Izaía 56 - O Mikanda Ikola

Jipolomesa phala osoʼaluka o sabhalu (o kizuua kia Ngana)

¹ Jihova, uambe kiki: Kuatenu kilunji, mu bhange ima ia iuka, mbata kubhuluka kuami kua zukama, kufundisa kuami kua-nda kutukuluka kiá.

² Uazediua o muthu uoso u bhanga kiki, ni monʼa muthu uoso u ki ta lukuaku; uoso u di langa phala ka fukuile o kizuua kia sabhalu, anga u langa o lukuaku luê phala kà bhange kima kiaiibha.

³ Uoso monʼa nzuángiza, u di banda kua Jihova, ka ki tange kuamba: Jihova ua ngi batula muene ku povo iê; ki bhu kale ue ngolambole u kiamba kuila: Eme bhabha ngi muxi ua kukuta.

⁴ Mbata Jihova uambe: Jingolambole joso, jene kualuka jisabhalu jami, anga a tungula ioso ia ngi uabhela eme, nʼa tambulula kikutu kiami ni vondadi.

⁵ Eme ue mʼonzo iami ni mu malumbu mami nga kà a bhana-mu kididi, ni dijina dia tundu o dijina dia ana a mala ni anʼa ahatu; dijina dinanga, diene di ngʼa bhana kala muthu mudiâ; o dienhidi ki dia kà bhua-ku dingi.

⁶ Oso ue ana a jinzuangiza, a di bandeka kua Jihova, phala ku mu bheza, ni kuzola dijina dia Jihova, kienhiki nʼa kala kiá jiselevende jê … osoʼaluka o sabhalu, sé ku i tondala, ni oso a tambula kikutu kiami ni vondadi.

⁷ Eme ue nga kà ambata ku mulundu uami ukôla, anga nga kà a bhangela fesa mʼonzo iami ia kusambela; o mibhaku iâ ia kuoha ni jisata jâ, nga kà ji xikina muene bhu kalatódio kami; kuma onzo iami a kà i ixana onzo ia kusambela phala akua jixi joso.

⁸ Jihova Nzambi, uene kubhongolola oso a muangana mu Izalaiele, uambe kiki: Hanji nga kà bhongolola dingi athu kumoxi ni iá u nga bhongolola kiá.

Izalaiele a a tembula mukonda dia ikuma iâ ni milonga iâ

⁹ Enu mu iama ioso ia mukáu, nʼenu mu iama ku muxitu, izenu mu die.

¹⁰ Alangidiʼâ oso ala ifofo, kʼejiia kima; a di bhange jímbua ja mabubu, ja lémbua kubuza; jaii ku kilu, ja zeka, ja uabhèla kubôua.

¹¹ Ômbua jenhiji jala jingandixi, ki jene kuikuta; o ene ala abidi ka tongolola kima; ene-oso a vutukila jinjila jâ, kala muthu usuua nganhu iê, kala muthu ku mbandu iê.

¹² Ene kia di ambela, ela: Zenu, nga-nda kuiza ni vinhu, nda tu nue tu kodiue; lelu kiene mungu ue kiene, maji mungu tuxia muene fuma.