Izaía 57 - O Mikanda Ikola

O ubhezelu ua iteka mu Izalaiele a u êlesa

¹ Muthu uaiuka iu uia muʼalunga, kana-bhu muthu u ki xinganeka ku muẋima uê; athu a lenduka a ololabhu, kana-bhu-phe ulembalala kuila muthu uambote a dianga ku mu sondolola kioso o kuiibha kiluua kuiza.

² Nʼa bokona muene ku uembu; a-nda kunhohena bhu mianza iâ, oso enda ni kuiuka.

³ Enu-phe bhiẋilenu bhabha, mu anʼa mama ia tambula uanga, mbutu ia kidianzunga ni ndumbu.

⁴ Mukuahi muene mua mu nangena? Nanhi mua mu mu bhanena mu kanu, ni ku mu tundixila o dimi ku kanga kiokio? manhi kʼenu-enu mu anʼa ituxi, mu mbutu ia mangonha?

⁵ Mua senduka ni mahamba bhu makota a miẋi ia uisu, ni ku satela tuana ku jingiji, ni mu mabânda a matadi?

⁶ Dikânda dié diala ku matadi maẋanana mene mu jingiji; enhá ene o undundu ué; ku matadi kuenhuku eie ue kuene ku ua mu lunduluila o mubhaku ué ua maluvu anga u a bhana ima ia maujitu; ima iii mbé eme i ngi sangulukisa?

⁷ Muanza ué kaxi ua u zale bhu thalʼa milundu ia di-leka; kuene ku uene kubanda mu bhana o jisata.

⁸ Ujika ikolo ié kuema dia mabhitu ni ilúmbua mu kikumbi kia muelu; eme ua ngi baluka, eie ua sendukila engi, anga u banda, u kudisa hama, u sunga amoxi u ta-nâ kikutu; hama iâ ia ku uabhela bhuoso-bhuoso bhu u i sanga.

⁹ Anga uia ku dihamba dia Mulôko ni maji, o ima ia mazumba u i vudisa; u tuma jiphunga ku makanga, anga u di-tununa katé muʼalunga.

¹⁰ Ua huha ngó dikanga, ua bhuila ua suku; maji ngué kuila: Ngala kutala ngó hadi: Kuma o ki ua talela hadi ua ki sange, kiene kia ku kambesa o kubhuila.

¹¹ Mukuahi ua ku kuatele uôma mba hele? Kia ku bhekela ku-ta o makutu, nʼukambe ku ngi lembalala, né ngó ku ngi ta mu muẋima ué? O kudixibha kuami tundé okulu, kiene-ze ki ua kambela ku ngi xila, ki kiene?

¹² Eme nga-nda kutadika kuiuka kué, ni ikalakalu ié ia kingoho ki ia-nda ku ku bhandulula ni kima.

¹³ O ki u dikola, ngiia: o akuenu u ua bhongolola ió, a ku kudile-ze; maji kitembu kia-nda ku a phephulula ene oso, o izala ia-nda ku a hungumuna; maji uoso ua ngi dielela eme, muene ua kà vua oxi, ulundula mulundu uami uangene.

Jehova ua bhana polomesa ia kukuatekesa ni kusaka

¹⁴ Anga à kela: Sengululenu, sengululenu kikoka, iudikenu o njila; katulenu iẋinji mu njila ia mundu uami.

¹⁵ Kuma Munéne ua dileka, ua jinga kinéne, ua tunga kididi kinangenena, uene ni dijina dia kuila Ukôla, uambe kiki: Nga tunga bhulu, bhu kididi kikôla; nga tunga ue ni uoso mukua muẋima ua toloka, ua batama, phala kuphaphumuna muẋima ua oso a batama, ni kuphaphumuna muẋima ua oso a toloka.

¹⁶ Kuma eme ki ngi jijilʼami kuzoka izuua ioso, ki ngi-di ue kiene ki nga teme kiene, kana; kuma nzumbi ia muthu ia vula kulémbua bhu i nhohena, ni mienhu i nga bhange.

¹⁷ Njinda ia ngi kuatele mukonda dia usuéia ua unjenje uâ anga ngʼa beta; kuma kia ngi kuata o kutema, pholo nga i sueka; maji ene, hanji-phe, mu kubhukumuka kuâ, akaiela njila ia muẋima uâ.

¹⁸ Eme ngala kumona o jinjila jâ, phala ni ngʼa sake, ngʼa batesa ue, hé ngʼa bhana dingi o kukondama ni ene ni mundu uâ ua di-kuata o mukondo ua kudila.

¹⁹ Ibundu itunda ku mizumbu eme-muène ngi i iudika; ngi bhana paze kua ió ala ku makanga, ni kutululuka kua ene ala bhua zukama, eme Jihova, eme-muène nga kà a bhana o kudisanza.

²⁰ Maji athu abhumu mukuâ ni mabhuku ma musanza ma temanana, ki ma xikina ku ma batamesa, a bhingi kuila o menha mê ma lukula mathatha ni malôua.

²¹ Nzambi iami, uixi: Athu abhumu ka moneka paze.