ngiji ia Kebale, hé ngʼijiia kuila jixelubini.

²¹ Ene oso a kala ni pholo jiuana ni mabhabha auana kala muthu, o kidifua kia lukuaku lua muthu ki kala moxiʼa mabhabha mâ.

²² O kidifua kia pholo jâ, kiene kia jipholo ji nga muene bhu mbanduʼa ngiji ia Kebale, ni kidifua kiâ ni ene muene; aia jinga ni kuenda kala muthu kuoso kua lungu o pholo iê.