Izaía 59 - O Mikanda Ikola

Kufisala ikuma ia ʼxi

¹ Tala-ze, lukuaku lua Jihova ki lua konana kuila lu lémbua kubhulula; dítui diê ue ki di xiluka, kuila u lémbua o kuívua.

² Maji o ikuma ienu iene ia di bhange kibatulu kia xiti bhu kaxi nʼenu ni Nzambi ienu; o ituxi ienu iene ia mu vungu pholo, phala a kambe ku miʼvua.

³ Mbata maku menu ma kasana ni manhinga, o milembu ienu ia kasana ni ikuma; o mizumbu ienu i tanga makutu, o dimi dienu dizuela isunji.

⁴ Ki bhuala muthu u dikola mu ku sota kulûnga, kana-bhu ue muthu u tukuluka mu kufunda phala kusota o kidi, a di-fiiala kingoho, o kuzuela kuâ o makutu; emita milonga, avuala ikuma.

⁵ Alangela maiaki ma dizuua-mbinga, a bhota uandanda ua kabube; o udia ku maiaki mâ, ufua; o kia ma ẋatula, mu fuomoka diuta.

⁶ Uandanda uâ ki u xikina ku u bhanga kizuatu, midimu iâ ka kà tena ku divunga-iu; midimu iâ midimu ia ituxi, o bhu maku mâ bhuezala ibhangelu ia usuéia.

⁷ Inama iâ i lenga mu ku bhanga phulu, a sakalela mu kubhubhisa manhinga ma muthu ua kambe kikuma; o ilunji iâ i funha ikuma mu ikuma; kubuika ni kubhondalala kuenhé mu njila jâ.

⁸ Njila ia kutululuka a lémbua ku ijiia, mu makànda mâ ku sange-mu kutetuluka; o njila jâ ja kubhengalala a di bhangela-ju ene-muène, uoso uendelamu ka tena kumona dinhohenu.

⁹ Mukonda dia kienhiki, o kuiuka kua tu kala dikanga, o kulúnga ki ku tu bhixila; tuendile mukengeji, maji tala, kua tu iza ngó kitombe; tuendile kubenha, maji tua mu kuendela mua vundu.

¹⁰ Tua mu babajalela ku iphapha kala tu ifofo, kidi muene, tua mu zuzuta kala athu a kambe o mesu; katé ni ku mediia tu dibhukajana kala kuala kitombe, tua batukila mua vundu kala tu madifundu.

¹¹ Etuʼenhoso tua mu dila kala itôto, o kukema kuetu kala membe, kua kalé kiá; tua kingile o kulúnga maji ki kua moneka; tua kingile kubhuluka, maji kua tu kala dikanga.

¹² Mukonda o kubhukumuka kuetu kuavulu bhu pholo ie, o ituxi ietu iene ia tu elesa; kuma itondalu ietu hanji ia tu nhenganana, o ikuma ietu tua ijiia muene kiambote.

¹³ Tuedi ni kulueza, ni ku ta makutu mu ku bilukila Jihova, ni ku ta dikunda kua Nzambi ietu, tuexi ni kuzuela kua ungumba ni kubhukumuka, ni kuimita ni kulusa maka ma mangonha ku muẋima.

¹⁴ Kienhiki o ufundisilu ua kidi ua vutuka kuema, o kuiuka kua di takula dikanga, mukonda o kidi mu nzunga kia muia ni ku-dibhukana, o ku sokelela ki ku xikina ku bokona.

¹⁵ Kiene muene, o kidi a ki jimbi, uoso uila nguami kubhanga phulu, o ió, bhulubhulu dia ku mu bhunda. Jihova ua ki mono, ki kia mu iibhila ku mesu mê, kuila, o kubatula milonga mu kidi, ki kuala-ku.

¹⁶ O kia mono kana-ku muthu mukua kilunji, ua diuana-kiu kuila ki bhuala muthu ua di-tambulula ulemba; kienhiki lukuaku luê-muène lua mu bhekela ubhulukilu, kuiuka kua-muene kuene kua mu imika.

¹⁷ Kuma ua zakela kulúnga kala kivunga-thulu kia ita, o ku mútue ua zuata kapasete ka kubhuluka, iu ua zuata izuatu ia phonzo, ua di vungu o kuzokela kua difuba kala dibeka.

¹⁸ Kioso kia tokala mu ikalakalu iâ, kiene kia kà a vutuila muene, … ulundulula ngânji kua iá a mu kuatela luma, u bhana futu ku jinguma jê; o ikolo ua kà i bhana ue o futu iâ.

¹⁹ Kiene kia kà xila kiua dijina dia Jihova tundé ku mazanga, anga aẋila kijingo kiê tundé kutundila dikumbi. Kioso kiza nguma kala hungulule ia menha, Nzumbi ia Jihova u oleka mvela phala ku mu kaia.

²⁰ Anga kua kèza Mukudi mu Ziione, ni kua iá oso mua Jakobo a diela nʼaxie itondalu iâ, Jihova ua ki tange.

²¹ Kienhiki, kiene kikutu kiami eme ki ngi ta-nâ, eme ngi Jihova: O Nzumbi iami ia ku tula ku thandu, ni maka mami, u nga-te mu kanu dié, ka kà tunda-mu né mu kanu dia mbutu ié, né mu kanu dia mbutu ia mbutu ié, a xalela muene tundé kiki katé ku hádia ni hádia, kiene kia tange Jihova.