Izaía 55 - O Mikanda Ikola

Athuʼosololo a exana ku ubhulukilu

¹ Enu, oso muala ni dinhota izenu ku menha, nʼenu oso mua lémbua kitadi, izenu, sumbenu, mu die; eué, zenu, mu sumbe mu ngoho sé kitadi, né suilu, vinhu ni lete.

² Kitadi kienu mua mu ki zangela-hi ku ima ia ngoho ki kúdia? O ima i tunda mu ikalakalu ia maku menu anga mu i zangela ngoho mu ioio ki i tena kuikutisa? Kuatenu kilunji mu ngʼivue, nda mu die kiauabha, o muenhu uenu u tane ni ima ianete.

³ Bhetekenu o mátui menu, nda mu ize kokuami; ividilenu, muenhu uenu ubhuluke; kuma nga-nda kuta nʼenu kikutu kixalela-ku, hé ngi mi bhana jimbote ja Davidi ki jene kufula.

⁴ Talesa, eme nga mu bhana a kale mbangi ku athuʼoso, a kale kilolo, a kale nguvulu ia mundu.

⁵ Tala-ze, eie ua-nda kuixana kifuxi kua kʼijidile, ifuẋi ia kambele ku ku ijiia ia kèza malusolo kokué, mukonda dia henda ia Jihova Nzambi ié, ni ia Dilemba Dikola dia Izalaiele; kuma muene ua ku zangeleka.

⁶ Sotenu Jihova, kiosuʼiki ki mu tena ku mu sanga, mu kodienu kiosuʼiki kiala bhua zukama;

⁷ mukua-ituxi ehe o njila iê, o ua iibha muẋima a tule mabanzelu mê; a vutuke kua Ngana, u mu kuatela henda; nʼalukile kua Nzambi ietu, kuma muene mukua kuloloka kiavulu.

⁸ Mbata mabanzelu mami ki mene o mabanzelu menu, o jinjila jenu ue ki jene o jinjila jami, kiene kiambe Jihova.

⁹ Kala kia di-leka maúlu kuthandu diaʼxi, kiene kia di-leka jinjila jami, ji ja tundu o jinjila jenu, o mabanzelu mami ue ia a tundu o mabanzelu menu.

¹⁰ Kala kisonoka o mvula bhoxi, ni neve kioso ki ia laúka ku diulu, ki i tena kuvutukila-ku dingi, kale itekela oxi, anga i bhekesa kuima, isabhukisa, hé i bhana o mbutu ku kidimakaji ua kunu, ni mbolo kua ió udia,

¹¹ kiene ue kià kala o kizuelu ki tunda mu kanu diami; kiene ki kia kà vutuka kia hatu kokuami, maji kia kà bhanga kioso kia ngi uabhela eme, kale kioso ki nga ki tumukixina kiene ki bhita.

¹² Mbata enu mua kà katuka ni kusanguluka, anga a kà mi endesa ni uembu; o milundu iònene ni iòfele ia kà dikola ni kutana bhu pholo ienu, o miẋi ioso ku mukáu ia kà bhabha jimbanda;

¹³ bhu kididi kia musonge, bhua kà sabhuka mufaia; o bhu kididi kia musuna, bhua kà sabhuka mumurta; anga kia kà fumanesa dijina dia Jihova, kià kala kijimbuete kinangenena ki kia kà bua-ku dingi.