Izaía 9 - O Mikanda Ikola

O kuiza kua Mexiia ni uzonda uê

¹ Maji oxi ia bhondelekele ki ia kà xalela mua vundu, kana; kuma iene ia sekalele kiá mʼukulu, oxi ia Nzebulone, ni oxi ia Nafitali; maji o ku iezʼuku, oxi a i zangeleka bhu mbanduʼa njila ia musanza ua Kalunga; ku sámbua dia Njolodá, ku Ngalileia ia matumbu!

² O mundu a xikamene mu kitombe a mono mukengeji uònene; o athu a kexi mu kuendela mu kididi kia kizenji kia Kalunga, kuaki mukengeji uâ.

³ Eie ua sokolola o mundu iú, ua a bandekeza ue o kusanguluka; ene oso a-nda kusanguluka bhu pholo ié, kala ki sanguluka athu bhu thembu ia kumuna, mukuâ ni kiene kutana athu mu kuuana o madibhundila.

⁴ Mbata o jungu ia a xinine, eie ua i bukujula, ni mbangala ia kexi mu ku a batujula na-iu o dikunda, katé ni mbasá ia mubhikixi uâ, kala mu izuua ia akua Midiiane kia a tolola.

⁵ Mukonda o ibhakatu iene ioso ia ió a kexi mu kúlua ni kilungutu, ni izuatu ia dimbujukile mu manhinga, a kà ioha, ia kà kituka luandu lua túbhia.

⁶ Kuma a tu vualela mona, a tu bhana mona ua diiala; o kutumina a mu tuika-ku bhu isuxi iê, o dijina diê a kà mu luka: Kidiuanau, Ndongixi, Nzambi ia Nguzu, Tata Inangenena, Kilamba kia Paze.

⁷ O kukula kua ulamba uenhú, ki kuene mbambe; o kutululuka kuê ki kuene kúbhua; ua tulama bhu kiandu kia Davidi ni ku usobha uê, phala ku u kuatesa bhu kididi, ni ku u fikidila mu kutetuluka ni mu uiukilu, tunde kiki katé ku hádia ni hádia; o muanu ua Jihova dia Ilômbo Ieta uene ua-nda ku bhanga kienhiki.

Utuminu ua Izalaiele a u ta jindumu

⁸ Jihova ua tumikisa njimbu kua Jakobo, iene ia buila mu Izalaiele.

⁹ Ni mundu uoso uenhú ua kà kʼijiia muene, mukonda akua Ifalaimi ni iá a tungu mu Samádia, ala kuzuela ukumbu ni ku di zangeleka kua muẋima, exi:

¹⁰ Matijolo a di lundumukina kiua, maji tu tunga-bhu kiá jinzu ja matadi ma songa jihete; mikuzu a i batujula, maji tu bhinganesa-bhu misédulu.

¹¹ Kala kiki, o Jihova ua-nda ku mu fundumuina jinguma ja Lejime, o nguma jê ue muene ua-nda ku ji funhisa.

¹² A-nda ku dianga o kuiza, akua Sídia; o kuema kua-naa kukaiela akua Fidíxia; anga a bhana mu kanu, Izalaiele hé a mu minha; ku thandu dia ima iosuʼiii o njinda iê ki i bhu, maji hanji kia sunununa lukuaku luê.

¹³ Hanji-phe, o mundu iú ki u xikina kutolokela uoso ua mu beta, mba a sota Jihova dia Ilômbo Ieta.

¹⁴ Kienhiki Jihova ua-nda kubatula Izalaiele o mútue ni mbunda, ni luthangu ni lumbamba, mu kizuua kimoxi kiene.

¹⁵ O kikulakaji (ua kuka) ni mukuakijingo ene o mútue; o musesedi u longa o makutu, muene o mbunda.

¹⁶ Mbata asonguedi a mundu iú akua-mangonha, oso ala ku a kaiela, a kà buila.

¹⁷ Kala kiki o Jihova ka tena ku kala ku ngalasa ni minzangala iâ, o jihukunhi jâ ni atudiʼâ, Jihova ka xikina ku a kuatela henda, mbata ene-oso akua-mangonha, akua-phulu, makanu mâ mazuela ulaji uoso. Ku ima iosuʼiii-phe, njinda iê ki bhene bhu ia suku; maji hanji kia sunununa lukuaku luê.

¹⁸ Kuma o phulu ioso-lolo i uama kala túbhia, iximika katé ni ivunda ni misonge. Kiene muene, i bambula katé ni mixi ioso ia di-bhidijika ku muxitu, anga dixi diê di bhana matuta a xiketela bhulu.

¹⁹ Mukonda dia njinda ia Jihova dia Ilômbo Ieta, oxi, ia kà vunda, o mundu ua kà kituka kala iangu ia kuoha; ki bhuá kala muthu u kondeka phangʼiê.

²⁰ O kia sutunuina ku mbandu ia dilu, nzala ki i bhu, o kia dila ku kiasu, kekuta luua: Kala muthu ua kà dia xitu ia lukuaku luê.

²¹ Manasa ni Ifalaimi, Ifalaimi ni Manasa, kiiadi kiâ a balukila Juda; ku ima iosuʼiii-phe, njinda iê ki bhene bhu ia suku, maji hanji kia sunununa o lukuaku luê.