Izaía 6 - O Mikanda Ikola

Izaia a mu tungula, anga a mu lumbila upolofeta

¹ Muvu uafu sobha Uziia, nga mono Jihova ua xikama bhu kiandu kia lebha, kia di-leka; o kilômbo kia makuenze mê, anga kizalesa o Tembulu.

² O Jiselafí ji mu zenzamena ku thandu; kala selafí ia kexi ni mabhabha masamanu; Maiadi ma futile-nâ o jipholo jâ, maiadi ma futile-nâ o inama, maiadi mamukuá ma kutukila.

³ Anga jikuata ku di tambuijila, kuila: Ukôla, Ukôla, Jihova dia Ilômbo Ieta! Oxi ioso iezala ni fuma ié!

⁴ Mukonda-phe dia dízui dia ió a te o nzongo, o mielu ia tunguta, anga inzu izala ni dixi.

⁵ Bheneʼobho ngixi-phe: Kokolo diami! Eme ngafu-ó! Mukonda ngi muthu nga xidi mu kanu, eme nga tunga muʼaxaxi ka mundu ua kasana o dikanu, o mesu mami ia a mono Muenexi, Jihova dia Ilômbo Ieta!

⁶ Maji selafí imoxi, ia tuka i ieza kokuami, o bhu maku iambata dikala dia uama, ua di nomona ni tanaji bhu kalatódio.

⁷ Anga u ngi tuta na-diu ku dikanu, uixi: Talesa, dikala didi dia ku tuta ku mizumbu; kikuma kié kiabhu, o kituxi kié kióloloke.

⁸ Kia bhiti kiki, ngevu dízui dia Jihova, uixi: Mukuahi ngi mu tuma, nanhi u tu endela bhu kididi? Eme-phe, ngixi: Emeʼami-ú, Ngana, ngi tume eme.

⁹ Bheneʼobho muene uixi: Ndé muene, uambela mundu iú, o kuívua muivenunu, anga mu tokoka o kuijiia; o kumona mu monenunu muene, anga mu tokoka o kutongolola.

¹⁰ Mbata o muẋima ua mundu iú, uakolokota, mátui mâ, ma kokoloka kuívua; mesu mâ a ma jika; kuiengesa o kumona ni mesu, kuívua ni mátui, kuijiia ni muẋima, nʼalunguluke dingi, Eme ni ngʼa sake.

¹¹ Eme-phe, ngixi: Ngana Katé bhebhi? Muene ua kumbulula: Katé ki buika o madiembu, sé muthu u tungamu, né ngó muthu umoxi mu jinzu, oxi iene ioso kilômbo ngundu.

¹² Jihova kʼehele-mu dingi athu, o muʼaxaxi ka ixi mu kale muene kusekala kuònene.

¹³ Maji se mbandu ia kakuinhi i subhuka-mu, a kà i buikisʼé dingi; mukuá ni mukaluvádiu, mba muzinhela, kioso ki i lalumuka mafe, hanji uemanʼé; kiene ue, o mbutu ikôla.