Izaía 65 - O Mikanda Ikola

Nzambi u polometela kuividila musambu ni kubhana kizediuse ku ʼselevende jê

¹ A ngi sota kuala athu ka kexe mu ngʼibhula; a ngi sange kua ió ka kexi mu ngi sota; ku athu mu dijina diami ka tokalele-mu, nga a tambuijila, ngixi: eme bhabhʼú!

² Kumbi dioso dia kambàmba nga sunununa maku mami ku mundu ua xibhaka, akua kuendela mu njila ia kambe kuiuka, ni kukaiela mabanzelu mâ;

³ athu a kuata ku ngi thathamesa kiki bhu pholo iami izuua ioso, a bhela jisata mu mábhia, ohela uasu ua dizumba ku matijolo;

⁴ a xikama bhu jimbila, o mausuku a ma bhitila mu ididi ia tuhôio ni kúdia xitu ia ngulu, ni mizonge ia ima ia isunji ia kala na-iu mu jímbia jâ;

⁵ aia ni ku di ambela mudiâ, exi-phe: Suetuka koko, ku ngi zukame, mukonda eme nga beta kuzela moxi eie ndenge. Enhá a di-bhange dixi mu mazulu mami, edi kala túbhia tua uama kumbi dioso dia kambàmba.

⁶ Tala-ze, kienhiki kiosoneke bhu pholo iami; ki nga-nda ku di xibha; maji ene nga kà a futa, kidi muene nga kà a bhana o kisakidilu bhu homba iâ.

⁷ Jihova uambe: O ikuma ienu, ni ikuma ia jitata jenu bhamoxi, a kexe mu kuoha o fumasa ku milundu, anga a ngi ẋonguena ku tuthuthulundu; kienhiki ngi vutukila ku a zongela o futu ia ikalakalu iâ iòkulu anga ngʼa lukuila-iu bhu homba iâ.

⁸ Jihova uambe kiki: Mukuâ ni mu kisaka kia jiʼuva kia sanga-mu o vinhu iobhe, ene kuila, exi: Ku i zange, kuma muenhomo muala kubhanduluka; kiene ue ki nga-nda kubhanga mukonda dia henda ia jiselevende jami, phala ki ngʼa jikinise ene oso.

⁹ Nga ká sokolola mbutu mua Jakobo, o mua Juda nga kà tungula-mu mulundudi, muene u tambula konda ia milundu iami; jithungunu jami a kà lundula oxi, jiselevende jami muene mu a kà tunga.

¹⁰ Salone ua kà dí-bhanga kibhanga kia jimbudi, o dikôlo dia Akole dinangu dia ibhaku, phala athuʼami a ngi soto.

¹¹ Maji enu-phe, mua mu batuka kua Jihova, mua mu landuka o mulundu uami ukôla, enu mua kuata o kuzala o meza phala Kilundu-kia-jimbongo ni kulungisa maluvu phala Mamunu;

¹² eme ue nga-nda ku mi xinda kúfua ku xibhata, anga enuoso mua kà bhetamena bhu kijibha; mbata ngʼexana, enu nguenu kuitaia; nga zuela, enu nguenu kuívua; o kialabhu, mua bhange kiaiibha ku mesu mami, enu mua solo-bhu kioso ki nga di zemba na-kiu eme.

¹³ Kala kiki, Jihova Nzambi, uixi: Talesa, jiselevende jami a kà kala mu kudia, enu-phe mua kà tala hadi ni nzala; talesa, jiselevende jami a kà nuá, maji enu-phe mua kà kala ni dinhota: talesa jiselevende jami ja kʼènda ni kutana, maji enu-phe sonhi ja kà mi kuata;

¹⁴ Talesa, jiselevende jami ja kà kala mu kuimba mukonda o miẋima iâ ia sanguluka, maji enu-phe mua kà ta jingololo mbé o ngongo; muʼá kala ni kukumba mukonda dia kikote kia muẋima uenu.

¹⁵ Mua kà xisa o majina menu kuma dilebhu kua athuʼami ósole; Jihova Nzambi phe ua-nda ku mi jibha, anga jiselevende jê u a luka kiá dijina diengi.

¹⁶ Kienhiki uoso u sanga dibesá mu ngongo, u di sanga kiá mua Nzambi ia kidi-élele; o uoso u loka mu ngongo, u lokela kiá kua Nzambi ia kidi-élele; mbata malamba ma bhitile-nâ a ma jimbi kiá, o mene ue ku mesu mami ma jimuka-ku kiá.

Maúlu mobhe ni oxi iobhe

¹⁷ Talesa, kuma eme ngi iudika kiá maúlu mobhe ni oxi iobhe; o ima ia bhiti kiá ki bhu kala dingi ku i banza, né ngó kuiza mu kilunji, lémbua.

¹⁸ Maji enu mua-nda kusangulukila kiá muene mu kima ki ngi iudika, enu muene mu mua-nda kutanena; kuma talenu kunu, Jeluzaleme ngi mu iudikila o kusanguluka; O athuʼ ê ngi a iudikila o kimuenhu.

¹⁹ Anga ngʼenda ni kutanena mu Jeluzaleme ni kusangulukila mu athuʼami: muene kà kèvua-mu dingi mbimbi ia kudila, mba nzôngo ia ku di-kola.

²⁰ Ki muà kala dingi mona u laia ngó izuua iófele, mba muadiakimi u kamba kuzubha o izuua iê; mbata o munzangala ua kà fuila mu kitala kia hama ia mivu; maji o mukua-ituxi né u kala ni hamʼa mivu, a kà mu bhubhidila muene.

²¹ Ene-phe a kà tunga jinzo, anga a kala-mu; a kà dima milenga ia mivide, anga a kà dia idima iê.

²² Ene ka kà tunga phala akuâ engi kukala-mu; ka kà phapha phala athu engi ku i dia; mbata o izuua ia mundu uami ia kà soka ni izuua ia ukudilu ua muxi, ni athuʼami òsole a kà kemba ni ikalakalu ia maku mâ katé mu ukukilu.

²³ Ene ue ka kà kalakala mu kingoho, ka kà vualela kibuika, kuma ene o mbutu ia athu a a zediuisa kua Jihova, ni luvualu luâ kumoxi ni ene.

²⁴ Anga kia kà bhita, kuila ene kiluua a zubha kuixana, eme nga kʼètaia kiá; kuila ene kiluua ngó a zubha kuzuela, eme ngevuʼami kiá.

²⁵ Ni kimbungu ni seseme ia mbudi a kà dila dikèla dimoxi, o hoji ia kà dia iangu mukuâ ni ngombe; nhoka ua kà dia fufuta ia mavu, kuene kudia kuê. Ene, ka kà bhanga kiaiibha mba usuéia uoso-uoso mu mulundu uami uoso ukôla, kiene kia zuela Jihova.