Izaía 54 - O Mikanda Ikola

Kukula ni kujinga kua ngeleja

¹ Tana-ku eie u mbaku ua kambe kuvuala; imba, u dikole, u te nzôngo, eie kiluua uívua mika; kuma anʼa kisula kota mu kuvula, uala ni munumiʼê ndenge, kiene kia zuela Jihova.

² Balaka ié kudisa-iu, kididi ki di-xale, kia tokala o kutunga ni kusoma; ku i phopheke; lebhesa mikolo ié, jiphapha batela-ju kiambote.

³ Mbata eie ua-nda kusokoloka ni ku kadilu ni ku kiasu; mbutu ié ia-nda kúvua akua-jixi, ilombo ia kexe jingùndu ene a-nda ku i tunga dingi.

⁴ Ku kale ni uoma, mbata sonhi ki ja-nda ku ku kuata; ku kale ni jisonhi, mbata kua-nda kukakuka; inda sonhi ioso i ua bhiti na-iu ku undenge ué ua-nda ku i jimba, môndo ua utudi ué kua-nda ku u xinganeka dingi.

⁵ Mbata Mubhangi ué muene munumiʼé, dijina diê Jihova dia Ilombo Ieta; o Dilemba Ukôla dia Izalaiele, muene Mukudi ué; muene a kà mu ixana exi, Nzambi, Langela-Ngongo.

⁶ Mbata Jihova ua ku ixana kala muhatu a mu ambudisa, iu uene ni kikote ku muẋima; kala muhatu a tundu-nê undenge; ia a mu ehelela, kiene kia zuela Nzambi ié.

⁷ Nga ku ehelela kathangana kòfele; maji nga-nda ku kuongeka ni jihenda ja nzungule;

⁸ Mu kutema kuavulu nga ku suekela pholo iami mu kathangana kòfele; maji nga-nda ku ku lendukila ni henda ki iene kúbhua; kiene kia zuela Jihova, Mukudi ué.

⁹ Mbata o kiki kia kà ngi kala mukuâ ni dilúvio dia Noué; kala ki nga lokele kuila o sulumbembe ia menha ma Noué ki ia kà bita dingi kulu dia mundu; kiene ki nga loka kuila eme nuka dingi nga kà ku kuatela njinda, mba ku ku bazela.

¹⁰ Kuma milundu hádia isondoloka, tuthuthu-lûndu tua kà tunguta; maji o kulenduka kuami ki kua kà ku sondoloka; o kikutu kia kutululuka kuami ki kia kà lunguluka, kiene kia tange Jihova, mukua ku ku lendukila.

O Jeluzaleme ià Kʼeza-ku

¹¹ Eie, mukua-hadi, u muthu ua takujuka ku mabhuku, mukua kikote! Talesa-ze, kuma o matadi mé ngi ma sokeka ni makembu moso, anga ngi ku xikika ku disesa dia matadi ma safídia.

¹² Nga-nda ku ku bhangela jinjanena ja kidistalo, o mabhitu mé ue ma matadi a phelu ia nzaji, o mbambe jê joso jà kala ja matadi a lekujuka.

¹³ Anʼé oso a kala maxibulu a Jihova; o kutululuka kua anʼé kua kà di-xala.

¹⁴ Nga kà ku xikika ku thanduʼa uiukilu; o kubhondalala kua kà ku kala dikanga, kuma eie kuà kala dingi ni kekenha ia kima; kimbuua ki ku bhue, kana-ku dingi kizuelu kia kà ku bhixila.

¹⁵ Tala-ze, jinguma jê joso né a di bhongolola nʼa ku kitukila, ijiia-kiu kuma ka tundu kokuami; uoso u di ta ku kionge kia ku ku balukila, ua kà dibhala, mukonda nga ku zola.

¹⁶ Talesa, eme-muène nga bhange musudi-a-thumba uene kuzukuta makala bhu mbèmbu, phala kuiudika ikumba iê ia ku bhangela midimu; eme-muène ue nga bhanga mubuikixi, phala ku buikisa.

¹⁷ Falamenda ioso-ioso iòbhange phala ku ku kuama, ia-nda kulueza; o dimi dioso-dioso di ku tatela eie mulonga, mu kufunda, eie ua kà di belesa; o iú uene undundu ua jiselevende ja Nzambi, kuene ue kulûnga kuâ ku tunda kokuami, eme ngi Jihova.