Izaía 64 - O Mikanda Ikola

¹ Ó Ngana! Tamanu ua budile maúlu anga u tuluka, o milundu anga i di keleka mukonda dia pholo ié!

² Mukuâ ni muzukuta, o mulengo ua túbhia ki tu kuata ku jihuinhi ja kukuta, anga tu fulujukisa o menha, phala kufumanesa o dijina dié ku jinguma jé, kiene ue ki teketa o ifuẋi ia akua jixi mu ku ku mona!

³ Kala kiná ki ua kexe kubhanga madiuanu a bhingi kiluua tua a mona, ki tua a kingile, kioso ki ua tuluka jinga, milundu anga i di keleka mukonda dia pholo ié.

⁴ Mbata tundé mʼokulu kiluua a kʼivua, kiluua ki tetuluka mu mátui, kiluua mesu ue a mona Nzambi iengi, kalʼeie ngó, u Nzambi uene kukalakela uoso u kinga kua muene.

⁵ Eie ua-ia jinga kutakana ni muthu u sangulukila kubhanga kioso kia iuka, ni ió oso a ku xinganeka jinga mu mauendelu mé; talesa-ze, kindala eie ua thathamana mukonda etu tua te ituxi; mu mauendelu mé tua lueza-mu kithangana kia dikota, tu tena-phe kubhuluka?

⁶ Kuma etu-oso tuedi kala kima kia sotama, mauiukilu metu moso medi kala dikoza diala mu nuha kibuzu; etu-oso tu lalumuka muene kala mafe ma kukuta, o ikuma ietu iala ku tu kungulula kala kitembu kia tu ambatesa.

⁷ Ki bhuala dingi u hingila o dijina diê, mba u phaphumuka nʼa kuatenene kokué; mbata eie ua tu suekela o pholo, eie ua tu bhangesa ku botomoka mukonda dia ikuma ietu.

⁸ Maji kindala-phe, Jihova eiʼeie u Tatʼetu; etu tu utuma, eiʼeie u ngumbi ietu; etu ene-oso tu kibhangelu kia maku mé.

⁹ Ku thathamane kinéne, Jihova tata, mba u jijila kuxinganeka o itondalu ietu; o kiki, tala etu tua ku diondo, etu-enʼoso tu athuʼé.

¹⁰ Madiembuʼé a ngene a biluka jingùndu; Ziione kilombo ngundu, Jeluzaleme a mu buikisa.

¹¹ Onzo ietu ikôla mua kexe o kijingu, mua ku bhezela jinga o jitata jetu, a i te mu túbhia; ima ietu ioso-lolo ia beta ku tu uabhela ia biluka dixita!

¹² Kifua, Jihova tata, mu ima iosuʼiii, hanji u di xibhʼé muene? Uilʼé muene hudí, anga u tu tatesa kiosuʼiki?