Izaía 61 - O Mikanda Ikola

Kubhuluka kuòkole

¹ Nzumbi ia Ngana Nzambi ua ngi tula ku thandu; mukonda o Ngana ua ngʼundu kutudila jingadiama njimbu ia mbote; ua ngi tumu kusaka oso ala ni kikote mu muẋima; ni kuxika ngonge ia ufolo ua abhika, ni kujikula o jikaleia phala kujituna oso a a kuika.

² Ni kukola o muvu ua Ngana ua kubhanduluka, ni kizuua kia phonza i tunda kua Nzambi ietu, ni kukonda o malamba kua enhoso a tate;

³ ni kubhana ngonge kuamba akua-malamba mu Ziione a a zuike izuatu ia makembu bhu kididi kia utôkua, bhu kididi kia malamba a a uese majiʼa kutana; bhu kididi kia kikote kia muẋima a a zuike kizuatu kia diximanu; nda a a luke kuila miẋi ia uiukilu, iòphaphe kua Jihova, phala fuma iê.

⁴ Ene a kà tunga jingùndu jòkulu, a kà bhetula dingi ididi ia diangele kusenguluka, madiembu a sekala a kà a bhangulula dingi, ni jingùndu jòkulu jòsengulule ku muiji ni muiji.

⁵ Bua kà kala jinzuangiza, ene a disa o ilunga ienu; akua makanga ene a kala idimakaji ienu, ene a tambula konda ia mábhia menu, ma mivide.

⁶ Maji enu-phe a kà mʼixana Jinganga ja Jihova, a kà mʼixana Akunji a Nzambi ietu; mua kà dia ku jinzungule ja akua jixi, o mu fuma ia ene enu muene mu mua kà fumanena.

⁷ Mukonda dia sonhi i mua tambula mu luiadi ni malebhu, mua kà sangulukila ku dikânda dienu; kala kiki moxi ienu, o ima i mua kʼàvua ia kà di-budika mu luiadi, mua kà kala ni kusanguluka ku nangenena.

⁸ Mbata eme ngi Jihova, kia ngi uabhela o kuiuka, kia ngi ibhila o kubhanga kiaiibha; eme nga kà a bhana futu iâ mu kidi; anga ngi ta-nâ kikutu kià xalelà-ku.

⁹ O mbutu iâ a kà i mona, a kà ela ngó sui, exi: ienhiʼii o mbutu ia zediuisa kua Jihova.

¹⁰ Nga kà sangulukila kiavulu mua Jihova, muẋima uami u tanena mua Nzambi iami; mukonda ua ngi zuika ni izuatu ia kubhuluka, ua ngi vungu dibeka dia kuiuka, mukuâ ni ngàiala ua kembela ubhanga, kala dibhanga dia di-zakela ni makembu mê.

¹¹ Mbata mukuâ ni kikala o mavu a sabhukisa o ngolôngo iê, kala ue o honga ki i fuafuesa ioso ia kuna-mu, kiene ue Ngana Nzambi kia-nda kusabhukisa o kuiuka ni diximanu phala o mbutu ioso ia athu.