Izekiiele 1 - O Mikanda Ikola

O kisuma kia dianga kia jixelubhini

¹ Ku muvu ua makuinhi a tatu, mu kizuua kia katanu ku mbeji ia kauana, anga ki bhita kuila, kioso ki ngala mu kaxi ka jihutile, bhu ndundu ia ngiji ia Kebale, maúlu a jikuka eme hé ngi mona isunji ia Nzambi.

² Mu kizuua kia katanu ku mbeji (mu muvu ua katanu ua uhutile ua sobha Nzuakí).

³ O kizuelu kia Jihova anga kiza muene kua Izekiiele, monʼa Buzi, o nganga, mʼoxi ia akua Kaldeia, bhu kibumu kia ngiji ia Kebale, bhenhobho bhene muene bhua mu tudila o lukuaku lua Jihova ku thandu diê.

⁴ Mu kutala, nga mono kitémbue kia nguzu kiala mu kuijiia ku mbandu ia suku, ni dituta dia dikota ni túbhia tuedi kala kitumba kia mu uama; o mu jimbandu jê anga mu di-muika, o mu kaxi kê mu kala kima kia kidifua kia kìphembe, ki kala mu tunda mu túbhia.

⁵ O mu kaxi kê anga mu kala mu kutunda kídifua kia iama i uana; o kídifua kiá kienhiki: a kala ni kídifua kala kia muthu.

⁶ Ene anga a kala ni jipholo jiuana-jiuana, ni mabhabha auana-auana.

⁷ O inama iâ ia tandelela; o makanda mâ ma inama medi kala ki kala o kidiatelu kia monʼa ngombe, anga iia ni kubenha kala utadi ua kobidi uabhu o dixidilu.

⁸ Anga a kala ni maku a muthu mʼoxi dia mabhabha mâ, ku mbandu jene kiuana kiâ; kienhiki anga enʼoso kiuana kiâ a kala ni pholo jâ ni mabhabha mâ.

⁹ O mabhabha eneʼâ aia ni kudibudika kiiadi kiâ; ka lunguluka kioso kia kala mu kuenda; muthu uendela kuoso kua lungila o pholo iê.

¹⁰ O pholo jâ ji kala ni kídifua kia pholo ia muthu; ku mbandu ia lukuaku lua kiasu, enʼoso kiuana kiâ a kexile ni pholo ia ngombe; ni pholo ue ia holokoko kiuana kiâ.

¹¹ O jipholo jâ ni mabhabha mâ, ku thandu, ja di kexidila; kala xelubini o mabhabha mê a di-kexidila kiiadi-kiiadi kumoxi, o aiadi a mukuá ene a di vungu na-u o mikutu iâ.

¹² Kala muthu kuoso kua talela o pholo kuene kuʼaia; kuoso o nzumbi ku ia bhingi o kuia, aia; o kia kala mu kuenda, kʼaii ni kulungujuka.

¹³ O ku tala o iama ienhiʼii, o kidifua kiâ ela kala makala a túbhia a uama, a di fuangana makongolo a túbhia; o túbhia tuia ni kubhilajaka mu kaxi ka iama, anga o túbhia tuia ni kubenha, o mu túbhia mu tunda jinzaji.

¹⁴ O iama iia anga iza ni kulenga, ita tuhonda mukua ni ki teleka jinzaji.

¹⁵ O ki nga kuata kutala o iama iii, ngi mona bhuala malola mu mavu bhu mbanduʼa iama, pholo jiuana dilola, pholo jiuana dilola.

¹⁶ O ku tala o malola, ni ukalakalelu uê, o kidfua kiâ kiene kimoxi; o ku a tala ni ukalakalelu uê, u fika kala o dilola diala mu kaxi ka mukuá, o dilola diala mu kaxi ka mukuá.

¹⁷ O kiela kuenda, endela ku mbandu jâ joso jiuana; ka xikina kulunguluka kioso kiʼaia ni kuenda.

¹⁸ O malola eneʼâ kitala kiê kulebha kuahi, a kuata uoma; o jikamba ja malola eneʼâ kiuana kiâ, jʼezala mesu mu jimbandu.

¹⁹ O kioso o iama ki i kuata o kuenda, o malola eneʼâ aia ni kuendela bhu mbandu iâ; kioso ki zangumuka o iama bhulu, o malola a zangumuka ue bhulu.

²⁰ O kuoso kua solo o nzumbi kuia, aia; kuoso-kuoso muene kua bhingi o nzumbi kuia, o malola a zangumuka ku pholo iâ, mukonda o nzumbi ia muthu ua muenhu ia kexile mu malola.

²¹ Ene kiela kuenda, ene ue enda; ene ki ela kuimana, ene ue emana; kiela ene a zangumuka bhulu ku thandu dia mavu, o malola ue a zangumuka ku pholo diâ; mukonda o nzumbi ia iama iala mu malola eneʼô.

²² O ku mítue ia iama anga ku kala kidifua kia muthandu ua diulu, o ku u tala kuzela kuê ku kuata uoma, kuma uedi kala kidistalu kiazele kiavulu, kia di-zale bhulu dia mítue iâ.

²³ O bhoxi dia muthandu, bhene bhua kexi o mabhabha mâ ma kadilu, dimoxi di lulama ni dia mukuá; xelubini joso a kala ni mabhabha aiadi a vungina o mukutu ku mbandu kuku; ni amukuá aiadi a vungina o mukutu ku mbandu ia mukuá.

²⁴ O ene kiʼaia ni kuenda, ngʼevu kinuminu kia mabhabha mâ kala kinuminu kia dibhubha dia menha a vulu, mukuâ ni dízui dia Ió ua Tena-Ioso, dízui dia mutendu ua dikota, kala muxindu ua masoladi a mondala jikabalu; kioso kiemana, o mabhabha mâ mʼòlekele a ma tulula.

²⁵ Ku thandu dia muthandu ua kexile bhulu dia mítue iâ evu-ku dizui. O ene kioso kiemana, o mabhabha olekele a a tulula.

²⁶ O kuthandu dia muthandu ua kexile kulu dia mítue iâ, kua kexile kima kia di-fuangana kala kiandu, kiedi kala tadi dia safídia; o kuthandu dia kiandu kua kexile kala kidifua kia muthu, ua di-nenge kuthandu diê.

²⁷ Eme nga mono kidifua kia kìphembe ni ukalelu kala túbhia mʼoxi diê, tunde mua di-fu o malombo mê katé bhulu; o tundé mua di-fu o malombo mê, katé bhoxi, nga mono kidifua kia túbhia ni kubenha kua di muika mu jimbandu.

²⁸ Mukuâ ni ki kala o hongolo ku diulu, ki i moneka ku matuta bhu kumbi dia mvula, kiene ue kia di-fuile o mukengeji uenhú ua kondoloka mu jimbandu; kienhiki kia di-fuile o kubenha kua unéne ua Jihova; o kienhiki kioso ki nga ki mono, nga dibhale o pholo bhoxi, eme ngevu o dízui dia ió ua kexile mu zuela.