Izaía 60 - O Mikanda Ikola

Jeluzaleme a mu vutula bhu ditala diê dia kizûnda

¹ Phaphumuka, u muike; mbata mukengeji ué iu uiza kiá, o kubenha kua Jihova ku banda kiá ku thandu dié.

² Kuma uamono kitombe kia vungina oxi, kuvunda kua vungina o ifuẋi; maji eie Jihova ua kèza ni kumuika ku thandu dié, o kizûnda kiê a kà ki muena kokué.

³ Ni akua-jixi joso a kèndela ku mukengeji ué, o jisobha ue ja kèndela mu kubenha kua ku muikina.

⁴ Bhetula mesu mé ku mbandu joso u mone: ene-oso ia di bhongolola mu kuiza kokué, o anʼé a mala a-nda kutunda ku makanga, o anʼé ue a ahatu a-nda ku a sasela bhu mbandu ié.

⁵ Eie-phe ua kà ki mona anga u benha ni kusanguluka, muẋima ué ua kà sasumuka, anga u sanzumuka; mbata jinzungule jene mu kizanga kia kalunga ja kà bilukila kokué, o maumvuama ma akua-jixi joso ma kà ku kana éiʼmuene.

⁶ A-nda ku kuizalesa ni jikamelu; ni jikamelu ji tunda ku Midiiane ni ku Efa, bhuila bulukutu mvengete; ene oso a kà tunda ku Seba; a-nda kubheka ulu ni uasu ua mazumba; anga a fumanesa o diximanu dia Jihova.

⁷ Ilunga ioso ia jimbudi ja Kedale ia kéza kokué, ilumbe ia Nebaiote ia kà ku tokala eie, i ku bhikila; a kà i xikina ni vondadi kuma sata ku kalatódio kami; eme hé nga kà fumanesa inzo ia kizunda kiami.

⁸ Akuahi iá a mu kuijiia bhulu a diambatesa kala matuta, a mu kuiza ni kutuka bhulu kala membe aia bhu tunjanena tuâ?

⁹ Ni kidi kiene, o ikolo ia kà ngi xikamena, jinaviio ja Talxixi jene ja kà tuama, phala kuiza kuxila dijina dia Jihova, Nzambi ié, ni kua Dilemba Dikola dia Izalaiele, mukonda muene ua ku jingisa.

¹⁰ O anʼa jithungiembu ene a kà ku tungila o imbaka ié, o jisobha jâ ja ka ku bhikila; mbata nga ku betele kia ngi kuata o kutema, maji mu kulenduka kuami nga ku kuatela jihenda.

¹¹ Kala kiki, mabhitu mé ma kà jikuka muene mu thembu joso; né mu muanha mba mu usuku ka kà ma jika; nda mundu a ku bhekele maumvuama ma akua-jixi, kumoxi ni jisobha jâ.

¹² Mbata kifuxi mba utuminu, ukamba ku ku sedivila eie, uà kà jima o mbutu; xi, ifuẋi ienhoio a kà i buikisa muene, taka-taka.

¹³ O kutunzama kuoso kua Libano kua kèza kokué, ni faia, ni pinho ni buxo bhuamoxi, phala kukembesa o kididi kiami kia dibhezelu; eme-phe o kididi kia kutula inama iami nga kà ki jingisa.

¹⁴ Ni ana a ió oso a ku huhile eie, a kèza ni kudiunda kokué; oso a kexe ku ku lebhula a kà ku fukamena bhu inama ié; ene anga a kà kuixana exi: Diembu dia Jihova, Ziione dia Lemba Dikola dia Izalaiele.

¹⁵ Bhu kididi kia ku kuehelela, ni ku ku buakulula bhua ku tula, kia bhingi ki bhu kexile u bhita momué, eme-phe nga kà ku bhangesa kukala ni kuzangalala ku nangenena, kutana muene, kutunda muiji kuiza muiji.

¹⁶ Eie ua-nda kuámua o lete ia akua jixi, anga u di-dikila ni ima i tunda ku mele ma jisobha; anga u kʼijiia kiambote kuma eme ngi Jihova ngi Mubhuludi ué, Mukudi ué, muene Dizonda dia Jakobo.

¹⁷ Bhu kididi kia kobidi nga kèza ni ulu, bhu kididi kia felu eme nga kà bheka phalata, bhu kididi kia mabaia a miẋi ngôndo, bhu kididi kia matadi felu; jifixiiadi jé ngi ji bhangesa kukala akua-uembu, o atuminiʼé ngʼa bhanga akua kidi.

¹⁸ Mʼoxi ié ki mungu dingi evua-mu o kuhâma, o mu jimbambe jé ki muà kala jingùndu mba kibuika; maji o malumbu mé ua kà mʼexana Kubhuluka, o mielu ié Diximanu.

¹⁹ Dikumbi ki diene dingi di ku muikina mu muanha, o mbeji ue ki iene ia kà ku muikina ni mueje uê; maji Jihova muene ua kà di bhanga mukengeji ué ua kalelà-ku, o Nzambi ié muene u kala o kizûnda kié.

²⁰ Dikumbi dié ki dia kà fua dingi; o mbeji ié ki i xikina kuia ku mujijima, kuma Jihova ua kà di-bhanga muene mukengeji ué uxalelà-ku; o izuua ié ia lutu bhenhobho ia suku.

²¹ Ene oso ku mundu ué a kà kala athu aiuka; ene a kà lundula oxi katé ku hádia ni hádia; a kà kala thangu ja ubhe ji nga phaphe eme, kikalakalu kia maku mami, phala eme a ngi ximane.

²² Kamona kandenge, ua kà di-bhanga midi; o ua beta kutola u biluka kifuxi kionéne: Eme, ngi Jihova, bhu kumbi diê nga ka ki bhanga sé kufula.